23 ޑިސެމްބަރ 2020 - 10:56
ދިރާގާއި ވިމެން އިން ޓެކް މޯލްޑިވްސް ގުޅިގެން، އަންހެން ކުދިންނަށް ކޯޑިން ދަސްކޮށްދޭ ޕްރޮގްރާމެއް ގދ.ތިނަދޫގައި ބާއްވަން ނިންމައިފި އެވެ.
މިއީ "ގާލްސް ޓު ކޯޑް" ގެ ދެ ވަނަ ޕްރޮގްރާމެވެ. މި ޕްރޮގްރާމުގައި ބައިވެރިވުމަށް ވާޗުއަލްކޮށް ރަޖިސްޓްރީ ކުރުމަށް ވަނީ ހުޅުވައިލައިފަ އެވެ. ޕްރޮގްރާމުގައި ބައިވެރިވުމަށް މިމަހުގެ 25 ގެ ކުރިން ރަޖިސްޓާވާން ޖެހެ އެވެ.
އަންނަ މަހުގެ 10 ގައި ފަށާ މި ޕްރޮގްރާމްގައި ބައިވެރި ވެވޭނީ އުމުރުން 14 އަހަރާއި 20 އަހަރާ ދެމެދުގެ އަންހެން ކުދިންނަށެވެ. މި ޕްރޮގްރާމް އަމާޒުކޮށްފައިވަނީ މީގެ ކުރިން އެއްވެސް ވަރަށް ކޯޑް ކުރުމުގެ ހުނަރު ނުވަތަ ތަޖުރިބާ ނެތް ކުދިންނަށެވެ.
އަންހެން ކުދިންނަށް ކޯޑް ކުރަން ދަސްކޮށް ދިނުމާއި އެ ކުދިންގެ މެދުގައި ޓެކްނޮލޮޖީއަށް ޝައުގުވެރިކަން އިތުރުކުރުމުގެ މަގްސަދުގައި ހިންގާ މި ޕްރޮގްރާމް ހިންގާނީ މިފަހަރު ދެ މަސް ދުވަހުގެ މުއްދަތަށް އޮންލައިންކޮށެވެ. މިޕްރޮގްރާމްގެ ބައިވެރިން އަތުން އެއްވެސް ފީއެއް ނުނަގާނެވެ.
އެޗްޓީއެމްއެލް އާއި ސީއެސްއެސް އަދި ޖާވާ ސްކްރިޕްޓް ބޭނުންކޮށްގެން ވެބްސައިޓް ފަރުމާކޮށް ޑިވެލޮޕްކުރަން މި ޕްރޮގްރާމްގައި ދަސްކޮށްދޭނެ އެވެ. އަދި ނަގައިދޭ ފިލާވަޅުގެ އިތުރުން އަމަލީކޮށް ވެބްސައިޓްތައް ޑިވެލޮޕް ވެސް ކުރެވޭނެ އެވެ.
ވިމެން އިން ޓެކް މޯލްޑިވްސް އިން ބުނި ގޮތުގައި އަންހެން ކުދިން ޓެކްނޮލޮޖީ ދާއިރާގައި ކިޔަވައި، ހުނަރު ތަރައްގީކޮށް ދާއިރާގައި ދެމިތިބުމުގެ ނިސްބަތް މަދެވެ. އެހެންވެ މި ފަދަ ޕްރޮގްރާމްތައް މެދުވެރިކޮށް ދާއިރާއަށް އަންހެން ކުދިން ތައާރަފުކުރުން ވަރަށް މުހިންމު ކަމަށް ބުންޏެވެ.
ދިރާގުން ބުނީ ޓެކްނޮލޮޖީ ދާއިރާގައި ޒުވާން އަންހެން ކުދިން ބާރުވެރިކުރުވާއި ޓެކްނޮލޮޖީގެ ދާއިރާއަށް ޝައުގު ވެރިކަން އިތުރުކުރަން ދިރާގުގެ ސީއެސްއާރު ޕްރޮގްރާމްގައި ހާއްސަ އަހައްމިޔަތު ކަމެއް ދޭ ކަމަށެވެ.
މީގެ ފުރަތަމަ ޕްރޮގްރާމް ބޭއްވީ 2019 އަހަރު އެވެ. މިޕްރޮގްރާމްގެ ނަތީޖާއަށް ބަލައި ރާއްޖޭގެ އެހެން ރަށްރަށުގައި ވެސް މިފަދަ އިތުރު ޕްރޮގްރާމްތައް ހިންގަން ވަނީ ރާވައިފަ އެވެ.