13 އޮކްޓޯބަރ 2016 - 19:17
އިޓަލީގައި ބާއްވާ އެންމެ ބޮޑު ޓޫރިޒަމް ފެއާގައި ރާއްޖެއިން ބައިވެރިވެއްޖެ އެވެ.
މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އިން މިއަދު ނެރުނު ބަޔާނެއްގައި ބުނީ މިއަދުން ފެށިގެން ހޮނިހިރު ދުވަހުގެ ނިޔަލަށް ބާއްވާ "ޓީޓީޖީ އިންކޮންޓްރީ" ފެއާގައި އެ ތަނުގެ އިތުރުން ރާއްޖޭގެ ޓޫރިޒަމްގައި ހަރަކާތްތެރިވާ 18 ކުންފުންޏެއްގެ 30 ބޭފުޅުން ބައިވެރިވެވަޑައިގަންނަވާ ކަމަށެވެ. ދިވެހި ވަފުދުގެ އިސްވެރިއެއްގެ ގޮތުން ހުންނެވީ އެމްއެމްޕީއާރުސީގެ ވަގުތީ މެނޭޖިން ޑިރެކްޓަަރު ހާރިސް މުހައްމަދު ކަމަށް ވެސް ބަޔާނުގައިވެ އެވެ.
އެމްއެމްޕީއާރުސީން ބުނީ ޓީޓީޖީ ފެއާގައި ރާއްޖެ އިޝްތިހާރު ކުރަނީ 64 އަކަމީޓަރު ބޮޑު ސަރަހައްދެއްގައި ބަހައްޓާފައި ހުރި ހަތަރު ސްޓޭންޑެއް މެދުވެރިކޮށް ކަމަށެވެ.
އިޓަލީގެ އުތުރުގައި އޮންނަ ސިޓީއެއް ކަމަށްވާ ރިމިނީގައި ބާއްވާ ޓީޓީޖީ ފެއާ ބޮޑަށް އަމާޒުކޮށްފައިވަނީ ޓޫރިޒަމް ދާއިރާގައި ހަރަކާތްތެރިވާ ކުންފުނިތަކުގެ އިސް ބޭފުޅުން ބައްދަލުވެ، ގުޅުން ބަދަހިކުރުމަށެވެ. މިދިޔަ އަހަރު ބޭއްވި ޓީޓީޖީ ފެއާގައި 63،045 ވިޔަފާރިވެރިން ބައިވެރިވެ، ދުނިޔޭގެ 130 އަށް ވުރެ މަންޒިލް އިޝްތިހާރުކޮށްފައިވެ އެވެ. މީގެ އިތުރުން، އެ ފެއާގައި 150 އަށް ވުރެ ގިނަ ކޮންފަރެންސާއި ފޯރަމް ބާއްވާފައިވެ އެވެ.
ޒަމާނުއްސުރެ ރާއްޖެ އަށް އެންމެ ގިނަ އަދަދަކަށް ޓޫރިސްޓުން އަންނަ އިޓަލީ އަކީ މިހާރު ރާއްޖެއިގެ ޓޫރިޒަމްގައި ފަސްވަނަ އަށް އެންމެ ބޮޑު ހިއްސާއެއް އޮންނަ ގައުމެވެ. އެގޮތުން، މިދިޔަ ޖުލައި މަހުގެ ނިޔަލަށް 3،257 ޓޫރިސްޓުން އިޓަލީން އައިސްފައިވެ އެވެ. އެއީ މިދިޔަ އަހަރުގެ އެ މުއްދަތާ އަޅާބަލާއިރު 28.3 ޕަސެންޓްގެ ކުރިއެރުމެކެވެ.
މިއީ ރާއްޖޭން ބޭރުގެ ގިނަ ޓޫރިޒަމް ފެއާތަކުގައި ބައިވެރިވާ ދުވަސްވަރެކެވެ. އެގޮތުން، މިދިޔަ މަހުގެ ތެރޭގައި، އެމްއެމްޕީއާރުސީން ވަނީ ޖަޕާނާއި ފްރާންސް އަދި ރާއްޖެ އަށް އެންމެ ގިނައިން ޓޫރިސްޓުން އަންނަ ޗައިނާގައި ބޭއްވި ބޮޑެތި ފެއާތަކެއްގައި ބައިވެރިވެފަ އެވެ. އަދި އިންޑިއާގައި ބާއްވާ އެންމެ ބޮޑު ޓޫރިޒަމް ފެއާގައި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ވަނީ މި މަހުގެ ކުރީކޮޅު ބައިވެރިވެފަ އެވެ.