30 ޑިސެމްބަރ 2020 - 13:36
ކްރިމިނަލް ކޯޓުގެ ޝަރީއަތުގެ މަޖިލީހެއްގައި، ދައުލަތުގެ ވަކީލަކު ދެކެ ލޯބިވާ ކަމަށް ބުނި މީހަކު މާފަށް އެދެން ޖެހިއްޖެ އެވެ.
އެނގިފައިވާ ގޮތުގައި މި ހަފުތާގައި ކްރިމިނަލް ކޯޓުގައި ބޭއްވި ޝަރީއަތުގެ މަޖިލީހެއްގައި އެގޮތަށް ވާހަކަ ދެއްކީ މަސްތުވާތަކެތީގެ މައްސަލައެއްގައި ދައުވާ ލިބޭ މީހެކެވެ. އެ މައްސަލައިގައި ވަކާލާތު ކުރި ޕްރޮސެކިއުޓާ ޖެނެރަލްގެ އޮފީހުގެ އަންހެން ވަކީލަކު ދެކެ ލޯބިވާ ކަމަށް އޭނާ ބުނީ ގާޒީ އެ މައްސަލައިގެ ޝަރީއަތް ކުރިއަށް ގެންދަވަނިކޮށް ކަމަށްވެ އެވެ. އޭނާ އެގޮތަށް ބުނުމުން ޝަރީއަތް މެދުކަނޑާލުމަށް ފަހު، އެކަން ވަކި މައްސަލައެއްގެ ގޮތުގައި ބެލި އެވެ. އެ މީހާ ފަހުން އެކަމަށް މާފަށް އެދުނެވެ.
އެފަދަ ކަމެއް ހިނގިކަން ކްރިމިނަލް ކޯޓުން ވެސް ކަށަވަރުކޮށް ދިނެވެ.
އެ ކޯޓުގެ އޮފިޝަލަކު ވިދާޅުވީ ޝަރީއަތުގެ މަޖިލީހެއްގައި ދައްކައިގެން ނުވާނެ ފަދަ ވާހަކައެއް ދެއްކުމުން ކޯޓު ހުރުމަތް ކެނޑިކަމުގެ މައްސަލައެއްގެ ގޮތުގައި އެކަން ބަލާފައިވާނެ ކަމަށެވެ. އެކަމަކު އެ މީހާ އެކަމަށް މާފަށް އެދުމުން އެއްވެސް އަދަބެއް ދީފައި ނުވާނެ ކަމަށް އޮފިޝަލް ވިދާޅުވި އެވެ.
ޝަރީއަތުގެ މަޖިލީހުގައި ކޯޓުގެ ހުރުމަތް ކެނޑޭ ފަދަ ވާހަކައެއް ދައްކައިފި ނަމަ ނުވަތަ އެފަދަ އަމަލެއް ކޮށްފި ނަމަ އެއީ ވަގުތުން އަދަބު ދެވިދާނެ ކުށެކެވެ. އެފަދަ އަމަލެއް ކޮށްފި ނަމަ 15 ދުވަހަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ ގިނަވެގެން އެއް މަހަށް ގޭ ބަންދު ކުރުން ނުވަތަ 10،000ރ. އަށް ވުރެ ބޮޑު ނޫން އަދަދަކުން ޖޫރިމަނާ ކުރެވޭނެ އެވެ.
މީގެ އަހަރުތަކެއް ކުރިން ޖުވެނައިލް ކޯޓަށް ކުށެއްގެ ތުހުމަތުގައި ހާޒިރުކުރި ކުއްޖަކާ އޭނާގެ ލޯބިވެރިޔާ ކޯޓު ތެރޭގައި ކިސް ކުރުމުން އެ މީހުންގެ މައްޗަށް ކޯޓުން އަދަބު ކަނޑައެޅި އެވެ.