24 އޮކްޓޯބަރ 2020 - 13:18
ކޮލަމްބޯ (އޮކްޓޯބަރު 24) - ލަންކާގައި ކޮރޯނާވައިރަހަށް ޕޮޒިޓިވްވި މީހުން ރެކޯޑް އަދަދަކަށް އިއްޔެ އިތުރުވެ، ހާލަތު ގޯސްވެފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.
ލަންކާ ސަރުކާރުގެ ހިސާބުތައް ދައްކާ ގޮތުން އެ ގައުމުން އިއްޔެ ވަނީ 865 މީހުން ޕޮޒިޓިވްވެފަ އެވެ. މިއީ މިދިޔަ ޖެނުއަރީ މަހު ލަންކާ އިން ކޮރޯނާވައިރަހުގެ ފުރަތަމަ ކޭސް ފެނުނު ފަހުން އެއް ދުވަސްތެރޭ އެންމެ ގިނަ މީހުން ޕޮޒިޓިވްވި ފަހަރެވެ.
ޑެޕިއުޓީ ޑިރެކްޓަރު ޖެނެރަލް އޮފް ޕަބްލިކް ހެލްތު ސާވިސް ޑރ. ހެމަންތަ ހެރަތު ވިދާޅުވީ މި ދުވަސްވަރު ޕޮޒިޓިވް ކޭސްތައް އިތުރުވި ނަމަވެސް ހާލަތު ކޮންޓްރޯލް ކުރެވޭނެ ކަމަށެވެ. އަދި ލަންކާގައި ކޮރޯނާވައިރަހުގެ ހާލަތު މިހާރު އޮތީ ނާޒުކް ފައްތަރެއްގައިކަން އާއްމުން ގަބޫލް ކުރަން ޖެހޭނެ ކަމަށް އޭނާ ވިދާޅުވި އެވެ.
"ބަލި ކޮންޓްރޯލްކުރަން އަޅާ ފިޔަވަޅުތަކަށް އާއްމުންގެ އެއްބާރުލުން ނުލިބިއްޖެ ނަމަ ހާލަތު ކޮންޓްރޯލުން ނެއްޓިގެންދާނެ،" އޭނާ ވިދާޅުވި އެވެ.
ކަމާބެހޭ ފަރާތްތަކުން އިއުލާންކޮށްފައިވާ ސިއްހީ ގައިޑްލައިންތަކަށް އެންމެން ވެސް ތަބާވުމަށް އޭނާ ވަނީ އިލްތިމާސް ކުރައްވައިފަ އެވެ.
ނޭޝަނަލް އޮޕަރޭޝަން ސެންޓަ ފޯ ޕްރިވެންޝަން އޮފް ކޮވިޑް-19 ގެ ވެރިޔާ އަދި ސިފައިންގެ ކޮމާންޑަރު ލެފްޓިނެންޓް ޖެނެރަލް ޝަވެންދުރަ ސިލްވާ ވިދާޅުވީ ކޮލަމްބޯ އޭރިއާގެ މަރަޑަނާ އާއި ޑެމަޓަގޮޑާގައި މިހާރު ކާފިއު އިއުލާންކޮށްފައިވާ ކަމަށެވެ. އަދި ޕެލިޔަގޮޑާ މަސް މާރުކޭޓުން ޕޮޒިޓިވްވި މީހުންގެ ކްލޯޒް ކޮންޓެކްސް ކޮލަމްބޯ އިން ވެސް ފެނިފައިވާ ކަމަށް ވިދާޅުވި އެވެ.
ލަންކާ އިން މިހާތަނަށް ވަނީ 7،153 މީހުން ޕޮޒިޓިވްވެ 15 މީހުން މަރުވެފަ އެވެ.