12 މެއި 2020 - 01:20
ކޮވިޑް-19 އަށް ފަރުވާ ދޭ ފެސިލިޓީއެއްގެ ގޮތުގައި ބޭނުންކުރާ އއ. ވެލިދޫގައި މަސައްކަތްކުރާ ދިވެހި އަންހެން ޑޮކްޓަރަކާއި އެ ފެސިލިޓީއާ ހަވާލުވެ ހުންނެވި ސިފައިންގެ އެންމެ އިސް މީހާ ދަންވަރު އެކަހެރިކޮށް، ބައްދަލުކުރިކަން އެނގި ފުލުހުން ތަހުގީގު ކުރަން ފަށައިފި އެވެ.
"މިހާރު" އަށް އެނގިފައިވާ ގޮތުގައި އެކަން ފަޅާ އެރީ ރޭ ދަންވަރުގެ ވަގުތެއްގައި، ސިފައިންގެ މީހާގެ ކޮޓަރިން ޑޮކްޓަރު ނުކުތްތަން އެ ރަށުގެ ސެކިއުރިޓީ ބަލަހައްޓާ ފުލުހުންނަށް ފެނިގެންނެވެ.
ފުލުހުން މައްސަލަ ތަހުގީގު ކުރަމުން އަންނަކަން ވަނީ އެނގިފަ އެވެ. އެކަމަކު އެއްވެސް ތަނަކުން ރަސްމީ ބަހެއް މިކަމުގައި ލިބޭ ގޮތެއް ނުވި އެވެ.
ކޮވިޑް-19 އަށް ޕޮޒިޓިވްވާ މީހުން ކަރަންޓީން ކޮށްފައި ތިބޭ ވެލިދޫގައި އެކެއްގެ ކޮޓަރި އަށް އަނެކަކު ގޮސް އުޅުމަކީ ހުއްދަ ކަމެއް ނޫނެވެ. އަދި އިސް މަގާމެއްގައި ހުރި ދެ މީހަކު މިފަދަ ގޮތަކަށް ފެނުމުން އެކަމުގައި ތުހުމަތު ކުރެވޭ އެހެން ކަންތައްތަކެއް ހުރި ކަމަށް ފެންނާތީ ފުލުހުން އަންނަނީ ތަހުގީގު ކުރަމުންނެވެ.
އެނގިފައިވާ ގޮތުގައި، އެ މައްސަލައާ ގުޅިގެން ތުހުމަތު ކުރެވޭ އަންހެން ޑޮކްޓަރު މިރޭ މާލެ ގެނައުމަށް ވަނީ ނިންމައިފަ އެވެ. އެ ޑޮކްޓަރުގެ އިތުރުން ސިފައިންގެ ފިރިހެން މީހާ ވެސް އުޅެނީ ކައިވެނި ކޮށްގެންނެވެ.
ފެސިލިޓީއާ ހަވާލުވެ ހުންނެވި، މޭޖާ ރޭންކުގެ ސިފައިންގެ މީހާ އަދިވެސް ހުރީ ވެލިދޫގެ ކޮމާންޑަރަކަށެވެ.
ކޮވިޑް-19 އަށް ހާއްސަ ކޮށްފައިވާ ކަރަންޓީން ފެސިލިޓީތައް ހިންގަނީ ސިފައިންގެ ބެލުމުގެ ދަށުންނެވެ. އެ ތަންތަނުގެ ސެކިއުރިޓީ ފުލުހުން ބަލަހައްޓާއިރު ކޮންމެ ތަނެއްގައި ވެސް ނަރުހުންނާއި ޑޮކްޓަރުން ތިބެ އެވެ.