02 ޖޫން 2016 - 10:50
އާ ކުޅުންތެރިންނާ އެކު ގައުމީ ފުޓްބޯޅަ ޓީމު އަންނަނީ ބަދަލުވަމުން ކަމަށާއި ޓީމާ އަލަށް ގުޅިފައިވާ ކުޅުންތެރިންނާ ދޭތެރޭ ވަރަށް ބޮޑަށް ހިތްހަމަޖެހޭ ކަމަށް ގައުމީ ޓީމުގެ ފޯވާޑް އަލީ ފާސިރު (ސެންޓޭ) ބުނެފި އެވެ.
އޭޝިއަން ކަޕް ކޮލިފައިންގައި މިރޭ ޔަމަނާ ދެކޮޅަށް ކުޅޭ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ސެންޓޭ ބުނީ ކުރީކޮޅު އެންމެ އެދެވޭ ނަތީޖާ ނުފެނިދާނެ ކަމަށެވެ.
"ގައުމީ ޓީމު މި އަންނަނީ ބަދަލުވަމުން. އެހެންވެ މިހާރު ސަޕޯޓަރުން އެންމެ ބޭނުންވާ ގޮތަށް ނަތީޖާ ނައިސްދާނެ. އެކަމަކަށް ވަގުތު ނަގާނެ،" ސެންޓޭ ބުންޏެވެ. "ޓީމާ އާ ގިނަ ކުޅުންތެރިން ވަނީ ގުޅިފައި. އެ ކުޅުންތެރިން ވަރަށް ރަނގަޅު."
ސެންޓޭ ބުނީ ކޯޗު ރިކީ ހާބަޓް ފާހަގަކުރި ގޮތަށް ތައްޔާރުވާން ލިބުނީ މަދު ދުވަސްކޮޅެއް ކަމަށާއި އެކަމަކު ލީގުގެ ތެރެއިން މި މެޗު ކުޅޭތީ އެ ތަފާތު އެހާ ބޮޑަށް ނުފެންނާނެ ކަމަށެވެ.
"މިރޭގެ މެޗުން ރަނގަޅު ނަތީޖާއަކަށް ވަރަށް ބޮޑަށް މަސައްކަތްކުރާނަން،" ސެންޓޭ ބުންޏެވެ.