10 އޮކްޓޯބަރ 2016 - 13:39
އަބޫޖާ (އޮކްޓޯބަރު 10) - ކޮރަޕްޝަނަށް ތުހުމަތު ކުރެވޭ ނައިޖީރިއާގެ ސީނިއާ ފަނޑިޔާރުން ބަލާ ފާސް ކުރުމަށް ފަހު އެ މީހުން އަތުން 800،000 ޑޮލަރު ހޯދާފައިވާ ކަމަށް ފުލުހުން ބުނެފި އެވެ.
ނައިޖީރިއާގެ ސެކިއުރިޓީ އެޖެންސީ ޑީއެސްއެސް އިން ބުނީ ފުލުހުން ބަލާ ފާސްކުރުމުގެ އޮޕަރޭޝަން ހިންގުމަށް ފަހު ބައެއް ފަނޑިޔާރުން ހައްޔަރުކޮށްފައިވާ ކަމަށެވެ. ނައިޖީރިއާގެ ބާ އެސޯސިއޭޝަން (އެންބީއޭ) އިން ބުނީ ފަނޑިޔާރުންނާ ދެކޮޅަށް ހިންގާފައި ވަނީ ސިއްރު ފުލުހުން ހިންގާ ޒާތުގެ އޮޕަރޭޝަނެއް ކަމަށެވެ. އަދި ހައްޔަރު ކުރި ފަނޑިޔާރުން ދޫކޮށްލުމަށް ވަނީ ގޮވާލައިފަ އެވެ.
އެންބީއޭގެ ރައީސް އަބޫބަކުރު މުހައްމަދު ނޫސްވެރިންނަށް ވިދާޅުވީ ނައިޖީރިއާގައި އޮތީ އަސްކަރީ ވެރިކަމެއް ނޫން ކަމަށާއި އެ ގޮތަށް ފަނޑިޔާރުން ބަލާ ފާސްކޮށް މުދާ ނުހިފެހެއްޓޭނެ ކަމަށެވެ.
ނައިޖީރިއާގެ ރައީސް ކަމަށް މުހައްމަދު ބުހާރީ ވަޑައިގަތުމަށް ފަހު ވަނީ ކޮރަޕްޝަން ނައްތާލުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ. ކޮރަޕްޝަނުގެ ތުހުމަތުގައި ހައްޔަރުކުރި ސަރުކާރުގެ ސީނިއާ މީހުންގެ މައްސަލަތައް ބަލާ ކޯޓަށް ފޮނުވި ނަމަވެސް ކޯޓާ ހަމައިން އެ މައްސަލަތައް މަޑުޖެހިފައިވާ ކަމަށް ބީބީސީން ވަނީ ބުނެފަ އެވެ.
ޑީއެސްއެސް އިން ބުނީ ފަނޑިޔާރުން އަތުން އެކި އަދަދުން ފައިސާ ފެނިފައިވާ ކަމަށެވެ.
"ބައެއް ފަނޑިޔާރުން އުޅެމުންދާ މުއްސަނދި ދިރިއުޅުން ދިޔައީ މޮނިޓާ ކުރަމުން. އަދި ފަނޑިޔާރުންނާ ބެހޭ ގޮތުން އާއްމުން ކުރާ ޝަކުވާ އާއި އެ މީހުން ރިޝްވަތު ނަގާ ކަމަށް ކުރާ ތުހުމަތުތައް ވެސް ދިޔައީ ބަލަމުން،" ޑީއެސްއެސް އިން ނެރުނު ބަޔާނެއްގައި ބުނެފައިވެ އެވެ.
ޑީއެސްއެސް އިން ބުނީ ކޮރަޕްޝަނުގެ ތުހުމަތުގައި ފައިސާ ހޯދާފައި ވަނީ ސްޕްރީމް ކޯޓާއި ހައި ކޯޓް އަދި އިސްތިއުނާފް ކޯޓުގެ ފަނޑިޔާރުންގެ އަތުން ކަމަށެވެ.