29 އޯގަސްޓް 2019 - 08:09
ބައްޕަ ޑައިރެކްޓްކުރާ ފިލްމެއްގައި މަސައްކަތްކުރަން ފުރަތަމަ ޖެހިލުންވި ކަމަށާއި އެންމެ ބޮޑަށް ހާސްވީ ބައްޕަގެ ކުރިމަތީގައި މަންޒަރުތަކަށް އެޕްރޯޗްކުރަން ލަދު ގަތުމުން ކަމަށް، އަންނަ މަހު ރިލިޒްކުރާ ފިލްމު "ޕަލް ލަޕް ދިލް ކޭ ޕާސް" އިން ބޮލީވުޑަށް ތައާރަފުވާ ސަނީ ޑިއޯލްގެ ދޮށީ ފިރިހެން ދަރިފުޅު ކަރަން ޑިއޯލް ބުނެފި އެވެ.
އަންނަ މަހުގެ 20 ގައި ރިލީޒްކުރާ ފިލްމުގެ ޕްރޮމޯޝަނަލް އިވެންޓެއްގައި، 28 އަހަރުގެ އެކްޓަރު ބުނީ ބައްޕައާ އޮންނަ ގުޅުން އަބަދުވެސް ވަރަށް ގާތް ކަމަށެވެ.
"އެކަމަކު ހިތަށް އެރި އަހަރެންގެ ފުރަތަމަ ފިލްމު ބައްޕަ ޑައިރެކްޓްކުރާ އިރު ކިހިނެއްބާއޭ ވާނީ. މަންޒަރުތަކަށް އެޕްރޯޗްކުރާ އިރު، ގިނަ ފަހަރަށް ތަންކޮޅެއް ލޯބީގެ ގައިގޯޅި މަންޒަރެއް ނަމަ ވަރަށް އުނދަގޫވި،" ދަރުމެންދުރާގެ ކާފަ ދަރިންގެ ތެރެއިން ފުރަތަމަ ބޮލީވުޑަށް ނުކުންނަ އެކްޓަރު ބުންޏެވެ.
ކަރަން ބުނި ގޮތުގައި ބައްޕަ އަކީ ވަރަށް ރަނގަޅަށް ސީންތައް ކިޔައިދޭ ޑައިރެކްޓަރެކެވެ. އަދި ސްކްރިޕްޓްގައި އޮންނަ ގޮތަށް އޭނާ ވެސް ކޮންމެ މަންޒަރެއް ގެނެސްދޭން މަސައްކަތްކޮށްފައި ހުންނާނެ ކަމަށް ބުންޏެވެ.
"އަހަރެން ބުނާނީ ބައްޕަ ޑައިރެކްޓްކުރި ފިލްމަކުން އެކްޓިން އަށް ނުކުތުމަށް ވުރެ ބޮޑު އުފަލެއް ނެތޭ. ވަރަށް ހިތްހަމަޖެހޭ ފިލްމާ ދޭތެރޭގައި،" ކަރަން ބުންޏެވެ. "އަހަރެން ވަރަށް އުންމީދުކުރަން ބެލުންތެރިންނަށް ވަރަށް ކަމުދާ ކަހަލަ ފިލްމަކަށް ޕަލް ޕަލް ދިލް ކޭ ޕާސް ވާނެ ކަމަށް."
މިއީ އެޑްވެންޗަރަސް ލަވް ސްޓޯރީއެކެވެ. ކަރަންއާ އެކު ފިލްމުގެ ބަތަލާގެ ރޯލުން ފެނިގެން ދާނީ އަލަށް ތައާރަފުވާ ސެހެރް ބާމްބާ އެވެ.
"ޕަލް ޕަލް ދިލް ކޭ ޕާސް" ރިލީޒްކުރާ ދުވަސް ކައިރިވަމުން އަންނަ އިރު ސަނީ ވެސް ވަނީ އޭނާ އަށް ބެލުންތެރިން ދިން ލޯތްބާއި ސަޕޯޓް ދަރިފުޅަށް ބެލުންތެރިން ދޭނެ ކަމަށް އުންމީދުކުރާ ކަމަށް ބުނެފަ އެވެ.
ބައެއް ރިޕޯޓްތައް ބުނާ ގޮތުން ކަރަން އަށް މިހާރު ވަނީ ދެވަނަ ފިލްމަކުން ވެސް ފުރުސަތު ލިބިފަ އެވެ. އެއީ ޑައިރެކްޓަރު އިންދަރު ކުމާރުގެ ފިލްމަކުންނެވެ.