22 ޖުލައި 2020 - 14:20
ތައުލީމީ ގޮތުން މަތީ ދަރަޖައިގެ ނަތީޖާތައް ހޯދައިގެން ނޫނީ ޖާގަ ނުލިބޭ އޮކްސްފޯޑް ޔުނިވަސިޓީގައި ގާނޫނީ ދާއިރާ އިން ފުރަތަމަ ފަހަރަށް ކިޔަވާވިދާޅުވާން ފެއްޓެވި ދިވެހި ދަރިވަރު، އީމާން ހުސްނުއްސުއޫދު ގްރެޖުއޭޓުވެއްޖެ އެވެ.
ސުޕްރީމް ކޯޓުގެ ފަނޑިޔާރު ހުސްނުއްސުއޫދުުގެ ދަރިކަނބަލުން އީމާން، 22، އަކީ އޮކްސްފޯޑުން ގާނޫނީ ދާއިރާ އިން އަންޑަގްރެޖުއޭޓްވެ ވަޑައިގަތް ފުރަތަމަ ދިވެއްސެވެ. ދިވެހި އެހެން ދަރިވަރެއް ކަމަށްވާ އަހްމަދު ޝައްފާން، 23، ވަނީ ގާނޫނީ ދާއިރާ އިން މާސްޓާސް ޕްރޮގްރާމަކުން ފުރުސަތު ލިބި އެ ކޯސް ފުރިހަމަކުރައްވައިފަ އެވެ. އެކަމަކު އޭނާ ފަސްޓް ޑިގްރީ ނެންގެވީ އެހެން ޔުނިވާސިޓީއަކުންނެވެ.
ސާނަވީ ތައުލީމު އިނގިރޭސިވިލާތުގައި ހާސިލްކުރެއްވުމަށް ފަހު އީމާން އޭލެވެލް އަށް ކިޔަވާވިދާޅުވީ ސިންގަޕޫރުގަ އެވެ.
ދުނިޔޭގެ އެންމެ ދުވަސްވީ އަދި އެންމެ މަޝްހޫރު ޔުނިވަސިޓީތަކުގެ ތެރޭގައި ހިމެނޭ އޮކްސްފޯޑަކީ ދުނިޔޭގެ މަޝްހޫރު އެތައް ބަޔަކު ތައުލީމު ހާސިލްކޮށްފައިވާ ޝަރަފްވެރި ޔުނިވަސިޓީއެކެވެ. އޮކްސްފޯޑުގެ އެކި ކޯސްތަކުން މީގެ ކުރިން ދިހަ ވަރަކަށް ދިވެހިންނަށް ފުރުސަތު ލިބިފައިވެ އެވެ. ނަމަވެސް ކޯސް ފުރިހަމަކުރީ ކިތަން މީހުން ކަމެއް ނޭނގެ އެވެ.