17 ޖުލައި 2019 - 15:36
ތެހެރާން (ޖުލައި 17) - ހޮރްމޫޒް ކަނޑުއޮޅީގައި ހާލުގައި ޖެހިފައި އޮތް ބޭރު ގައުމެއްގެ ތެޔޮ ޓޭންކަރަކަށް އެހީތެރިކަން ފޯރުކޮށްދީފައިވާ ކަމަށް އީރާނުގެ ޚާރިޖީ ވުޒާރާ އިން ބުނެފި އެވެ.
އީރާން ސަރުކާރުން މިހެން ބުނިއިރު ހޮރްމޫޒް ކަނޑުއޮޅިން ދަތުރު ކުރަމުން ދިޔަ ޕެނަމާގައި ރަޖިސްޓްރީކޮށްފައިވާ ޓޭންކަރެއް ގެއްލިގެން އުޅޭ ކަމަށް ވަނީ ރިޕޯޓްކޮށްފަ އެވެ.
ޚާރިޖީ ވުޒާރާގެ ތަރުޖަމާން އައްބާސް މޫސަވީ ވިދާޅުވީ ޓެކްނިކަލް މައްސަލައެއް ދިމާވެގެން އެ ގައުމުގެ ކަނޑުގެ ސަރަހައްދުގައި ހާލުގައި ޖެހިފައި އޮތް ބޭރު ގައުމެއްގެ ޓޭންކަރަކަށް އީރާނުގެ ކަނޑުގެ ސިފައިން އެހީތެރިކަން ފޯރުކޮށްދީފައިވާ ކަމަށެވެ.
"އެހީ އަށް އެދުމުން، ބައިނަލްއަގުވާމީ ގާނޫނުތަކާ އެއްގޮތްވާ ގޮތުގެ މަތިން، އެ ސަރަހައްދަށް އީރާނުގެ ކަނޑުގެ ސިފައިން ގޮސް، އެ ޓޭންކަރު ޓޯކޮށްދީ ރިޕެއާ މަސައްކަތަށް ވަނީ އެހީތެރިކަން ދީފައި،" މޫސަވީ ވިދާޅުވި އެވެ.
ޓޭންކަރުގެ ނަމެއް އޭނާ ވިދާޅެއް ނުވެ އެވެ. އަދި އެ ހާދިސާއާ ގުޅޭ އިތުރު ތަފްސީލެއް ވެސް ނުދެއްވަ އެވެ.
ޓޭންކާޓްރެކާސް އިން ރިޕޯޓްކޮށްފައިވާ ގޮތުގައި ޕެނަމާގައި ރަޖިސްޓްރީކޮށްފައިވާ ރިއާ ނަމަކަށް ކިޔާ ތެޔޮ ބޯޓެއް އީރާނުގެ ސަރަހައްދުން ޖުލައި 14 ވަނަ ދުވަހު ވަނީ ދަތުރުކޮށްފަ އެވެ. އޮންލައިން އޮއިލް-ޓެރެކިން ސާވިސް އިން ބުނި ގޮތުގައި ހޮރްމޫޒް ކަނޑުއޮޅި ހުރަސްކުރަމުން ދަނިކޮށް އެ ޓޭންކަރުގެ އޮޓޮމެޓިކް އައިޑެންޓިފިކޭޝަން ސިސްޓަމުން ސިގްނަލް ފޮނުވުން ވަނީ ހުއްޓާލައިފަ އެވެ.
އީރާނުގެ ތެޔޮ ހުރި ޓޭންކަރެއް މި މަހު ކުރީކޮޅު ވަނީ ޖިބްރޯލްޓާގެ ބޭރުން އިނގިރޭސި ސިފައިންގެ އެހީގައި ހިފަހައްޓައިފަ އެވެ. އީރާނުން ބުނެފައި ވަނީ 2.1 މިލިއަން ފީފާ ތެޔޮ ހުރި ޓޭންކަރު ދޫނުކުރާ ނަމަ އެކަމުގެ ރައްދު ދޭނެ ކަމަށެވެ.