29 އޮކްޓޯބަރ 2020 - 22:26
މިދިޔަ 24 ގަޑިއިރު ތެރޭ ރާއްޖޭން ކޮވިޑް-19 ގެ އާ 25 ކޭސް ފެނިފައިވާ ކަމަށާއި ރިސޯޓް މުވައްޒަފުންގެ ތެރޭ ކޮވިޑަށް ޕޮޒިޓިވް 89 މީހަކު އެބަތިބި ކަމަށް އެޗްޕީއޭ އިން މިރޭ ބުނެފި އެވެ.
އެޗްޕީއޭ އިން ބުނީ އަލަށް ކޮވިޑް-19 އަށް ޕޮޒިޓިވްވި މީހުންގެ ތެރެއިން 16 މީހުންނަކީ ދިވެހިން ކަމަށެވެ. އަދި ޕޮޒިޓިވްވި މީހުންގެ ތެރެއިން ނުވަ މީހަކު ފިޔަވައި އެހެން މީހުން ޕޮޒިޓިވްވީ މާލެ ސަރަހައްދުން ކަމަށް އެޗްޕީއޭ އިން ބުންޏެވެ.
މާލެ ފިޔަވައި 21 ރަށެއްގައި ކޮވިޑްގެ ބަލި މީހުން އެބަ ތިއްބެވެ. އަދި 23 ރިސޯޓެއްގައި 30 ޓޫރިސްޓަކާއި 89 ސްޓާފަކު ވެސް ޕޮޒިޓިވް ވެފައި އެބަތިއްބެވެ.
ކޮވިޑް ފެތުރޭތީ ބޯޑަރު ބަންދުކޮށް ޓޫރިޒަމް ހުއްޓުމަކަށް ގެނައުމަށް ފަހު އަލުން ހުޅުވާފައިވަނީ ރައްކާތެރިކަމުގެ ފިޔަވަޅުތަކާ އެކުގަ އެވެ. ރިސޯޓްތަކަށް ފަހު ބައެއް ރަށްރަށުގައި މިހާރު ވަނީ ގެސްޓް ހައުސްތައް ވެސް ހުޅުވައިފަ އެވެ. އެޗްޕީއޭ އިން ބުނެފައިވަނީ އެތަނުން ދީފައިވާ ގައިޑްލައިނާ އެއްގޮތަށް ޓޫރިސްޓް ފެސިލިޓީތަކުން އަމަލުކުރާ ނަމަ ޓޫރިސްޓުންގެ ފަރާތުން ބަލި އިތުރަށް ފެތުރި ނުރައްކާވުމުގެ ފުރުސަތު ވަރަށް ކުޑަވާނެ ކަމަށެވެ. ޓޫރިޒަމް އަލުން ފެށި ފަހުން ވެސް ކޮވިޑްގެ ކޭސްތައް އިތުރު ނުވެ ހުރީ އެވްރެޖްކޮށް ދުވާލަކަށް 30 އަށް ވުރެ ދަށުގަ އެވެ.
ކޮވިޑް-19 އަށް ރާއްޖެއިން ޕޮޒިޓިވްވި މީހުންގެ އަދަދު 11،600 އަށް އަރާފައިވާއިރު އޭގެ ތެރެއިން މިހާރު ފަރުވާ ދެނީ 839 މީހަކަށެވެ. އޭގެ ތެެރެއިން 269 މީހަކު އައިސޮލޭޝަން ފެސިލިޓީތަކުގައި ތިބިއިރު 55 މީހަކަށް ހޮސްޕިޓަލްތަކުގައި އަންނަނީ ފަރުވާ ދެމުންނެވެ.
ކޮވިޑަށް ޕޮޒިޓިވްވާ މީހުންގެ އަދަދު ދަށްވެފައި ވިޔަސް ހޮސްޕިޓަލުގައި ފަރުވާދޭ މީހުންގެ އަދަދު ދަށްވަމުން އައިސް މި ހަފުތާގައި ވަނީ އަނެއްކާވެސް މައްޗަށް ގޮސްފަ އެވެ.
ކޮވިޑް-19 ގައި ރާއްޖެއިން މިހާތަނަށް 37 މީހަކު މަރުވެފައިވެ އެވެ.