24 އޮކްޓޯބަރ 2016 - 17:54
މާލޭގައި މިހާރު ދުއްވާ ބާ ޓެކްސީތައް އާކުރުމަށް ބޭންކުތަކުން މިހާރު ލޯނު ލިބޭނެ ކަމަށް ޓްރާންސްޕޯޓް އޮތޯރިޓީން މިއަދު ބުނެފި އެވެ.
އެ އޮތޯރިޓީން ބޭއްވި ނޫސްވެރިންގެ ބައްދަލުވުމެއްގައި ޗެއާމަން އަބްދުއްރަޝީދު ނާފިޒު ވިދާޅުވީ މާލޭގައި ދުއްވާ ބައެއް ޓެކްސީތަކުގެ ފެންވަރު ދަށްވުމުގެ ޝަކުވާ ގިނައިން ލިބޭ ކަމަށެވެ. އަދި ގިނަ ދުވަސްވުމުގެ ސަބަބުން ބައެއް ޓެކްސީތައް ބާވެފައި ވާއިރު ބައެއް ޓެކްސީތަކުގެ ބިއްލޫރިގަނޑު ތަޅައިގެން ގޮސްފައި ހުރުމާއި ސީޓުތައް ހަލާކުވުން ނުވަތަ ޓެކްސީގެ ވަސް ނުބައިވުން ފަދަ މައްސަލަތައް ގިނަކަން އޭނާ ފާހަގަކުރެއްވި އެވެ.
އެކަމަކު، ޓެކްސީ ޑްރައިވަރުންގެ ޖަވާބަކީ "ލިބޭ އާމްދަނީއާ ބަލާފައި ޓެކްސީ އާކުރަން އުނދަގޫ" ކަމަށް ނާފިޒު ވިދާޅުވި އެވެ.
އެހެންވެ، އެކަން ހައްލު ކުރުމަށް ޓްރާންސްޕޯޓް އޮތޯރިޓީން ބޭންކް އޮފް މޯލްޑިވްސް އާއި އިސްލާމިކް ބޭންކާ ގުޅިގެން ޓެކްސީ ޑްރައިވަރުންނަށް ލޯނު ދޫކުރުމަށް ނިންމާފައިވާ ކަމަށް އެ އޮތޯރިޓީން ބުންޏެވެ.
"މިކަން ހައްލު ކުރުމަށް އަޅުގަނޑުމެން ޓެކްސީ ސެންޓަރުތަކާއި ޑްރައިވަރުންނާ ބައްދަލުކުރީމަ އެ މީހުން ބުނަނީ އެކަން ހައްލު ކުރަން ސަރުކާރުން ލުއި ގޮތެއް ހަމަޖައްސައިދޭށޭ. އެހެންވެ، އަޅުގަނޑުމެން ނިންމީ ބޭންކުތަކާ ގުޅިގެން އެ މީހުންނަށް ލޯނު ދޫކުރަން،" ނާފިޒު ވިދާޅުވި އެވެ.
އޭނާ ވިދާޅުވީ ލޯނު ހަމަޖެއްސި ނަމަވެސް، ރަހުނެއްގެ ގޮތުގައި ބަހައްޓާނެ އެއްޗެއް ނެތުމުގެ ޝަކުވާ ޑްރައިވަރުން ކުރި ކަމަށާއި އެހެންވެ، ފަހުން ބޭންކުތަކާ ވާހަކަ ދައްކައިގެން، ގަންނަ އުޅަނދު ރަހުނުކޮށްފައި ލޯނު ލިބޭ ގޮތަށް ހަމަޖައްސާފައިވާ ކަމަށެވެ. އެ ގޮތުން، ބާ ޓެކްސީއެއްގެ ބަދަލުގައި އާ ޓެކްސީއެއް ގަންނައިރު އެ އާ އުޅަނދު ރަހުނުކޮށްފައި ލޯނު ނެގޭނެ ކަމަށް ނާފިޒު ވިދާޅުވި އެވެ.
ޓްރާންސްޕޯޓް އޮޓޯރިޓީން ބުނި ގޮތުގައި މި ލޯނު ދޫކުރަނީ ދިގު މުއްދަތެއްގެ ތެރޭގައި މަދު އަދަދަކުން ދައްކައިގެން ހަލާސް ކުރާ ގޮތަށެވެ.
"މިހާ ލުއި ފަސޭހަ ގޮތްތަކެއް ހަމަޖައްސާފައި އޮތުމުން، މިހާރު ބާ ޓެކްސީ ދުއްވުމުގެ އެއްވެސް އުޒުރެއް ނެތް،" ނާފިޒު ވިދާޅުވި އެވެ.
މާލޭގައި މިހާރު 899 ޓެކްސީ ދުއްވަ އެވެ. އެކަމަކު މާލޭގައި އުޅޭ މީހުންނަށް އެންމެ ރަނގަޅަށް ހިދުމަތް ނުދެވޭތީ މި މަހުގެ ފަހުކޮޅު، ސައިކަލް ޓެކްސީގެ ހިދުމަތް ފެށުމަށް ވެސް ވަނީ ހަމަޖައްސާފަ އެވެ.