10 އޮކްޓޯބަރ 2016 - 12:43
ނިއުޔޯކް، ޔުނައިޓެޑް ސްޓޭޓްސް (އޮކްޓޫބަރު 10) - ޗެލްސީ އަށް ކޯޗުކޮށްދިނުމަކީ ހުވަފެނެއް ކަމަށް އެ ޓީމަށް ކުރިން ކުޅުނު އިންގްލެންޑުގެ މިޑްފީލްޑަރު ފްރޭންކް ލަމްޕާޑް ބުނެފި އެވެ.
އުމުރުން 38 އަހަރުގެ ލަމްޕާޑް ވަނީ 2001 އިން 2014 ވަނަ އަހަރުގެ ނިޔަލަށް ކުޅެފަ އެވެ. އޭނާ ވަނީ ޗެލްސީ އަށް ކުޅެދިން 648 މެޗުން 211 ލަނޑު ޖަހައިފަ އެވެ. ލަމްޕާޑަކީ ޗެލްސީ އަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ.
ޗެލްސީ ދޫކޮށް ހިލޭ ޓްރާންސްފާއެއްގައި ނިއުޔޯކް ސިޓީ އަށް ބަދަލުވުމުގެ ކުރިން ލަމްޕާޑް ވަނީ ލޯން އެއްބަސްވުމެއްގެ ދަށުން މެންޗެސްޓާ ސިޓީ އަށް ކުޅެފަ އެވެ.
"އަހަރެން ޗެލްސީ ދޫކޮށްލީ ކުޅެން ބޭނުންވާތީ. ކްލަބް ދެކެ ހިތްހަމަނުޖެހުމެއް އޮވެގެނެއް ނޫން. ކޮންމެ ކްލަބެއްގައި ހުއްޓަސް އަހަރެން ފާހަގަވާނީ ޗެލްސީ މީހެއްގެ ގޮތުގައި،" ސްކައިސްޕޯޓްސް އަށް ދިން އިންޓަވިއުއެއްގައި ލަމްޕާޑް ބުންޏެވެ.
އޭނާ ބުނީ ކުޅުން ހުއްޓާލުމަށް ފަހު ކޯޗިން އަށް ދާން ބޭނުންވާ ކަމަށެވެ.
"ޗެލްސީ އަށް އަދިވެސް ހިދުމަތް ކޮށްދޭން ބޭނުން. ކުޅުން ހުއްޓާލުމަށް ފަހު ކޯޗިން އަށް ދާން ބޭނުން. ކުޅުން ހުއްޓާނުލައި ކޯޗިންގެ ބެޖު ހޯދުމަކީ ފަސޭހަ ކަމެއް ނޫން. އެކަމަކު ކުޅުން ހުއްޓާލުމަށް ފަހު ދެން އޮތީ އެ މަސައްކަތް. ކޯޗިން އަށް ދިއުމުގެ އެންމެ ބޮޑު މަގްސަދަކީ ޗެލްސީ ކޯޗަކަށް ވުން،" ލަމްޕާޑް ބުންޏެވެ.
ނިއުޔޯކާ އެކު ލަމްޕާޑް ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެ އެވެ. ލަމްޕާޑް ބުނީ ކުޅުން ހުއްޓާލުމާ މެދު ގޮތެއް ނިންމާނީ ސީޒަނަށް ފަހު ކަމަށެވެ.