03 އޮކްޓޯބަރ 2020 - 02:17
ކޮވިޑް-19 ކޮންޓްރޯލްކުރަން އަޅާފައިވާ ފިޔަވަޅަކަށް ލުއި ދީ، ރޭގަނޑު 10 ޖަހަންދެން ވެހިކަލް ދުއްވޭގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބަދަލުކޮށްފި އެވެ.
ޑިރެކްޓާ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރު ނެރުއްވި އެންގުމެއްގައި ބުނެފައި ވަނީމިއަދުން ފެށިގެން ވަކި ގޮތެއް އަންގަންދެން، މާލެ އާއި ހުޅުމާލެ އަދި ވިލިމާލޭގައި ވެހިކަލް ދުއްވުން މަނާވާނީ ރޭގަނޑު 10:00 އިން ފަތިހު 5:00 އަށް ކަމަށެވެ.
ޖުލައި 1 އިން ފެށިގެން ލޮކްޑައުން އަށް ބޮޑެތި ލުއިތަކެއް ދިނުމާ އެކު، މާލެ ސަރަހައްދުން ކޮވިޑް ޖެހޭ މީހުންގެ އަދަދު ވަރަށް ބޮޑަށް އިތުރުވި އެވެ. ނަމަވެސް އެ ބަލި ކޮންޓްރޯލް ކުރުމަށް ޖުލައި 30 އިން ފެށިގެން މާސްކް އެޅުން މަޖްބޫރުކޮށްފައިވެ އެވެ. އަދި އޮގަސްޓް 24 އިން ފެށިގެން ވަނީ ރޭގަނޑު 8:00 ގެ ފަހުން ވެހިކަލް ދުއްވުން މަނާކޮށްފަ އެވެ. އޭގެ ކުރިން ރޭގަނޑު 10:00 އާ ހަމައަށް ވެހިކަލް ދުއްވުމުގެ ހުއްދަ ދިނެވެ.
"މަތީގައިވާ ފިޔަވަޅުތައް ތަންފިޒުކޮށް، އެ ފިޔަވަޅުތަކަށް ފުރިހަމައަށް އަމަލުކުރުމަށް އެންމެހައި އިދާރާތަކަށާއި ފަރާތްތަކަށް އަންގަމެވެ. އަދި މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އަމަލުކުރުމަށް ވެސް އެންމެހައި ފަރާތްތަކަށް އަންގަމެވެ،" އެންގުމުގައި ބުނެފައިވެ އެވެ.
ވެހިކަލް ދުއްވޭ ވަގުތު އިތުރުކުރިއަސް، ރޭގަނޑު 10:00 އިން ފަތިހު 5:00 އަށް ބޭރުގައި އުޅުމަކީ އަދި ވެސް މަނާކަމެކެވެ.
ވެހިކަލް ދުއްވޭ ވަގުތު އިތުރުކުރިއިރު، ކޮވިޑް ޖެހޭ މީހުންގެ އަދަދު ވަނީ މަދުވާން ފަށައިފަ އެވެ. އެގޮތުން އެޗްޕީއޭ އިން ގެންގުޅޭ ސްކޯރިން ސިސްޓަމުން، ރާއްޖޭގައި ކޮވިޑްގެ ހާލަތު މިހާރު އޮތީ ހަތަރެއްގަ އެވެ. މި ސްކޯ އަކީ ކޮވިޑް ކޮންޓްރޯލް ކުރުމުގައި އަޅާފައިވާ ފިޔަވަޅުތަކަށް ލުއި ދިނުމާ ބެހޭ ގޮތުން އެޗްޕީއޭ އިން ކަނޑައަޅާފައިވާ ޕްލޭނާ އެއްގޮތަށް ކުރިއަށް ދެވިދާނެކަން އަންގައިދޭ މިންގަނޑެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) ގައި ސެޕްޓެމްބަރު 24 ގައި ބޭއްވި މީޑިއާ ބްރީފިންގައި ޕަބްލިކް ހެލްތު އެކްސްޕާޓް، ޑރ. ޝީނާ މޫސާ ވިދާޅުވީ ކޮވިޑް ޖެހޭ މީހުންގެ އަދަދު މަދުވިއަސް ގްރީން ޒޯނަކަށް އަދި ނުދާ ކަމަށެވެ.
ޑރ. ޝީނާ ވިދާޅުވި ގޮތުގައި އެއްވެސް ކްލަސްޓާއަކާ ނުގުޅޭ ކޭސްތައް ކޮންމެވެސް ވަރަކަށް މަދުވުމުގެ މާނައަކީ ބަލި ފެތުރޭ ނިސްބަތް މަދުވުމެވެ. އެކަމަކު، އެ ސްޕީޑު ހުރީ ބޭނުންވާ ވަރުގަައި ނޫން ކަމަށާއި އެއީ ގިނަ ބަޔަކަށް ރައްކާތެރިކަމުގެ ފިޔަވަޅު މަތީގައި ރަނގަޅަށް ހިފަހައްޓާނުލެވޭތީ ކަމަށް ވިދާޅުވި އެވެ.
"ޓްރެޖެކްޓްރީ ހުރީ ތިރިވާ ގޮތަށް، އެކަމަކު އަޅުގަނޑުމެން އަދި ސޭފް ލެވެލްއަކަށް ނުދޭ. އަމާޒަކީ ކްލަސްޓާއަކާ ނުގުޅޭ ކޭސްތައް 20 އަށް ވުރެން ތިރީގައި ބެހެއްޓުން. އޭރަށް ބުނެލަން އެނގޭނީ ބަލި ފެތުރުން އެބަ މަޑުޖެހެއޭ،" ޑރ. ޝީނާ ވިދާޅުވެފައިވެ އެވެ.
އޭނާ ވިދާޅުވި ގޮތުގައި ރައްކާތެރިކަމުގެ ފިޔަވަޅުތަކުގެ މަތީގައި ދުވަސްކޮޅަކު އެންމެން ވެސް ތިބެން ޖެހެ އެވެ. ރައްކާތެރިކަމުގެ ފިޔަވަޅުތައް އެއްކޮށް ދޫކޮށްލިޔަސް އެންމެ ކުރިން އުޅުނު ގޮތަކަށް ނޫޅެވޭނެ ކަމަށާއި މިހާރުގެ އާދަކާދަތައް ހިފަހައްޓަން އޭނާ އެދިވަޑައިގަތެވެ.