21 އޮކްޓޯބަރ 2016 - 13:58
އިމާދުއްދީން ސްކޫލުގެ މިދިޔަ އަހަރު ހުރިހާ ގޮތަކުން އެއް ވަނަ އިބްރާހިމް އިޒްދާން އަޒީޒް ހޯދައިފި އެވެ.
މިދިޔަ އަހަރު އިމާދުއްދީން ސްކޫލުގެ ވައިސް ކެޕްޓަންގެ މަގާމު ވެސް އަދާކުރި އިޒްދާން ވަނީ އޯ ލެވެލް އިމްތިހާނުން ހަ މާއްދާއިން އޭ ސްޓާ އަދި ދެ މާއްދާއިން އޭ ހޯދައިގެން ގައުމީ ގަދަ 10 އިން އެއް ވަނަ ވެސް ހޯދައިފަ އެވެ.
އިޒްދާނަށް އިނާމު ހަވާލުކޮށްދެއްވީ ރޭ ބޭއްވި އިމާދުއްދީން ސްކޫލުގެ އިނާމު ދިނުމުގެ ހަފުލާގެ ޝަރަފުވެރިމެހެމާން، އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ ޑރ. އަބްދުލް މުހުސިނެވެ.
"މިހާރު"އާ ވާހަކަދައްކަމުން އިޒްދާން ބުނީ ރަނގަޅު ނަތީޖާއެއް ހޯދުމަށް މަސައްކަތްކުރާއިރު ނިދި ހަމަކުރުން ބޭނުންތެރި ކަމަށާއި މީގެ އިތުރުން ޓެސްޓުތަކުގައި ހެދޭ ގޯސްތައް ހަނދާން ކުރުން ވެސް ވަރަށް މުހިއްމު ކަމަށް އިޒްދާން ބުންޏެވެ.
"އަޅުގަނޑު ގްރޭޑް އަށެއްގެ ޕޭޕަރެއްގައި ހެދި މިސްޓޭކެއް އަދިވެސް ހަނދާން އެބަހުރި. އެ މިސްޓޭކް ހަނދާންކުރަންޏާ ދެ ވަނަ ފަހަރަށް ރިޕީޓް ނުވާނެ،" އިޒްދާން ބުންޏެވެ.
މިހާރު ސީއެޗްއެސްއީގައި އޭ ލެވެލް އަަށް ކިޔަވަމުން އަންނަ އިޒްދާންގެ އަމާޒަކީ އޭ ލެވެލް އިން ރާއްޖެއިން އެއް ވަނަ ހޯދައިގެން، ރައީސުލްޖުމްހޫރިއްޔާ ދެއްވާ ސްކޮލަޝިޕް ހާސިލްކުރުމެވެ. އޭނާ ޝައުގުވެރިކަން ހުރީ ފިޒިކްސް އަށެވެ.
އިމާދުއްދީން ސްކޫލުން މިިދިޔަ އަހަރު 86 ދަރިވަރުން ވަނީ އޯ ލެވެލް ހަދައިފަ އެވެ. އޭގެ ތެރެއިން 13 ދަރިވަރުން ގައުމީ ގަދަ 10 ގައި ހިމެނުނުއިރު ހަތަރު ދަރިވަރުން ވަނީ އެކި މާއްދާތަކުން ދުނިޔޭގެ ގަދަ 10 ގައި ހިމެނިފަ އެވެ.
އިމާދުއްދީން ސްކޫލުގެ ޕްރިންސިޕަލް ވަފާ ވަހީދު "މިހާރު" އާ ވާހަކަދައްކަވަމުން ވިދާޅުވީ އެ ސްކޫލުގެ ދަރިވަރުން ހޯދަމުން އަންނަ ނަތީޖާ ރަނގަޅުވަމުން އަންނަ ކަމަށާއި ފަސް މާއްދާއިން ފާސްވި ދަރިވަރުންގެ އަދަދު ވެސް އޭގެ ކުރީ އަހަރާ އަޅާބަލާއިރު އިތުރުވެފައިވާ ކަމަށެވެ. ނަމަވެސް ގޮންޖެހުންތަކެއް ހުރިކަން އޭނާ ފާހަގަކުރެއްވި އެވެ.
"މި ސްކޫލުގައި ގްރޭޑް އެކަކުން ފަށައިގެން ކިޔަވަމުން އަންނަ ދަރިވަރުންގެ ނަތީޖާ ރަނގަޅު. އެކަމަކު ގްރޭޑް އަށަކުން އަލަށް ގުޅޭ ދަރިވަރުންނަށް އެބަޖެހޭ ވަރަށް މަސައްކަތްތައް ކޮށްދެން،" ވަފާ ވިދާޅުވި އެވެ.
މިއަހަރު ވެސް 80 އަށް ވުރެ ގިނަ ދަރިވަރުން އިމާދުއްދީން ސްކޫލުން އޯ ލެވެލް އިމްތިހާނުގައި ބައިވެރިވާ ކަމަށާއި މިިދޔަ އަހަރަށްވުރެ ރަނގަޅު ނަތީޖާއެއް ހޯދަން މަސައްކަތް ކުރަމުން އަންނަކަން ވަފާ ފާހަގަކުރެއްވި އެވެ.
ރޭގެ ހަފުލާގައި ވަނީ މިދިޔަ އަހަރު އިމާދުއްދީން ސްކޫލުން ފާހަގަކުރެވޭ ކާމިޔާބީތައް ހޯދި 60 އަށް ވުރެ ގިނަ ދަރިވަރުންނަށް އިނާމު ދީފަ އެވެ.