03 އޯގަސްޓް 2020 - 12:49
ރޯމް (އޮގަސްޓް 3) - ރޯމާ އަށް ކުޅެމުން އަންނަ އިޓަލީގެ ޒުވާން ފޯވާޑް ނިކޮލަ ޒަނިއޯލޯ އަށް ކުރިއަށް އޮތްތަނުގައި ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ހޯދިދާނެ ކަމަށް އިޓަލީގެ ތަޖުރިބާކާރު ކޯޗު ފަބިއޯ ކަޕެއްލޯ ބުނެފި އެވެ.
ހޮނިހިރު ދުވަހުގެރޭ ޔުވެންޓަސް ދަނޑުގައި 3-1 އިން ރޯމާ މޮޅުވި މެޗުގައި އުމުރުން 21 އަހަރުގެ ޒަނިއޯލޯގެ ފަރާތުން ތަފާތު މޮޅު ކުޅުމެއް ފެނިގެންދިޔަ އެވެ. ފަހަކަށް އައިސް ރޯމާގެ އިތުރުން އިޓަލީ ގައުމީ ޓީމުގައި ވެސް ޒަނިއޯލޯ އަންނަނީ މޮޅު ކުޅުމެއް ދައްކަމުންނެވެ. ޒަނިއޯލޯ އަކީ އެޓޭކްގެ ކޮންމެ މަގާމަކަށް ވެސް ކުޅެވޭ ކުޅުންތެރިއެކެވެ.
ސްކައިސްޕޯޓްސް އިޓާލިއާ އަށް ދިން އިންޓަވިއުއެއްގައި ކަޕެއްލޯ ބުނީ މެޗުތަކުގެ ނަތީޖާ ބަދަލުކުރުމުގައި ޒަނިއޯލޯގެ ފަރާތުން ފެންނަނީ އަދަޔާހިލާފު ހިތްވަރެއް ކަމަށާއި އެހެން ކުޅުންތެރިންނާ ބައިވެރިވެ ޓީމެއްގެ ގޮތުގައި ކުޅެން ވެސް ޒަނިއޯލޯ ފަރިތަ ކަމަށާއި މިއީ ޒުވާން ކުޅުންތެރިއަކަށް ބަލާއިރު ތަފާތު ހުނަރެއް ކަމަށެވެ.
"ފިޒިކަލީ ބަލާއިރު ޒަނިއޯލޯ އެ ހުރީ ކަކާ އެންމެ މޮޅަށް ކުޅުނުއިރަށް ވުރެން ވެސް ރަނގަޅަށް. މިއީ އަޅާކިޔުމެއް ނޫން. މިއީ މިސާލެއް. ޒަނިއޯލޯގެ ޓެކްނިކާއި ލަނޑު ޖެހުމާއި މި ހުރިހާ ކަމަކަށް ބަލާއިރު މުސްތަގުބަލުގައި ޒަނިއޯލޯ ހަމައެކަނި ޓާގެޓަކީ ނޫނީ އޭނާ އަށް ހާސިލްކުރެވޭނެ ހަމައެކަނި އެވޯޑަކީ ރަން ބޫޓެއް ނޫން. ބެލޮންޑިއޯ ހޯދޭނެ ފެންވަރު ވެސް އެބަހުރި އޭނަ ކިބައިގައި،" ކުރިން އޭސީ މިލާނާއި ޔުވެންޓަސް އަދި ރެއާލް މެޑްރިޑަށް ކޯޗުކޮށްދިން ކަޕެއްލޯ ބުންޏެވެ.
"އެ އުމުރަށް ބަލާއިރު އަހަންނަށް ނުފެނޭ ޒަނިއޯލޯ އެ ހުރި ލެވަލްގެ އެހެން ކުޅުންތެރިއެއް. އެހެންވެ އަހަރެން މި ބުނަނީ އޭނަ އަކީ ބެލޮންޑިއޯ ހޯދޭނެ ފެންވަރު ކުޅުންތެރިއެކޭ."
ޔުވެންޓަސްއާ ދެކޮޅަށް ޒަނިއޯލޯގެ ފަރާތުން ފެނުނު ކުޅުމަކީ މުސްތަގުބަލުގައި އޭނާ އަށް އެޅުނު ބިންގަލެއްގެ ގޮތުގައި ހެދިދާނެ ކަމަށް ކަޕެއްލޯ ގަބޫލުކުރެ އެވެ.
"ޔުވެންޓަސްއާ ދެކޮޅަށް ޕެރޮއްޓީ އެ ޖެހި ގޯލަށް ޒަނިއޯލޯ ފުރުސަތު ތަނަވަސްކޮށްދިން ގޮތަށް ބަލާއިރު އެއީ އޭނާ އަށް ފެށުމަކަށް ހެދިދާނެ. ޔުވެންޓަސްގެ ކޮންމެ މަގާމެއްގައި އެ ތިބީ ދުނިޔޭގެ ފެންވަރުގެ ކުޅުންތެރިން. އެ ފަަދަ މެޗެއްގެ ނަތީޖާ އަނބުރާލުމުގައި ޒަނިއޯލޯ ދެއްކި ހިތްވަރަށް ތައުރީފު ހައްގު،" ކަޕެއްލޯ ބުންޏެވެ.
ޒުވާން ކުޅުންތެރިއަކަށް އެންމެ މުހިއްމު ކަމަކީ ޑިވެލޮޕްމަންޓަށް ރަނގަޅު ގޮތްތަކެއް ނިންމުން ކަމަށާއި ޒަނިއޯލޯ ހޯދަން އެކި ކްލަބްތަކުން މަސައްކަތްކުރާއިރު، އޭނާ ވިސްނަން ޖެހޭ އެންމެ ބޮޑު ކަމަކީ ކުޅުމުގެ ފުރުސަތު ވީހާ ވެސް ގިނައިން ލިބޭ ޓީމަކަށް ބަދަލުވުން ކަމަށް ކަޕެއްލޯ ގަބޫލުކުރެ އެވެ.