14 ޑިސެމްބަރ 2020 - 19:17
ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޓީސީ ސްޕޯޓްސް ކްލަބް އަތުން 3-0 އިން ދަ ގްރާންޑޭ ސްޕޯޓްސް ކްލަބް މޮޅުވެއްޖެ އެވެ.
ކުރިއާ ބަލާއިރު އާދައިގެ ސްކޮޑަކާ އެކު ނުކުތް ޓީސީއާ ދެކޮޅަށް ދަ ގްރާންޑޭން ވަނީ މިއަދު ރަނގަޅު ކުޅުމެއް ދައްކައިފަ އެވެ. ހާއްސަކޮށް ބިދޭސީ ދެ ކުޅުންތެރިން ކަމަށްވާ ހައިދަރޯފް އޮޓަބެޗް އާއި އުމަރްޖޮނޯފް އަޚްތޯރު ވަނީ މޮޅަށް ކުޅެފަ އެވެ.
މެޗުގެ 29 ވަނަ މިނެޓުގައި ދަ ގްރާންޑޭ އަށް ލީޑު ނަގަން ޕެނަލްޓީއެއް ލިބުނެވެ. އެކަމަކު ދަ ގްރާންޑޭގެ ހައިދަރޯފް އަށް ޓީސީގެ ސްރީ ލަންކާ ޑިފެންޑަރު ޔޯގެންދްރަން ޑަކްސަން ކުރި ފައުލަށް ރެފްރީ ދިން ޕެނަލްޓީ ގާސިމް ސައްމާމް (ސައްމޭ) ޖެހުމުން ޓީސީގެ ގޯލްކީޕަރު މަމަދޯފް އާޒާދް މަތަކުރި އެވެ.
ދަ ގްރާންޑޭ އިން ލީޑު ނެގީ 35 ވަނަ މިނެޓުގައި ކެޕްޓަން ޔަސްދާފު ހަބީބް (މުލަކޭ) ވައްދާލި ގޯލުންނެވެ. ޓީސީގެ ޑިފެންސް ލައިން މަތިން ހައިދްރަފޯފް ވައްޓާލި ހިތްގައިމު ބޯޅައަށް އަރައި މުލަކޭގެ އެ ބޯޅަ ގޯލުގެ މަތީ ކަނަށް އަމާޒުކޮށްލައިފަ އެވެ.
ޓީސީގެ ފޯވާޑަކަށް ކުޅެމުން އައި މިޑްފީލްޑަރު އައްޒާމް މުހައްމަދު 37 ވަނަ މިނެޓުގައި އޭރިއާ ތެރެއިން ބޯޅަ ހިފައިގެން ވަންނަނިކޮށް ދަ ގްރާންޑޭގެ ގޯލްކީޕަރު އިޔާން އަބްދުލްއަލީމް ކައިރިން ވެއްޓުމުން ޕެނަލްޓީއަކަށް އެޕީލްކުރި އެވެ. އެކަމަކު ރެފްރީ ވަނީ އައްޒާމް ޑައިވްކުރި ކަމަށް ބަލައި އޭނާ އަށް ރީނދޫ ކާޑެއް ދައްކައިފަ އެވެ.
ދަ ގްރާންޑޭ އިން ލީޑު ފުޅާކުރީ ފުރަތަމަ ހާފުގެ ފަހު މިނެޓުގައި އޭރިއާ ތެރެއިން އުމަރްޖޮނޯފް ދިން ބޯޅައަކުން އިބްރާހިމް ނޫރައްދީން ވައްދާލި ގޯލުންނެވެ.
ޓީސީން ދެ ވަނަ ހާފުގައި ކުޅުން ރަނގަޅުކުރި އެވެ. އެކަމަކު ހާފުގެ ކުރީކޮޅު ލިބުނު ދެ ފުރުސަތެއް ފިޔަވައި ގޯލަށް މާބޮޑު ނުރައްކަލެއް ނުކުރެވުނެވެ. މި ހާފުގައި ވެސް ތަފާތު ދެއްކީ ދަ ގްރާންޑޭ އިންނެވެ. އެ ޓީމުން ތިން ވަނަ ގޯލް 81 ވަނަ މިނެޓުގައި ޕެނަލްޓީއަކުން ޖެހީ މެޗުގެ މޮޅު ކުޅުންތެރިޔާގެ މަގާމް ހޯދި ހައިދަރޯފް އެވެ. މިއީ އޭނާ އަށް ޓީސީގެ ކީޕަރު ކުރި ފައުލަކަށް ދިން ޕެނަލްޓީއެކެވެ.
ދަ ގްރާންޑޭގެ ކޯޗު އިސްމާއިލް މަހަފޫޒް (އިންމަ) ބުނީ ކުޅުމާ ނަތީޖާއާ މެދު ވަރަށް ބޮޑަށް ހިތްހަމަޖެހޭ ކަމަށާއި އެކަމަކު އަދިވެސް ރަނގަޅުކުރެވޭނެ ކަމަށެވެ. އިންމަ ބުނީ މިއަދު ރަނގަޅު ކުޅުމެއް ދެއްކި ބިދޭސީ ދެ ކުޅުންތެރިން ޓީމާ ގުޅުނީ ފަހުން ކަމަށްވާތީ، ދެ ކުޅުންތެރިން ޓީމާ އެކުލެވުމުން މިއަދަށް ވުރެ ރަނގަޅު ކުޅުމެއް ފެންނާނެ ކަމަށް ގަބޫލުކުރާ ކަމަށެވެ.
"(އެކަމަކު) އަޅުގަނޑުމެން ޑިޕެންޑްވާނީ 11 ކުޅުންތެރިންނަށް. ބިދޭސީ ކުޅުންތެރިންނަކީ އިތުރު ބޫސްޓަކަށްވާނީ،" އިންމަ ބުންޏެވެ.
ޓީސީގެ ކޯޗު މުހައްމަދު ޝާޒްލީ (ޝާޒް) ބުނީ މިއަދުގެ މެޗުގައި ތަފާތަކަށް ފެނިގެން ދިޔައީ ދަ ގްރާންޑޭގެ ބިދޭސީ ދެ ކުޅުންތެރިން ކަމަށާއި އެ ކުޅުންތެރިންގެ ކުޅުން ޓީމެއްގެ ގޮތުގައި ކުރިން ފެނިފައި ނެތުމުން ހުއްޓުވަން އުނދަގޫވި ކަމަށެވެ.
"ޓީސީގެ ކުޅުންތެރިން ވެސް މަސައްކަތްކުރި. ފުރުސަތުތައް ވެސް ހޯދި. އެފަޓް ވެސް ރަނގަޅު. އެއް މެޗު ގެއްލުނަސް އަދި އަރައިގަނެވޭނެ. އުއްމީދު އެބައޮތް،" ޝާޒް ބުންޏެވެ.