10 ޖުލައި 2019 - 09:20
ރައްޔިތުންގެ މަޖިލިހުގެ ކާށިދޫ ދާއިރާގެ އަމިއްލަ މެމްބަރު އަބްދުﷲ ޖާބިރުގެ ނަން ރިޔާސަތުން އިއްވުމާ ގުޅިގެން މަޖިލިހުގެ ތަޅުން ދޫކުރައްވައި މިއަދު ވަޑައިގެންފި އެވެ.
މިއީ 19 ވަނަ ރައްޔިތުންގެ މަޖިލިސް ފެށުނު ފަހުން ނަން އިއްވި ފުރަތަމަ މެމްބަރެވެ.
ޖަލްސާގައި ޖާބިރު ނިޒާމީ މައްސަލަ ނަންގަވައި، ރިޔާސަތުގައި އިންނެވި މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒު ކުރެއްވީ ސުވާލެކެވެ. ޖާބިރު އެއްސެވީ މަޖިލިހުގެ ރައީސް ކަމުގެ ހުވާ ނަޝީދު ކުރެއްވި ފަހުން "ދައުލަތުގެ ހަޒާނާގެ ތަޅުދަނޑި" ލިބިވަޑައިގަތްތޯ އެވެ. އެ ސުވާލާ ގުޅިގެން ނަޝީދު ވަނީ އެއީ ނިޒާމީ މައްސަލައެއް ނޫން ކަމަށް ނިންމަވައިފަ އެވެ.
ނަމަވެސް ޖާބިރު ގެންދެވީ މަޖިލިހުގެ ތަޅުމުގައި އަޑު ގަދަކުރައްވަމުންނެވެ. އަދި ދައުލަތުގެ ހަޒާނާގެ ތަޅުދަނޑި އޮތް ތަން ނަޝީދަށް ރަނގަޅަށް އެނގިވަޑައިގަންނަވާނެ ކަމަށް އޭނާ ވިދާޅުވި އެވެ. ދައުލަތުގެ ހަޒާނާގައި ހުރީ ކިހާ ވަރެއްތޯ ޖާބިރު ވަނީ ނަޝީދު އަރިހުން ސުވާލު ކުރައްވައިފަ އެވެ.
ޖާބިރު އެގޮތަށް ތަކުރާރުކޮށް ވިދާޅުވާން ފެއްޓެވުމުން، ނަޝީދު ވަނީ ކޯފާ އިސްކުރައްވައިފަ އެވެ. އަދި ނަން އިއްވަން ޖެހިދާނެ ކަމަށް ވިދާޅުވެ، ޖާބިރު އިށީންނެވުމަށް އެދިވަޑައިގަތެވެ. ނަޝީދު ކޯފާ އިސްކުރެއްވުމާ ގުޅިގެން އިރުކޮޅެއް ވަންދެން ޖާބިރު އިށީނދެގެން އިންނެވި އެވެ.
އެކަމަކު އަލުން ޖާބިރު ތެދުވެވަޑައިގެން އަޑުގަދަ ކުރައްވަން ފެއްޓެވުމުން އޭނާގެ ނަން އިއްވަން ޖެހިދާނެ ކަމަށް އަނެއްކާވެސް ނަޝީދު އިންޒާރު ދެއްވި އެވެ. އަދި ޖާބިރު ވަނީ "ނަން އިއްވަވާ" މިހެން ވިދާޅުވެފަ އެވެ. އެ ރުޅިވެރިކަމުގައި، ނަޝީދަކީ ޑިމޮކްރަޓިކް ބޭފުޅެއް ނޫން ކަމަށް ވެސް ޖާބިރު ވިދާޅުވި އެވެ.
ރިޔާސަތުން ޖާބިރުގެ ނަން އިއްވެވުމާ ގުޅިގެން އޭނާ ވަނީ ތަޅުން ދޫކުރައްވައި ވަޑައިގެންފަ އެވެ.
މަޖިލިހުގެ ގަވައިދުގައިވާ ގޮތުން ޖާބިރުގެ ނަން އިއްވުމާ ގުޅިގެން މިއަދުގެ ޖަލްސާގެ ބާކީ އޮތް ބައިގައި ބައިވެރިވެވަޑައެއް ނުގެންނެވޭނެ އެވެ. އެކަމަކު ކޮމިޓީތަކުގައި ޖާބިރަށް ބައިވެރިވެވަވަޑައިގެންނެވޭނެ އެވެ.
ނަޝީދު ފަހުން ވިދާޅުވީ ޖާބިރު ކޯފާ އިސްކުރެއްވި ސަބަބެއް އެނގިވަޑައިނުގަންނަވާ ކަމަށެވެ. ޖާބިރު ތަޅުން ދޫކުރައްވައި ވަޑައިގަތީ އިދާރީ މޭޒު ދޮށަށް ވަޑައިގެން ނަޝީދާ ދިމާލަށް އެއްޗެއް ވެސް ވިދާޅުވުމަށް ފަހު އެވެ. އެކަމަކު އަޑު ކަނޑާލާފައި ހުރުމުން ޖާބިރު ވިދާޅުވި އެއްޗެއް ސާފެއް ނުވެ އެވެ.
މިއަދުގެ ޖަލްސާގައި ފުރަތަމަ ކަމަކަށް އޮތީ އޭސީސީއަށް ކުރިމަތިލި މީހުންގެ ނަންތައް ހުށައެޅުމެވެ. އެކަމަކު ޖާބިރު ނިޒާމީ މައްސަލަ ނެންގެވީ އޭގެ ކުރިންނެވެ.