30 ޖުލައި 2019 - 10:25
ޕާކް ކޮށްފައި ހުއްޓާ ނެގުމަށް ފަހު، ފުލުހުން އެހެން ޕާކިން ޒޯނެއްގައި ބެހެއްޓި ސައިކަލެއް ގެއްލުނު މައްސަލާގައި ބަދަލުގެ ގޮތުގައި އެ ސައިކަލުގެ އަގު ދައްކަން ދައުލަތުގެ މައްޗަށް ކޮށްފައި އޮތް ހުކުމެއް ހައި ކޯޓުން ބާތިލްކޮށްފި އެވެ.
މީގެ ފަސް އަހަރު ކުރިން، ފެބްރުއަރީ 2014 ސައުދީ އަރަބިއާގެ އޭރުގެ ވަލީ އަހުދު ރާއްޖެ ވަޑައިގަންނަވާތީ ސަލާމަތީ ސަބަބުތަކަށްޓަކައި ފުލުހުންގެ ވަނީ ހުރަވީ ބިލްޑިން ކައިރީގައި ހުރި ސައިކަލްތައް އެތަނުން ނަގައި، ސްޓެލްކޯ ފުރަގަހުގައި އޮންނަ ޕާކިން ޒޯނަކަށް ބަދަލުކޮށްފަ އެވެ. އޭގެ ތެރެއިން އެއް ސައިކަލު އެތަނުގައި ހުއްޓާ ގެއްލުނު މައްސަލާގައި އެ ސައިކަލުގެ ވެރި ފަރާތުން ފުލުހުންނާ ދެކޮޅަށް ދައުވާ ކުރުމުން ސިވިލް ކޯޓުން 2016 ގައި ހުކުމްކުރީ ސައިކަލުގެ އަސްލު އަގަށްވާ 82،000ރ. ދައުލަތުން ދޭން ޖެހޭނެ ކަމަށެވެ.
އެ މައްސަލަ ދައުލަތުން އިސްތިއުނާފް ކުރުމުން ހައި ކޯޓުން މިއަދު ހުކުމްކުރީ އެ ސައިކަލު ގެއްލުނު މައްސަލާގައި ފުލުހުން ބަދަލު ދޭން ނުޖެހޭނެ ކަމަށާއި އެހެންވެ، ދަށު ކޯޓުގެ ހުކުމް ބާތިލްކުރާ ކަމަށެވެ.
ހައި ކޯޓުގެ ހުކުމުގައިވަނީ ފުލުހުން ޓޯ ކުރާ އުޅަނދުތައް ރަނގަޅަށް ބަލަހައްޓަން ފުލުހުންގެ މައްޗަށް ގަވާއިދު ލާޒިމް ކުރިޔަސް، އެ ސައިކަލު އެހެން ތަނަކަށް ގެންދިޔައީ ގަވާއިދާ އެއްގޮތަށް ޕާކް ކޮށްފައި ހުއްޓާ ކަމަށްވާތީ އެ ސައިކަލު ގެންދިޔައީ ޓޯ ކޮށްގެން ކަމަށް ބެލެވެން ނެތް ކަމަށެވެ. އަދި އެކި މުނާސަބަތުތަކާ ގުޅިގެން ބައެއް އުޅަނދުތައް އެހެން ޕާކިން ޒޯންތަކަށް ބަދަލުކުރަނީ ފުލުހުންގެ ބެލުމުގެ ދަށުން ނޫން ކަމަށާއި އެހެންވެ، އާންމު ޕާކިން ޒޯނަކަށް އުޅަނދެއް ބަދަލު ކުރުމަށް ފަހު އެ އުޅަނދެއް ބެލެހެއްޓުގެ ޒިންމާ ފުލުހުންގެ މައްޗަށް ލާޒިމް ކުރެވެން ނެތް ކަމަށެވެ.
އެ ސައިކަލު ގެއްލުނީ ފުލުހުން ގާނޫނާ ޚިލާފަށް ކުރިކަމެއްގެ ސަބަބުން ކަން ސާބިތުކޮށް ދެވިފައި ނެތް ކަމަށާއި އަދި ސައިކަލު ގެއްލުނީ އާންމު ޕާކިން ޒޯނެއްގައި ހުއްޓާ ކަމަށްވާތީ އެ ސައިކަލު ގެއްލުނު މައްސަލާގައި ފުލުހުން ބަދަލު ދޭން ނުޖެހޭނެ ކަމަށް އެ ހުކުމުގައިވެ އެވެ.
އެ ކަންކަން ފާހަގަކޮށް، މައްސަލަ ބެއްލެވި ތިން ފަނޑިޔާރުންގެ އިއްތިފާގުން ވަނީ ދަށު ކޯޓުގެ ހުކުމް ބާތިލްކޮށްފަ އެވެ.
އެ މައްސަލަ ބެއްލެވީ ފަނޑިޔާރު މުހައްމަދު ފައިސަލާއި ފަނޑިޔާރު އަލީ ސަމީރުގެ އިތުރުން ފަނޑިޔާރު އަބްދުﷲ ހަމީދެވެ. ރިޔާސަތު ބެލެހެއްޓެވީ ފަނޑިޔާރު ފައިސަލް އެވެ.