03 ޑިސެމްބަރ 2020 - 18:57
ވޮޝިންޓަން (ޑިސެމްބަރު 3) - ކޮރޯނާވައިރަހަށް އެމެރިކާގައި ޕޮޒިޓިވްވާ މީހުންނާއި ހޮސްޕިޓަލްގައި އެޑްމިޓްކުރާ މީހުން ރެކޯޑް އަދަދުން މައްޗަށް ޖެހިއްޖެ އެވެ.
ހޮސްޕިޓަލްގައި އެޑްމިޓްކުރި މީހުންގެ އަދަދު ވަނީ ފުރަތަމަ ފަހަރަށް އެއްލައްކަ އަށް އަރައިފަ އެވެ. ނޮވެމްބަރު މަހު ކުރީކޮޅުން ފެށިގެން، އެޑްމިޓްކުރާ މީހުންގެ އަދަދު މިހާރު ވަނީ ދެ ގުނަވެފަ އެވެ.
އަލަށް ޕޮޒިޓިވްވާ މީހުންގެ އަދަދު ބުދަ ދުވަހު ވަނީ 195،695 އަށް އަރައިފަ އެވެ. ދުވާލަކު އެވްރެޖްކޮށް މަރުވާ މީހުންގެ އަދަދު ވެސް ވަނީ 2،733 އަށް އަރައިފަ އެވެ.
ކޭސްތައް އިތުރުވަމުންދާތީ ލޮސް އެންޖަލްސް އިން މިހާރު ވަނީ މީހުން ބޭރަށް ނުނިކުމެ ތިބުމަށް އިލްތިމާސްކޮށްފަ އެވެ.
ކޮވިޑް ޓްރެކިން ޕްރޮޖެކްޓުގެ ޑޭޓާ ދައްކާ ގޮތުން އެމެރިކާގައި ވަނީ 14 މިލިއަން މީހުން ޕޮޒިޓިވްވެފަ އެވެ. އަދި މަރުވި މީހުންގެ އަދަދު ވަނީ 264،000 އަށް އަރައިފަ އެވެ. ނޮވެމްބަރު މަހު އެވްރެޖްކޮށް ހަފުތާއަކު ވަނީ އެއް މިލިއަން މީހުން ޕޮޒިޓިވްވެފަ އެވެ. އެއީ ގާތްގަނޑަކަށް ކޮންމެ މިނިޓަކު 99 މީހުން ޕޮޒިޓިވްވުމާ އެއްވަރުގެ އަދަދެކެވެ.
ކޭސްތައް އިތުރުވަމުންދާތީ އެމެރިކާގެ ކަމާބެހޭ ފަރާތްތަކުން މިހާރު ވަނީ ސިއްހީ ނިޒާމަށް އޮބިނޯންނަވަރު ވެދާނެ ކަމުގެ އިންޒާރު ދީފަ އެވެ.
"ހަގީގަތަކީ ޑިސެމްބަރު، ޖެނުއަރީ އަދި ފެބްރުއަރީ އަކީ އެމެރިކާގެ އާއްމު ސިއްހަތުގެ ތާރީޚުގައި ވެސް އެންމެ އުނދަގޫ ދުވަސްތަކަށް ވެގެންދާނެ،" ސެންޓަ ފޯ ޑިޒީޒް އެންޑް ޕްރިވެންޝަން (ސީޑީސީ) ގެ ޑިރެކްޓަރު ރޮބަޓް ރެޑްފީލްޑް ވިދާޅުވި އެވެ.