12 ޖުލައި 2019 - 21:06
ކޮލޮމްބޯ އިން ބަންގްލަދޭޝްގެ ޑާކާ އަށް މިއަދު ހެނދުނު ދަތުރުކުރި ސްރީ ލަންކަން އެއާލައިންސްގެ ފްލައިޓުގައި ތިބި މީހުންގެ ތެރެއިން އެ ދަތުރު ހާއްސަވާނެ އެކަކީ ޑރ. ހިޝާމް އަލީ ޒަކީ އެވެ. އެއީ އޭނާގެ އިންޓާންޝިޕް ފެށުމަށް ކުރާ ދަތުރަށްވުމުން ކުރާ އުއްމީދުތައް ވެސް ބޮޑެވެ. ތިން ގަޑިއިރުގެ އެ ދަތުރު ނިމެން ގަޑިއިރަކަށްވެފައި ވަނިކޮށް ބޯޓުގެ ކްރޫން ކުއްލިއަކަށް އެދުނީ އެހީތެރިކަމަކަށެވެ.
"އެނައުންސްމަންޓެއް އައީ ސިއްހީ ދާއިރާގައި އުޅޭ މީހެއް، ނަރުހެއް ވިއަސް ޑޮކްޓަރެއް ވިއަސް ވަރަށް އަވަހަށް ބޭނުންވާ ކަމަށް ބުނެ، ދެ ތިން ފަހަރު ބުނިފަހުން އަޅުގަނޑު ގޮސް ބުނީ މިއީ އިންޓާނެކޭ. އެމީހުން ބުނީ މައްސަލައެއް ނެތޭ،" ހިޝާމް، 27، ބުންޏެވެ.
އޭނާ ވަނީ އެ ފްލައިޓުގައި ފިޓްޖެހި އެއްވެސް ހަރަކާތެއް ނުކޮށް އޮތް ފިރިހެނަކަށް އެހީތެރިކަން ދީފަ އެވެ. ފަރުވާ ދޭން ފެށުމަށް ފަހު ވިންދު ހުރިތޯ އަދި ނޭވާ ލަމުންދޭތޯ ބެލި އެވެ. ދެން އޭނާ މަސައްކަތްކުރީ އޭނާ ހޭއަރާތޯ އެވެ.
ހިޝާމް ބުނީ މޫނުމަތީގައި ޖަހާލުމުން އޭނާ ލޯ ހުޅުވާލި ކަމަށެވެ. އެއަށްފަހު އަނގަ ވެސް ކުޑަކޮށް އެއް ފަރާތަށް ދަމާލި އެވެ. އެމީހާގެ ހަށިގަނޑު ގަދައަށް ފިނިވުމުން އޭނާގެ ގައިގައި ރަޖާ އަޅައި ދަތުރު ނިމެންދެން މަޑުކުރި އެވެ. އަދި ސިކުނޑީގެ ގެއްލުމެއް ލިބިފައިވޭތޯ ބެލިއިރު އެކަހަލަ ކަމެއް ވެސް ނެތެވެ.
މިއީ، މިދިޔަ މަހުގެ 13 ވަނަ ދުވަހު ބަންގްލަދޭޝްގެ ސައިންސް އެންޑް ޓެކްނޮލޮޖީ ޔުނިވާސިޓީން އެމްބީބީއެސް ނިންމި ޒުވާނާ ބެލި ފުރަތަމަ ބަލި މީހާ އެވެ. އަންނަ އަންގާރަ ދުވަހު ފަށާ އިންޓާންޝިޕަށް ފަހު އޭނާ ދެން ޚިދުމަތް ކުރާނީ ރާއްޖޭގަ އެވެ. އޭނާ އިންޓާންޝިޕް ފުރިހަމަ ކުރާނީ ވެސް އެ ޔުނިވާސީޓީގެ ހޮސްޕިޓަލުގަ އެވެ. އެއީ ބަންގްބަންދު މެމޯރިއަލް ހޮސްޕިޓަލެވެ.
"އެކަހަލަ ހާދިސާތަކަށް ތައްޔާރުވެފައި ހުރީ. އަބަދު ވެސް އެފަދަ ކަމެއް ހިނގާފާނެ ކަމަށް. އެހެންވެ އެކަމަށް ފަރުވާދެވުނީ،" ހިޝާމް ބުންޏެވެ.
ހިޝާމް ކޮށްދިން ޚިދުމަތަށް ތައުރީފްކޮށް ސްރީ ލަންކަން އެއާލައިނުން އޭނާ އަށް ވަނީ ލިޔުމެއް ވެސް ދީފަ އެވެ.