29 ސެޕްޓެމްބަރ 2016 - 08:42
ރާއްޖޭގެ ހާލަތު ގޯސްވެފައިވާ މިންވަރަށް ބަލައި އެކަށީގެންވާ ފިޔަވަޅުތަކެއް ކޮމަންވެލްތު މިނިސްޓީރިއަލް އެކަޝަން ގްރޫޕް (ސީމެގު) އިން އަޅާފައި ނުވާ ކަމަށް ބުނެ އަހަރު ނިމުމުގެ ކުރިން އަލުން ބައްދަލުކޮށް ހަރުކަށި ފިޔަވަޅުތަކެއް އެޅުމަށް ކޮމަންވެލްތު ހިއުމަން ރައިޓްސް އިނީޝިއޭޓިވް (ސީއެޗްއާރުއައި) އިން އިއްޔެ ގޮވާލައިފިއެވެ.
ސީމެގުގެ ރަސްމީ އެޖެންޑާގައި ރާއްޖެ ހިމެނުމާ ގުޅިގެން ސީއެޗްއާރުއައިން ނެރުނު ބަޔާނެއްގައި ބުނީ އެ ފިޔަވަޅު އަޅަންވީ ވަގުތު ފާއިތުވެފައިވާ ކަމަށެވެ. މިހާރު މިއީ އެ އަށް ވުރެ ހަރުކަށި ފިޔަވަޅުތަކެއް އަޅަންޖެހިފައިވާ ދަނޑިވަޅެއް ކަަމަށާއި މިދިޔަ ހުކުރު ދުވަހުގެ ބައްދަލުވުމުގައި ކޮމަންވެލްތުން ރާއްޖެ ސަސްޕެންޑު ކުރަން ޖެހޭނެ ކަމަށް އެ ޖަމާއަތުން ބުންޏެވެ.
"ހާލަތު ބަލައި ދިރާސާކުރުމާ އެކު އުސޫލުތަކާ ހިލާފުވާ ނަމަ ފިޔަވަޅު ނޭޅޭ ނަމަ، ޑިމޮކްރެޓިކް ހަމަތަކާއި އުސޫލުތައް ދެމެހެއްޓުމުގައި އެ އިދާރާ [ސީމެގް]ގެ ދައުރު ހަރުދަނާއެއް ނުވާނެ އެވެ،" އިންސާނީ ހައްގުތަކާއި ޑިމޮކްރެސީއާ ގުޅުން ހުރި ކަންކަމުގައި ކޮމަންވެލްތަށް ލަފާ ދިނުމުގެ އިހުތިޔާރު އޮންނަ އަމިއްލަ ޖަމާއަތުން ނެރުނު ބަޔާނުގައިވެ އެވެ.
އެހެންވެ، އަންނަ އަހަރުގެ މާޗު މަހު ބާއްވާ ސީމެގުގެ ރަސްމީ ބައްދަލުވުމުގެ ކުރިން، މި އަހަރުގެ ތެރޭގައި ކުއްލި ބައްދަލުުވުމެއް ބާއްވައި ރާއްޖެއާ މެދު އެޅޭނެ ފިޔަވަޅުތައް ބަލަން ސީއެޗްއާރުއައިން ސީމެގަށް ގޮވާލި އެވެ.
ސީމެގުން ވަނީ ރަސްމީ އެޖެންޑާގައި ހިމެނުމުގެ އިތުރަށް، ދެން އިސްލާހު ނުވެއްޖެ ނަމަ ކޮމަންވެލްތުން ރާއްޖެ ސަސްޕެންޑް ކުރަން ވިސްނާނެ ކަމުގެ އިންޒާރު ދީފަ އެވެ. އެކަމަކު، ކުރިން ހުށަހެޅި އެއްވެސް ކަމެއް އިސްލާހުކޮށްފައި ނުވާ ކަމަށް ބުނެ، ކޮމަންވެލްތުން ރާއްޖެ ސަސްޕެންޑް ކުރަން އެ ބައްދަލުވުމުން ނިންމަން ސީއެޗްއާރުއައިން ހުށަހެޅި އެވެ. އިދިކޮޅު ފަރާތްތަކުން ވެސް މަސައްކަތް ކުރީ އެ ދުވަހުގެ ބައްދަލުވުމުގައި ރާއްޖެއާ ދެކޮޅަށް އެފަދަ ހަރުކަށި ފިޔަވަޅެއް އެޅޭތޯ އެވެ.
ސީއެޗްއާރުއައިން ވެސް ބުނީ ސީމެގުން ގޮވާލާފައިވާ ގޮތަށް ސިޔާސީ މަޝްރަހު ހަމައަކަށް އަޅުވަން މަޝްވަރާތައް ފަށަން ޖެހޭ ކަމަށެވެ. އެކަމަކު، އެ މަޝްވަރާތަކުގެ ތެރެއިން ސިޔާސީ ހައްލެއް ހޯދޭނީ ބަންދުކޮށްފައިވާ ސިޔާސީ ބޭފުޅުން ދޫކޮށްލައި ޕާޓީތަކުން ހިޔާރުކުރާ މަންދޫބުންނަށް ބައިވެރިވެވޭ ގޮތް ހަދައިގެންކަން އެ ޖަމާއަތުން ފާހަގަކުރި އެވެ.
"... ރާއްޖޭގެ ސިޔާސީ މައިދާނުގައި ހަރަކާތްތެރިވާ ހުރިހާ ފަރާތްތަކަށް ބޭރުން ޕްރެޝަރު ނުކޮށް، 2018 ގައި ހުރިހާ ފަރާތްތަކަށް ބައިވެރިވެވޭ އަދި ބަލައިގަނެވޭ އިންތިހާބެއް ބޭއްވިދާނެ ކަމާ މެދު ބޮޑެތި ސުވާލުތަކެއް އުފެދެ އެވެ،" ބަޔާނުގައިވެ އެވެ.
ރާއްޖޭގެ ހާލަތާ މެދު ސީއެޗްއާރުއައިން އަނެއްކާ ވެސް ކަންބޮޑުވުން ފާޅުކޮށް، ހަރުކަށި ފިޔަވަޅުތަކެއް އަޅަން ގޮވާލިއިރު، ކޮމަންވެލްތުގެ މަންދޫބު ވިލީ މުޓުންގާ ވެސް ވަނީ ދިވެހި ސަރުކާރާއި ޝަރުއީ ނިޒާމުގެ ސައްހަކަން ގެއްލެމުން ދާ ކަމަށް ވިދާޅުވެ، ރާއްޖެ އަށް ޕްރެޝަރު ކުރަން އެޅޭނެ ހުރިހާ ފިޔަވަޅުތަކެއް ބަލަން ސީމެގުގައި އެދިވަޑައިގެންފަ އެވެ.
މިދިޔަ ފެބްރުއަރީ މަހު ބޭއްވި ސީމެގުގެ ބައްދަލުވުމަށް ފަހު، ހަ ކަމެއް އިސްލާހު ކުރަން ސީމެގުން ރާއްޖެ އަށް އެންގި އެވެ. އޭގެ ތެރޭގައި ސިޔާސީ ހުރިހާ ފަރާތްތަކަށް ބައިވެރިވޭ ގޮތަށް، ވަކި މަގުސަދުތަކަކާއި ވަގުތުތަކެއް ކަނޑައަޅައިގެން މަޝްވަރާތައް އަލުން ފެށުމާއި ޖަލަށް ލާފައިވާ ސިޔާސީ ބޭފުޅުންނަށް އެނބުރި ސިޔާސީ މައިދާނަށް ވަޑައިގެންނެވޭނެ ގޮތަށް ދޫކޮށްލުމާއި ސިޔާސީ ބޭނުންތަކަށް ޓެރަރިޒަމް ގާނޫނުގެ ނާޖާއިޒު ފައިދާ ނެގުން ހުއްޓާލުމާއި ޝަރުއީ ދާއިރާގެ މިނިވަންކަމާއި އިންސާފުވެރިކަން ކަށަވަރުކުރުމާއި މަދަނީ ޖަމިއްޔާތަކަށް ހަރަކާތްތެރިވެވޭނެ ފަދަ މިނިވަން މާހައުލެއް ގާއިމުކޮށްދިނުން ހިމެނެ އެވެ. މީގެ އިތުރުން، ދައުލަތުގެ ތިން ބާރު ވަކިވެފައި އޮތް އޮތުން ކަށަވަރުކޮށްދޭން ވެސް ސަރުކާރަށް އެންގި އެވެ.
ރަސްމީ އެޖެންޑާގައި ހިމަނައި ސަސްޕެންޑު ކުރާނެ ކަމުގެ އިންޒާރު ދޭން ޖެހުނީ، ސީމެގުން ބުނެފައިވާ ގޮތުގައި، އެ ކަންކަން އިސްލާހު ކުރަން އެކަށީގެންވާ މަސައްކަތެއް ކޮށްފައި ނުވާތީ އެވެ.
ސީމެގުގެ ރަސްމީ އެޖެންޑާގައި ރާއްޖެ ހިމެނި މިއީ ތިންވަނަ ފަހަރެވެ. މީގެ ކުރިން އެޖެންޑާ އަށް ރާއްޖެ ލީ ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވުމަށް ފަހު ހިނގި ހަމަނުޖެހުންތަކާ ގުޅިގެންނާއި މިދިޔަ ރިޔާސީ އިންތިހާބު ދިގުލައިގެން ގޮސް ރިޔާސީ ދައުރު ހަމަވިއިރު ވެސް ރައީސަކު އިންތިހާބު ނުކުރެވުމުންނެވެ.