09 ސެޕްޓެމްބަރ 2016 - 12:42
ޕިއޮންޔޮން (ސެޕްޓެމްބަރު 9) - ނިއިކްލިއާ ފަސް ވަނަ ޓެސްޓް ކާމިޔާބުކަމާ އެކު ކޮށްފައިވާ ކަމަށް ނޯތު ކޮރެއާ އިން މިއަދު ބުނެފި އެވެ.
ނިއުކްލިއާ ޓެސްޓް ކުރިކަން ނޯތު ކޮރެއާގެ ރަސްމީ މީޑިއާ އިން އިއުލާންކުރި އިރު އެ ސަރަހައްދަށް ބޮޑު ލޮޅުމެއް އަރާފައިވާ ކަމަށް ވަނީ ދައްކައިފަ އެވެ. އެއީ 5.3 ގެ ބާރުމިނުގެ ބިންހެލުމެއް ކަމަށް ފުރަތަމަ ވަނީ ބެލެވިފަ އެވެ
ވާދަވެރި ސައުތު ކޮރެއާ އިން ބުނެފައި ވަނީ އެއީ ނޯތު ކޮރެއާ އިން މިހާތަނަށް ކުރި އެންމެ ވަރުގަދަ ޓެސްޓް ކަމަށެވެ. އަދި ނޯތު ކޮރެއާ އިން ނިއުކްލިއާ ގާބިލްކަން ކުރިއަށް ޖައްސާފައިވާތީ ސައުތު ކޮރެއާ އިން ވަނީ ކަންބޮޑުވުން ފާޅުކޮށްފަ އެވެ.
ނިއުކްލިއާ ޓެސްޓާ ގުޅިގެން ސައުތު ކޮރެއާގެ ރައީސާ ޕާކް ގެއުން ހައި ވަނީ އެއީ ނޯތު ކޮރެއާގެ ލީޑަރު ކިމް ޖޮން އުންގެ ނާގާބިލްކަން ކަމަށާއި އަދި އެއީ އަމިއްލަ އަށް ހަލާކުވުން ކަމަށް ވިދާޅުވެ އިންޒާރު ދެއްވައިފަ އެވެ. އެމެރިކާ އިން ވެސް ވަނީ ނިއުކްލިއާ ޓެސްޓާ ގުޅިގެން އިންޒާރު ދީފަ އެވެ. ޗައިނާގެ ފޮރިން މިނިސްޓްރީން ބުނީ ނިއުކްލިއާ ޓެސްޓާ މުޅިން ދެކޮޅު ކަމަށާއި އަދި މަސްރަހު އިތުރަށް ގޯސްވެދާނެ ކަމެއް ނުކުރުމަށް ނޯތު ކޮރެއާ އަށް ވަނީ އަންގައިފައި ކަމަށެވެ. ޖަޕާނުގެ ބޮޑު ވަޒީރު ޝިންޒޯ އަބޭ ވަނީ ނޯތު ކޮރެއާގެ ޓެސްޓަކީ ޖަޕާނަށް ބަލައިގަނެވޭނެ ކަމެއް ނޫން ކަމަށް ވިދާޅުވެފަ އެވެ.
ވައިޓް ހައުސް އިން ބުނީ ރައީސް ބަރަކް އޮބާމާ ވަނީ ސައުތު ކޮރެއާގެ ރައީސާ ޕާކް އާއި ޖަޕާނުގެ ބޮޑު ވަޒީރު އަބޭ އަށް ގުޅުއްވާ ނިއުކްލިއާ ޓެސްޓާ ގުޅޭ ގޮތުން ވާހަކަ ދައްކަވައިފަ އެވެ.
ނޯތު ކޮރެއާގެ ނިއުކްލިއާ ޓެސްޓުގައި ބޭނުންކުރި ގޮވާ ތަކެތީގެ އަދަދާ މެދު ވަނީ ސުވާލު އުފެދިފަ އެވެ. ސައުތު ކޮރެއާގެ އަސްކަރީން ބުނީ ޓެސްޓުގައި 10 ކިލޯޓަނުގެ ގޮވާތަކެތި ބޭނުންކޮށްފައިވާ ކަމަށެވެ. އެކަމަކު އެހެން ތަޖުރިބާކާރުން ބުނެފައި ވަނީ 20 ކިލޯޓަނުގެ ގޮވާތަކެތި ބޭނުންކޮށްފައިވާ ކަމަށެވެ.
އެމެރިކާ އިން 1945 ވަނަ އަހަރު ހީރޯޝީމާ އަށް އަޅާފައި ވަނީ 15 ކިލޯޓަނުގެ ބޮމެކެވެ.
ނޯތު ކޮރެއާ އިން ހަތަރު ވަނަ ނިއުކްލިއާ ޓެސްޓްކޮށްފައި ވަނީ ޖެނުއަރީ މަހު އެވެ. އެ ޓެސްޓާ ގުޅިގެން ނޯތު ކޮރެއާއާ ދެކޮޅަށް ދަތިކުރުމުގެ ފިޔަވަޅުތައް ވަނީ ހަރުކަށިކޮށްފަ އެވެ. ޖެނުއަރީ މަހު ނޯތު ކޮރެއާ އިން ކޮށްފައި ވަނީ 6-8 ކިލޯ ޓަނުގެ ނިއުކްލިއާ ޓެސްޓެކެވެ. ނޯތު ކޮރެއާ އިން ފުރަތަމަ ނިއުކްލިއާ ޓެސްޓްކޮށްފައި ވަނީ އޮކްޓޯބަރު، 2006 ގަ އެވެ. ދެ ވަނަ ޓެސްޓް މެއި، 2009 ގައި ކޮށްފައިވާ އިރު ތިން ވަނަ ޓެސްޓް ކުރީ ފެބްރުއަރީ 2013 ގަ އެވެ.