06 އޮކްޓޯބަރ 2016 - 01:31
އަބޫޖާ (އޮކްޓޯބަރު 5) - ނައިޖީރިއާގެ ރައީސް ދަތުރު ކުރެއްވުމަށް ގަނެފައިވާ 10 ރިޔާސީ ޖެޓުގެ ތެރޭން ދެ ބޯޓު ވިއްކާލަން ރައީސް މުހައްމަދު ބުހާރީ ނިންމަވައިފި އެވެ.
ރިޔާސީ ތަރުޖަމާނަކު ވިދާޅުވީ އަގު ބޮޑު އެގްޒެކެޓިވް ޖެޓްތައް ވިއްކާލަނީ ސަރުކާރުގެ ޚަރަދުތައް ކުޑަ ކުރުމުގެ ގޮތުން ކަމަށެވެ. ރިޔާސީ ޖެޓުތަކުގެ ތެރޭން ބައެއް ބޯޓު ވަނީ ނައިޖީރިއާގެ ވައިގެ ސިފައިންނާ ހަވާލު ކުރަން ނިންމާފައި ކަމަށް ވެސް ތަރުޖަމާން ވިދާޅުވި އެވެ.
އިގްތިސާދީ ގޮތުން ހީނަރުކަން ކުރިމަތިވެފައިވާ ނައިޖީރިއާގެ ރައީސްކަމަށް މިދިޔަ އަހަރު ވަޑައިގަތުމަށް ބުހާރީ ކުރެއްވި ކެމްޕޭނުގައި ވަނީ ޚަރަދު ކުޑަ ކުރުމަށް ވައުދުވެޑައިގެންފަ އެވެ. ނައިޖީރިއާ އަށް ލިބޭ އާމްދަނީގެ 70 ޕަސެންޓް ވިއްސާ ކުރަނީ ތެޔޮ ވިއްކައިގެންނެވެ. ދުނިޔޭގެ ބާޒާރުގައި ތެލުގެ އަގު ދަށްވުމުން އެކަމުގެ އަސަރު ވަނީ ހުޅަނގު އެފްރިކާގެ ގައުމަށް ވެސް ކޮށްފަ އެވެ.
ވެރިން ދަތުރު ކުރުމަށް ޚާއްސަ މަތިންދާ ބޯޓެއް ކޮންމެ ގައުމަކުން ބޭނުމެއް ނުކުރެ އެވެ. ޖީ20 ގައި ހިމެނޭ އިނގިރޭސި ވިލާތުގެ ބޮޑު ވަޒީރު ދަތުރު ކުރެއްވުމަށް ޚާއްސަ ބޯޓެއް ހޯދީ ޖުލައި މަހު އެވެ. އެކަމަކު އެފްރިކާގެ ގިނަ ގައުމުތަކުގައި ވެރިންނަށް ޚާއްސަ ޖެޓުތައް ވަނީ ހޯދައިފަ އެވެ. ދެކުނު އެފްރިކާގެ ރައީސް ޖެކޮބް ޒޫމާ ދަތުރު ކުރެއްވުމަށް 185 މިލިއަން ޕައުންޑުގެ ޖެޓެއް ހޯދަން އުޅުމުން މިދިޔަ އަހަރު ވަނީ ވަރަށް ބޮޑަށް ފާޑު ކިޔުންތައް އިތުރުވެފަ އެވެ. އަދި ސްވާޒިލެންޑުގެ ރަސްގެފާނު ދެ ވަނަ ޕްރައިވެޓް ޖެޓެއް ހޯއްދަވަން އުޅުމުން ވެސް ވަނީ ފާޑު ކިޔުންތައް އަމާޒުވެފަ އެވެ. އެކަމަކު މަލާވީގެ ކުރީގެ ރައީސް ޖޯއިސް ބަންޑާ 2013 ވަނަ އަހަރު ވަނީ ރިޔާސީ ޖެޓް ވިއްކަވާލައްވައިފަ އެވެ.