29 ޖުލައި 2020 - 23:33
ކޮވިޑް-19 އާއި އެ ބައްޔާ ގުޅިގެން އަޅާފައިވާ ފިޔަވަޅުތަކުގެ ސަބަބުން ފަގީރުންނަށް އާމްދަނީ ލިބޭނެ ވަސީލަތްތައް ބަންދުވެ ރަނގަޅު ކާނާ ނުލިބުމުގެ ސަބަބުން ކޮންމެ މަހަކު އިތުރު 10،000 ކުދިން މަރުވަމުންދާ ކަމަށް އދ. އިން ހޯމަ ދުވަހު ބުނެފި އެވެ.
އދ. އިން ބުނީ ފަގީރު ގައުމުތަކުގައި ދަނޑުވެރިންނަށް އެ މީހުންގެ އުފެއްދުންތައް މާކެޓަށް ނެރެވޭނެ ގޮތް ނުވެފައި އެބަ ތިބި ކަމަށާއި އެފަދަ އާއިލާތަކަށް ކުރިމަތިވެފައިވާ ދަތިކަމުގެ ސަބަބުން ކުދިންނަށް ކާން ދޭން ނުލިބި ކުރިމަތިވާ މައްސަލަތަކުގެ ސަބަބުން މަރުވާ ކުދިންގެ އަދަދު އިތުރުވެފައިވާ ކަމަށެވެ. އަދި މިކަން ގޮތުގައި އިތުރަށް ދިގު ދެމިންދާ ނަމަ ފަގީރުންނަށް ލިބޭ ގެއްލުން ދިގު މުއްދަތަކަށް ތަޖުރިބާކުރަން ޖެހޭނެ ކަމަށް ވެސް ވަނީ އިންޒާރު ދީފަ އެވެ.
ކޮންމެ މަހަކު މިހާރު ދަނީ ރަނގަޅު ކާނާ ނުލިބުމާއި އެކަމާ ގުޅުން ހުރި މައްސަލަތަކުގެ އަސަރު އިތުރު 550،000 ކުދިންނަށް ކުރަމުން ކަމަށް އދ. އިން ބުންޏެވެ.
"ކޮވިޑް-19ގެ ސަބަބުން ކުރިމަތިވި ކާނާ ލިބުން ދަތިވުމުގެ މައްސަލަައިގެ އަސަރު އެތައް އަހަރަކަށް ދެމިގެން ދާނެ،" ޑަބްލިޔު.އެޗް.އޯ އިން ނިއުޓްރިޝަންގެ ކަންކަމާ ބެހޭ ގޮތުން އެންމެ އިސްކޮށް ހުންނަވާ ޑރ. ފްރަންސެސްކޯ ބްރަންކާ ވިދާޅުވި އެވެ. "މިކަން ވާނީ އިޖުތިމާއީ މައްސަލައަކަށް."
މި ސަބަބުތަކާ ހެދި ޑަބްލިޔު.އެޗް.އޯ އާއި ޔުނިސެފާއި ވޯލްޑް ފުޑް ޕްރޮގްރާމް އަދި އެފްއޭއޯ އިން ވަނީ ހާލުގައި ޖެހިފައިވާ ކުދިންނަށް ކާނާ ފޯރުކޮށްދިނުމަށް 2.4 ބިލިއަން ޑޮލަރަށް އެދިފަ އެވެ.
ޔުނިސެފުން ބުނީ މީހުންގެ އަތްމަތި ހުސްވުމަށް ވުރެ ވެސް، ކުދިންނަށް ނުރައްކާ ބޮޑުވެފައިވަނީ ދަތުރުފަތުރު ކުރުން މަނާވުމާއި ބޭސްފަރުވާ ހޯދަން ދަތިވުމުން ފަދަ ކަންކަމުގެ ސަބަބުން ކަމަށެވެ.
"ސްކޫލްތައް ބަންދުވުމާއި ޕްރައިމަރީ ހެލްތު ކެއާ އަށް ބުރޫ އެރުމާއި ރަނގަޅު ކާނާގެ ޕްރޮގްރާމްތައް ވެސް ރަނގަޅަށް ނުހިންގުމަކީ އަމިއްލަ އަށް ދެވޭ އިތުރު ގެއްލުމެއް،" ޔުނިސެފްގެ ނިއުޓްރިޝަން ޕްރޮގްރާމްގެ ވެރިޔާ ވިކްޓަ އަގުއަޔޯ ވިދާޅުވި އެވެ.
އދ. އިން ވަނީ ކޮވިޑް-19 ފެތުރޭތީ ފިޔަވަޅުތައް އަޅާފައިވާ ފަގީރު ގައުމުތަކުގައި ކުދިންނަށް ދިމާވާ މައްސަލަތައް ދެނެގެންފަ އެވެ. އެ ގައުމުތަކުގައި ކުދިން ޑޮކްޓަރަށް ދެއްކުން އުނދަގޫވެފައި ކުދިންނަށް ކާން ލިބޭ މިންވަރު ވެސް މަދުވެ ސިއްހީ މައްސަލަތައް ބޮޑުވަމުންދާކަން ފާހަގަކޮށްފައިވެ އެވެ.