01 ޖޫން 2020 - 18:00
ސުޕްރީމް ކޯޓުގެ ޝަރީއަތެއް ފުރަތަމަ ފަހަރަށް ވީޑިއޯ ކޮންފަރެންސް މެދުވެރިކޮށް މިއަދު ބާއްވައި ހުކުމެއް އިއްވައިފި އެވެ.
މިއަދު 1:00 ގައި އޮންލައިންކޮށް ބޭއްވި ޝަރީއަތަކީ، އަމިއްލަ ދަރިފުޅާ އެކު ބަދުއަހުލާގީ އަމަލް ހިންގައިގެން އައި ހުކުމްތަކާ ގުޅިގެން ޕްރޮސިކިއުޓާ ޖެނެރަލްގެ އޮފީހާ ދެކޮޅަށް ބައްޕައަކު ކުރި ދައުވާއެކެވެ.
ބާލިގު ނުވާ އުފަން ދަރިއަކާ މެދު ބަދުއަހުލާގީ އަމަލު ހިންގުމުގެ ކުށް ސާބިތުވެ އޭނާގެ މައްޗަށް 39 އެތިފަހަރުން ތައުޒީރުކޮށް، ހަ އަހަރު ދުވަހުގެ މުއްދަތަށް ޖަލަށް ލުމަށް ކްރިމިނަލް ކޯޓުން ކުރި ހުކުމް ހައި ކޯޓުން ވެސް ދެމެހެއްޓި އެވެ. އެކަމަކު އޭނާ ވަނީ ފަހުން ސުޕްރީމް ކޯޓުގައި އެ ހުކުމް އިސްތިއުނާފް ކޮށްފަ އެވެ.
ސުޕްރީމް ކޯޓުން މައްސަލަ ބެއްލެވި ފަނޑިޔާރުންގެ އިއްތިފާގުން ނިންމަވައި ހުކުމް ކުރެއްވީ ހައި ކޯޓުގެ ހުކުމަށް ތާއީދު ކޮށެވެ.
އެކަމަކު ހައި ކޯޓުގެ ހުކުމް ދެމެހެއްޓި އިރު އޭނާ މިހާރު ވަނީ އެ ހުކުމް ތަންފީޒު ކޮށް ވެސް ނިންމައިފަ އެވެ.
މި މައްސަލައިގެ ބެންޗްގައި ހިމެނި ވަޑައިގެންނެވީ ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރު އާއި ފަނޑިޔާރު ޑރ. އަޒްމިރާލްދާ ޒާހިރު އާއި ފަނޑިޔާރު އާއިޝާ ޝުޖޫން މުހައްމަދު އެވެ.
ރިޔާސަތު ބެލެހެއްޓެވީ ފަނޑިޔާރު މަހާޒް އެވެ.
ފަނޑިޔާރުންނާއި، ދައުވާކުރާ ފަރާތާއި އެ ފަރާތުގެ ވަކީލު އަދި ދައުވާ ލިބޭ ފަރާތާއި ކޯޓުގެ މުވައްޒަފުން ބައިވެރިވެވަޑައިގެންނެވީ ވީޑިއޯ ކޮންފަރެންސް މެދުވެރިކޮށެވެ. ފަނޑިޔާރުން ތިއްބެވީ ގޭގަ އެވެ.
މިއަދުގެ ޝަރީއަތް ތާރީހަށް ވަންނަނީ އޮންލައިންކޮށް ކުރިއަށް ގެންދިޔަ ސުޕްރީމް ކޯޓުގެ ފުރަތަމަ ޝަރީއަތަށް ވާތީ އެވެ.
ސުޕްރީމް ކޯޓުގެ ނިންމާފައިވަނީ އޮންލައިންކޮށް ބާއްވާ ޝަރީއަތްތައް ލައިވް ވެސް ކުރުމަށެވެ. ނަމަވެސް މިއަދު ކުރިއަށް ގެންދިޔައީ އާންމުކޮށް ހުޅުވައިނުލައި ބާއްވަން ޖެހޭ ބާވަތުގެ މައްސަލައަކަށް ވާތީ ލައިވްއެއް ނުކުރެ އެވެ.
ކޮވިޑް-19 އާ ގުޅިގެން ސިއްހީ ކުއްލި ނުރައްކަލުގެ ހާލަތުގެ އިއުލާންގެ ދަށުން އޮފީސްތައް ބަންދު ކޮށްފައިވާތީ އާންމު އުސޫލުން ޝަރީއަތްތައް އޮތީ މެދުކަނޑާލައިފަ އެވެ. މީގެ ކުރިން ބައެއް ކޯޓުތަކުން ވީޑިއޯ ކޮންފަރެންސްކޮށް މެދުވެރިކޮށް ޝަރީއަތްތައް ކުރިއަށް ގެންދަނީ ރައްކާތެރިިކަމުގެ ފިޔަވަޅުތަކާ އެކު، އެކަމަކު ފަނޑިޔާރުން ކޯޓުގައި ތިއްބަވައިގެންނެވެ.
އޮންލައިންކޮށް ޝަރީއަތްތައް ކުރިއަށް ގެންދިއުމާ ގުޅޭ ގޮތުން ސުޕްރީމް ކޯޓުން ނެރުނު ގަވާއިދުގައިވާ ގޮތުން މީހުން ކޯޓަށް ހާޒިރުކުރުން ރައްކާތެރި ނޫން ހާލަތްތަކުގައި އެ ކޯޓުގެ ޝަރީއަތްތައް ކުރިއަށް ދާނީ މައިކްރޯސޮފްޓް ޓީމްސް މެދުވެރިކޮށް ނުވަތަ ފޯނު ނުވަތަ އެ ނޫން ވެސް ޓެލެކޮންފަރެންސިން ނިޒާމެއް މެދުވެރިކޮށެވެ. އަދި ހާލަތަށް ރިއާޔަތްކޮށް، ޝަރީއަތް ކުރާ ކޯޓު ރޫމުގައި ނުވަތަ އެ ނޫން އެހެން ތަނެއްގައި ވެސް ފަނޑިޔާރުން ތިބެގެން އެފަދަ އަޑުއެހުންތައް ކުރިއަށް ގެންދެވިދާނެ ކަމަށް ގަވާއިދުގައިވެ އެވެ. އެކަމަކު ކޮންމެ ތަނެއްގައި ތިބެގެން އަޑުއެހުންތައް ކުރިއަށް ގެންދިޔަޔަސް، ވަކީލުން ކޯޓު ފަޓުލޫނުގައި ތިބެން ޖެހޭއިރު، ފަނޑިޔާރުން ތިބޭނީ ގައުނު ތުރު ކުރައްވައިގެން ކަމަށް އެ ގަވާއިދުގައިވެ އެވެ.