26 ޖުލައި 2020 - 22:35
ރާއްޖެއިން ކޮވިޑް-19 އަށް އިތުރު 50 މީހުން ޕޮޒިޓިވް ވެއްޖެ އެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ވޭތުވެދިޔަ 24 ގަޑިއިރު އަލަށް ޕޮޒިޓިވްވި މީހުންގެ ތެރެއިން 34 މީހުންނަކީ ދިވެހިން ކަމަށާއި ބާކީ ތިބީ ބަންގްލަދޭޝްގެ 14 މީހަކާއި އިންޑިއާގެ ދެ މީހެއް ކަމަށެވެ.
އެޗްއީއޯސީގެ ތަރުޖަމާން ޑރ. ނަޒްލާ ރަފީގް މިރޭ ވިދާޅުވީ ހުޅުމާލެ މެޑިކަލް ފެސިލިޓީގައި މިވަގުތު 62 މީހުންނަށް ފަރުވާދެމުން އަންނަ ކަމަށެވެ. އޭގެ ތެރެއިން އެކަކަށް ފަރުވާދެމުން އަންނަނީ ވެންޓިލޭޓަރުގައި ކަމަށާއި، އެއީ ބިދޭސީއެއް ކަމަށް ވެސް ވިދާޅުވި އެވެ.
މީގެ އިތުރުން ދަރުމަވަންތަ ހޮސްޕިޓަލުގައި ކޮވިޑް-19އަށް ފަރުވާދިނުމަށް ހާއްސަކޮށްފައިވާ ޑީއެޗް-16 ފެސިލިޓީގައި ވެސް އެކަކަށް ފަރުވާދެމުން އަންނަ ކަމަށް ވިދާޅުވި އެވެ.
ކޮވިޑް-19 އަށް ރާއްޖެއިން ޕޮޒިޓިވްވި އަދަދު 3،300 އަށް އަރާފައި ވާއިރު، އޭގެ ތެރެއިން 2،500 އަށް ވުރެ ގިނަ މީހުން މިހާރު ވަނީ ރަނގަޅުވެފަ އެވެ. މިހާރު ފަރުވާ ދެމުންދަނީ 768 މީހަކަށެވެ. އޭގެ ތެރެއިން ކަރަންޓީގައި ތިބީ 574 މީހެކެވެ.
ރާއްޖެއިން ކޮވިޑް-19 ގައި މިހާތަނަށް ވަނީ 15 މީހަކު މަރުވެފަ އެވެ.