03 މެއި 2020 - 16:53
ކޮރޯނާވައިރަސް ކޮންޓްރޯލްކުރުމަށް، ރާއްޖޭގެ އެންމެ ދެކުނުން އައިސޮލޭޓްކުރާ މީހުން ބައިތިއްބާނެ ފެސިލިޓީއަކަށް އައްޑޫ ކެނަރީފް ރިސޯޓް ހަމަޖައްސާފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްގެ ކޮވިޑް-19 ކަވަރެޖްގެ ތެރޭގައި މިނިސްޓަރު ވިދާޅުވީ ކުރިން ހެރަތެރަ ރިސޯޓްގެ ނަމުގައި އައްޑޫގައި އެންމެ ފުރަތަމަ ހުޅުވި ރިސޯޓް އައިސޮލޭޝަން ފެސިލިޓީއެއްގެ ގޮތުގައި ބޭނުންކުރާ އިރު އެ ރިސޯޓަކީ 270 ކޮޓަރީގެ ތަނެއް ކަމަށެވެ.
ކެނަރީފްގެ ނަމުގައި މިހާރު ހިންގަމުން އަންނަ އެ ރިސޯޓަކީ އައްޑޫގައި ވަކިން އޮންނަ ހުޅުމީދޫ ކައިރީގައި އޮންނަ ރިސޯޓެކެވެ. އެ ރިސޯޓާ އެކު އައްޑޫގައި އޮންނަ ތިން ރިސޯޓެވެ. އެއީ ޝަންގްރިއްލާ ވިލިގިލި ރިސޯޓް އެންޑް ސްޕާ އާއި ސައުތު ޕާމް ރިސޯޓެވެ.
"ދެކުނުގައި މި ހަދަނީ ރާއްޖޭގައި ވެސް އޮތް އެންމެ ބޮޑު އެއް ރިސޯޓް އައިސޮލޭޝަން ފެސިލިޓީއަކަށް. ހެރަތެރަ [ކެނަރީފް] އަކީ ދުއިސައްތަ ހަތްދިހަ ކޮޓަރި. އަދި ސްޓޭންޑްބައިގަ ވެސް ރަށެއް ބޭއްވުމަށް ވަނީ މަޝްވަރާކޮށް ރަށެއް ހޯދާފައި." މިނިސްޓަރު ވިދާޅުވި އެވެ.
އަލީ ވިދާޅުވި ގޮތުގައި ރާއްޖޭގެ އުތުރުގައި ވެސް ދޮނަކުޅީގެ އިތުރުން މިހާރު ވަނީ ސްޓޭންޑްބައި އަށް އިތުރު ރަށެއް ހަމަޖައްސައިފަ އެވެ.
މިނިސްޓަރު ވިދާޅުވީ ދޮނަކުޅި ހައިޑްއަވޭ ރިސޯޓް އައިސޮލޭޝަން ފެސިލިޓީއެއްގެ ގޮތުގައި ބޭނުންކުރަން ފަށައި ށ. އަތޮޅުންނާއި ހއ. އަތޮޅުން ކޮވިޑް-19 އަށް ޕޮޒިޓިވްވި މީހުން ވަނީ އެ ރިސޯޓްތަކުގެ އައިސޮލޭޝަށް ފެސިލިޓީތަކަށް ބަދަލުކޮށް ބެލެހެއްޓުމުގެ މަސައްކަތް ފަށައިފަ އެވެ.
ރާއްޖޭގެ އެންމެ ދެކުނުން ކެނަރީފް ރިސޯޓް އައިސޮލޭޝަން ފެސިލިޓީއެއްގެ ގޮތުގައި ހަމަޖައްސާފައިވާ އިރު، އައްޑޫ ގަމުފެ ދޫގަސް ވަނީ ކަރަންޓީނު ފެސިލިޓީއަކަށް މިދިޔަ މަހުގެ ތެރޭގައި ހަމަޖައްސައިފަ އެވެ. އައްޑޫ އިކްޓޯރިއަލް ހޮސްޕިޓަލް (އޭއީއެޗް) ގައި ވެސް ހަތަރު މީހުންގެ ޖާގައިގެ އައިސޮލޭޝަން ރޫމެއް ހަމަޖައްސާފައިވެ އެވެ.
ރާއްޖޭން މިހާތަނަށް ކޮވިޑް-19 ޖެހުނު މީހުންގެ އަދަދު ވަނީ 519 އަށް އަރައިފަ އެވެ. ބަލީގައި އެކަކު މަރުވެފައިވާ އިރު، ރާއްޖޭގައި 18 މީހަކު ބަލިން ރަނގަޅުވެފައިވެ އެވެ.