03 އޯގަސްޓް 2019 - 20:43
އިންޑިއާގައި މިހާރު ކުރިޔަށްދާ އިންޓަނޭޝަން ކަޕް އޮފް ޖޯއީ ޔޫތު މުބާރާތުގެ ސެމީ ފައިނަލުން ރާއްޖޭގެ މާޒިޔާގެ 14 އަހަރުން ދަށުގެ ޓީމު ފުރުސަތު ހޯދައިފި އެވެ.
މުބާރާތުގެ ސެމީން މާޒިޔާ ފުރުސަތު ހޯދީ ކުޅުނު ތިން މެޗުގެ ތެރެއިން ދެ މެޗު ކާމިޔާބު ކޮށްގެންނެވެ. ފުރަތަމަ މެޗުން ރިލަޔަންސް އެކެޑަމީ އަތުން 2-1 އިން މާޒިޔާ ބަލިވި ނަމަވެސް ކުޅުނު ދެ ވަނަ މެޗުން ވަނީ ފަސްޓް ކިކް އެސްއެސްއޭ އަތުން 6-0 އިން މޮޅުވެފަ އެވެ. މި މެޗުގައި މާޒިޔާގެ ގޯލުތައް ޖެހީ ޔޫޝައު އާއި އަޔާން، ކޮންމެ ކުޅުންތެރިޔަކު ދެ ގޯލުގެ އިތުރުން އުވައިޝް އާއި ލިއާޒް އެވެ.
މާޒިޔާ އަށް ސެމީގެ ޖާގަ ކަށަވަރުވީ މިއަދު ކުޅެން އޮތް ގްރޫޕުގެ ފަހު މެޗަށް ސްޕޯޓްޒް ނޭޝަން ހާޒިރުނުވުމުންނެވެ. ސްޕޯޓްޒް ހާޒިރުނުވުމުން މުބާރާތް އިންތިޒާމުކުރާ ފަރާތުން ވަނީ މާޒިޔާ 2-0 އިން މޮޅުވި ކަމަށް ނިންމައިފަ އެވެ. މާދަމާ ކުޅޭ ސެމީ ފައިނަލުގައި މާޒިޔާ ނުކުންނާނީ އިންޑިއާގެ ސުޕަ ލީގުގައި ކުޅޭ ވަރުގަދަ ބާރެއް ކަމަށްވާ ޗެންނާއިންގެ ޓީމާ ދެކޮޅަށެވެ.
މާޒިޔާ އަކީ މި ފަދަ މުބާރާތެއްގައި ބައިވެރިވި ރާއްޖޭގެ ފުރަތަމަ ޑިވިޝަނަށް ނިސްބަތްވާ ފުރަތަމަ ކްލަބް އެވެ. ޓީމުގެ ކޯޗު މުހައްމަދު އާރިފް (އާރިއްޕެ) ބުނީ މި މުބާރާތުގެ ސަބަބުން ކުޅުންތެރިންނަށް ގިނަ ކަންތައްތަކެއް ދަސްވެ، ކުރިއަށް އޮތް އެފްއޭއެމް ޔޫތު ލީގަށް ރަނގަޅަށް ތައްޔާރުވެވޭނެ ކަމަށެވެ.
މި މުބާރާތަކީ މީގެ ތިން އަހަރު ކުރިން އިންޑިއާގައި ހުނަރުވެރި ޒުވާން ކުޅުންތެރިންނަށް ފުރުސަތު އިތުރުކުރުމުގެ ގޮތުން ފެށި މުބާރާތެކެވެ. މީގެ ކުރިން އިންޑިއާގެ ސުޕަ ލީގުގެ ބެންގަލޫރު އެފްސީ އާއި ނޯތް އީސްޓް ޔުނައިޓެޑް ފަދަ ޓީމުތަށް ކުޅުނު މި މުބާރާތުގައި އިންޑިއާގެ ސުޕަ ލީގުގެ އިތުރުން އައި ލީގާއި އިންޑިއާގައި ހިމެނޭ ބައިނަލްއަގުވާމީ އެކެޑަމީތަކުގެ ޓީމުތައް ވެސް ވާދަކުރެ އެވެ.
އިންޑިއާ އިން ފުޓްބޯޅައިގެ އެންމެ އުހަށް ދިއުމުގެ އަމާޒުގައި އެ ގައުމުގެ ފުޓްބޯޅައިގެ ގްރާސްރޫޓް ވަރުގަދަ ކުރުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ދުނިޔޭގެ ނިސްބަތުން ނަން މަޝްހޫރު ގިނަ ފުޓްބޯޅަ ޓީމުތަކަކާ ގުޅިގެން އިންޑިއާގައި އެކެޑަމީ ހިންގަ އެވެ. މީގެ ތެރޭގައި އޭސީ މިލާނާއި ލިވަޕޫލާއި ބެންފީކާ އަދި ބަޔާން މިއުނިކާ ގުޅިގެން ހިންގާ އެކެޑަމީތަކެއް ހިމެނެ އެވެ. އަދި ދާދި ފަހުން ޖަރުމަނުގެ ތަޖުރިބާކާރު ގޯލްކީޕަރު އޮލިވާ ހާންގެ ގޯލްކީޕިން އެކެޑަމީ އެއް ވެސް ވަނީ ހުޅުވައިފަ އެވެ.