20 ޖޫން 2020 - 08:42
ބޮލީވުޑް ދޫކޮށްލައި މުޅިން އިންޑިއާގެ ދެކުނު ފިލްމު އިންޑަސްޓްރީ އަށް ހުސްވީ ކުޅުނު ހިންދީ ފިލްމުތައް ރަނގަޅަށް ނުހިނގުމާއި ފަހުން ލިބެމުން ދިޔަ ފިލްމުތަކާ ދޭތެރޭ ހިތްހަމަނުޖެހޭތީ ކަމަށް، ބަތަލާ ރާމިއާ ކްރިޝްނަން ބުނެފި އެވެ.
އޭނާ ވަނީ މަޝްހޫރު ބައެއް ޑައިރެކްޓަރުންނާއި އެކްޓަރުންނާ އެކު ބޮލީވުޑްގައި މަސައްކަތްކޮށްފަ އެވެ. ރާމިއާ ކުޅުނު ހިންދީ ފިލްމުތަކުގެ ތެރޭގައި އަމީތާބް ބައްޗަނާއި ގޯވިންދާއާ އެކު ކުޅުނު "ބަޅޭ މިޔާ ޗޯޓޭ މިއާ" އާއި ޝާހްރުކް ޚާނާ އެކު ކުޅުނު "ޗާހަތު" އާއި ސަންޖޭ ދަތާއި ޖެކީ ޝްރޮފްގެ "ކަލް ނަޔަކް" އަދި ޑޭވިޑް ދަވަންގެ "ބަނާރަސީ ބާބޫ" ހިމެނެ އެވެ.
ރާމިއާ އަކީ މިހާރު އިންޑިއާގެ ދެކުނުގައި ހުރިހާ ބަހަކުން ހަދާ ފިލްމުތަކެއްގައި މަސައްކަތްކުރާ ބަތަލާއެކެވެ. އޭގެ ތެރޭގައި ތެލެގޫ، ތަމަޅަ، ކަންނާޑާ އަދި މަލަޔާޅަމް ފިލްމުތައް ހިމެނެ އެވެ. އޭނާ މިހާތަނަށް އެންމެ ގިނައިން ކުޅުނީ ވެސް ތަމަޅަ އާއި ތެލެގޫ ބަހުންނެވެ.
ތެލެގޫ ފިލްމުތަކުގެ ތެރެއިން ރާމިއާ މި ފަހުން އެންމެ ބޮޑަށް މަޝްހޫރުވެގެން ދިޔައީ "ބާހްބަލީ" ގެ ދެ ފިލްމުގައި ކުޅުނު ރާނީ ސިވަގާމީގެ ރޯލުންނެވެ.
އިންޑޯ-އޭޝިއަން ނިއުސް އެޖެންސީ (އިއަންސް) އަށް ދިން އިންޓަވިއުއެއްގައި 49 އަހަރުގެ ބަތަލާ ބުނީ ދެކުނު ފިލްމު އިންޑަސްޓްރީގައި މަސައްކަތްކުރުން އޭނާ އަށް މިހާރު މާ ރަނގަޅު ކަމަށެވެ. އަދި ކެރިއަރު ވަރަށް ކާމިޔާބުކަމަށާއި ޝަކުވާ ކުރަން ޖެހޭ ވަރުގެ އެއްވެސް ކަމެއް ނެތް ކަމަށް ބުންޏެވެ.
"ބޮލީވުޑުން އަހަރެން ބްރޭކެއް ނެގީކީ ނޫން. ކުޅުނު ފިލްމުތަކަށް މާ ބޮޑު ތަރުހީބެއް ނުލިބުމާއި ފަހުން ލިބެމުން ދިޔަ ފުރުސަތުތަކަށް އަހަރެންގެ ޝައުގުވެރިކަން ނެތީމަ އެ އިންޑަސްޓްރީ ދޫކޮށްލީ،" ރާމިއާ ބުންޏެވެ.
ރާމިއާ ކުރިއަށް ހުރި ފިލްމުތަކުގެ ތެރެއިން އެންމެ ފާހަގަކޮށްލެވޭ އެއް ފިލްމަކީ ކަރަން ޖޯހަރް ޕްރޮޑިއުސަރެއްގެ ގޮތުގައި ހިއްސާވާ، ތެލެގޫ ޑައިރެކްޓަރު ޕޫރީ ޖަގަންނަދު ހިންދީ ބަހާއި ތެލެގޫ ބަހުން ހަދާ ފިލްމެކެވެ. މީޑިއާތަކުން "ފައިޓާ" ގެ ނަން ދީގެން އުޅޭ އެ ފިލްމު ލީޑް ތަރިންނަކީ ބޮލީވުޑްގެ ޒުވާން ބަތަލާ އަނަންޔާ ޕާންޑޭ އާއި ތެލެގޫ އެކްޓަރު ވިޖޭ ދެވަރަކޮންޑާ އެވެ.
އެ ފިލްމާ ބެހޭ ގޮތުން ރާމިއާ ބުނީ އެއީ "ބާހްބަލީ" އަށް ދޫނުކުރާ ވަރުގެ ފިލްމަކަށް ވާނެ ކަމަށެވެ.
ފިލްމުތަކުގެ އިތުރުން އޭނާ ވަނީ ގިނަ ޓީވީ ސިލްސިލާތައް ވެސް ކުޅެފަ އެވެ.