28 ޖުލައި 2019 - 13:27
ޕެރިސް، ފްރާންސް (ޖުލައި 28) - ނަސްލީ ތަފާތުކުރުން ހުއްޓުވުމުގެ ގޮތުން ދުނިޔޭގެ ފުޓްބޯޅައިގެ މައި އިދާރާ ފީފާގެ ދައުރު ބޮޑުކުރަން ނިންމައި "ޒީރޯ ޓޮލަރެންސް" ސިޔާސަތެއް ކަނޑައަޅައިފި އެވެ.
ދާދި ފަހުން ފީފާގެ ސެކްރެޓަރީ ޖެނެރަލް ސެނެގޯލްގެ ފާތިމާ ސަމޫރާ މެމްބަރު އެސޯސިއޭޝަންތަކަށް ފޮނުއްވި ސިޓީއެއްގައި ވަނީ ނަސްލީ ތަފާތުކުރުމުގެ މައްސަލަތައް ވީ އެންމެ ހަރުކަށިކޮށް ބެލުމަށް އަންގައިފަ އެވެ.
"ފީފާ އިން މެމްބަރު އެސޯސިއޭޝަންތަކާއި ލީގު އަދި ކްލަބްތަކަށް އަންގަނީ ރޭސިޒަމް (ނަސްލީ ތަފާތުކުރުން) އާ ދެކޮޅަށް ތުރީ ސްޓެޕް ޕްރޮސީޖާ އެއް ގެންގުޅެން. މިއީ ނަސްލީ ތަފާތުކުރުމުގެ ކަންތައްތައް ފުޓްބޯޅައިން ގެންގުޅޭ ޒީރޯ ޓޮލަރެންސް ޕޮލިސީގެ ފެށުން. މި ފަދަ ކަންތައްތަކަށް އެންމެ ބޮޑު އަދަބުތައް ދޭންޖެހޭ،" ފީފާގެ ސިޓީގައިވެ އެވެ.
ނަސްލީ ތަފާތުކުރުމާ ދެކޮޅަށް ފީފާ އިން ފެށި ތުރީ ސްޓެޕް ޕްރޮސީޖާ އަކީ އެ ފަދަ ކަންތައްތައް ހުއްޓުވަން އަމަލުކުރާނެ ތިން ގޮތެކެވެ. އެ ގޮތުން 2017 ވަނަ އަހަރުގެ ކޮންފަޑެރޭޝަން ކަޕުން ފެށިގެން ފީފާ އިން އަންނަނީ އެ އިދާރާ އިން ބާއްވާ މުބާރާތްތަކުގައި އެ އުސޫލު ދަމަހައްޓަމުންނެވެ. އެ ގޮތުން ނަސްލީ ތަފާތުކުރުމުގެ ކަމެއް މެޗެއްގެ ތެރެއިން ހިނގާ ނަމަ ފުރަތަމަ ކަމަކަށް، މެޗު ހުއްޓާލުމަށް ފަހު ދެން އޮންނާނީ ދަނޑަށް ވަދެ ތިބި ސަޕޯޓަރުން އެކަން ހުއްޓަން ނަސޭހަތްތެރިވުމެވެ. ދެ ވަނަ އަށް، ވަގުތީ ގޮތުން މެޗު ސަސްޕެންޑް ކުރުމެވެ. އެ ވަރުން ވެސް ނުވެއްޖެ ނަމަ ތިން ވަނަ ކަމަކަށް މެޗު ހުއްޓާލުމެވެ.
ފީފާ އިން ވަނީ ނަސްލީ ތަފާތުކުރުމުގެ ކަންތައްތައް ސަޕޯޓަރުންގެ ފަރާތުން ފެނިއްޖެ ނަމަ އެ ސަޕޯޓަރުން ނިސްބަތްވާ ކްލަބަކަށް ފިޔަވަޅު އަޅަން ފަށައިފަ އެވެ. އަދި ނަސްލީ ތަފާތުކުރުމުގެ މައްސަލަތައް ފެންނަ ކުޅުންތެރިންނަށް ވެސް ހަރުކަށި އަދަބުތައް ދެ އެވެ.
ކުރިއަށް އޮތް ސީޒަނުން ފެށިގެން ފީފާ އިން ވަނީ، ގައުމުތަކުގެ ލީގުތަކުގައި ހިނގާ ނަސްލީ ތަފާތުކުރުމުގެ މައްސަލަތައް ވެސް ވަރަށް ގާތުން ބަލަން ނިންމައިފަ އެވެ.
ނަސްލީ ތަފާތުކުރުމާ ދެކޮޅަށް ހިންގާ "ކިކް އިޓް އައުޓް" ކެމްޕެއިން ގްރޫޕުގެ ފަރާތުން ދާދި ފަހުން ނެރުނު ބަޔާނެއްގައި ބުނެފައިވަނީ އިނގިރޭސި ފުޓްބޯޅައިގެ މިދިޔަ ސީޒަނުގައި ނަސްލީ ތަފާތު ކުރުމުގެ މައްސަލަތައް 42 އިންސައްތަ މައްޗަށް ގޮސްފައިވާ ކަމަށެވެ.