11 ޖެނުއަރީ 2021 - 17:26
ކޮވިޑް-19 އާ ދެކޮޅަށް އިސް ސަފުގައި މަސައްކަތްކުރާ މީހުންނަށް ސަރުކާރުން މިހާތަނަށް 90 މިލިއަނަށް ވުރެ ގިނަ ރުފިޔާ ދޫކޮށްފައިވާއިރު އެކަކަށް އެންމެ ގިނައިން ލިބިފައިވަނީ 39،500ރ. ކަމަށް ފިނޭންސް މިނިސްޓްރީން ދިން މައުލޫމާތުން ދައްކައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "މިހާރު" އަށް ދޫކުރި މައުލޫމާތުގައިވާ ގޮތުން ފްރަންޓްލައިން އެލަވަންސް، ބޮލަކަށް ޖެހޭ ނިސްބަތުން އެންމެ ގިނަ އަދަދަކަށް ލިބިފައިވަނީ އިސްކަންދަރު ސްކޫލުގެ ހަތަރު މުވައްޒަފަކަށެވެ. އެއީ ޖުމްލަ 194،300ރ. އެވެ. އެއީ ބޮލަކަށް 48،575ރ. އެވެ.
ނަމަވެސް މީގެ މާނަ އަކީ އެތަނުން އެލަވަންސް ލިބެންޖެހޭ މީހުންނަށް އެއްވަރަކަށް ލިބުމެއް ނޫނެވެ. އެލަވަންސް ދޭނީ މާޗް 7 އިން ފެށިގެން މިހާތަނަށް މަސައްކަތްކުރި މީހުންގެ ތެރެއިން އެ މީހަކު މަސައްކަތްކުރި މުއްދަތަކަށް އަދި އެ މީހަކު މަސައްކަތްކުރި ކެޓަގަރީއަށް ވެސް ބަލައިގެންނެވެ. އެލަވަންސް ދެނީ ހައި ރިސްކް މީހުންނަށް ދުވާލަކަށް 500ރ، މީޑިއަމް ރިސްކު މީހުންނަށް ދުވާލަކަށް 250ރ. އަދި އެންމެ ލޯ ރިސްކް މީހުންނަށް ދުވާލަކަށް 200ރ. ގެ މަގުންނެވެ. ފިނޭންސުން މައުލޫމާތު ދީފައިވަނީ ކޮންމެ އިދާރާއަކަށް ދޫކުރި ޖުމްލަ އަދަދާއި އެ ފައިސާ ލިބުނު މީހުންގެ އަދަދެވެ.
މިހާތަނަށް ފައިސާ ދޫކޮށްފައިވާ ތަންތަނުގެ ތެރެއިން އެންމެ މީހަކަށް ފައިސާ ލިބޭ ތަންތަނަށް ބަލާއިރު އެންމެ ބޮޑު އަދަދެއް ލިބިފައިވަނީ މ. ރީޖަނަލް ހޮސްޕިޓަލަށެވެ. އެތަނުގައި ފްރަންޓްލައިން އެލަވަންސް ދީފައިވަނީ އެންމެ މީހަކަށެވެ. އެއީ 39،500ރ. އެވެ. އަދި އެންމެ މީހަކަށް އެލަވަންސް ދޭ ތަންތަނުގެ ތެރެއިން އެންމެ ކުޑަ އަދަދެއް ލިބިފައިވަނީ އިއްޒުއްދީން ސްކޫލުން އެންމެ މީހަކަށް 1،000ރ. އެވެ. އެކަމަކު ހަޔަ އެޑިއުކޭޝަން މިނިސްޓްރީން ދެ މީހަކަށް 600ރ. ދީފައި ވާތީ މިއީ ބޮލަކަށް ޖެހޭ އަދަދު އެންމެ މަދު އިދާރާ އެވެ.
މި މަހުގެ ހަތަރު ވަނަ ދުވަހާ ހަމަ އަށް 11،349 މީހަކު ފްރަންޓްލައިން ސްޓާފުންގެ ގޮތުގައި ރަޖިސްޓްރީކޮށްފައިވެ އެވެ. އޭގެ ތެރެއިން މިހާތަނަށް ފައިސާ ދީފައިވަނީ 10،180 މީހަކަށެވެ. މި މީހުންނަށް ދޫކުރި ފައިސާގެ ޖުމްލަ އަދަދަކީ 90،318،919.47ރ. އެވެ.
މުޅި އިދާރާ އަށް ލިބުނު ޖުމްލަ އެލަވަންސަށް ބަލާއިރު އެންމެ ބޮޑު އަދަދެއް ދޫކޮށްފައިވަނީ ފުލުހުންނަށެވެ. އެއީ 27،436،300ރ. އެވެ. މިއީ އެލަވަންސް ލިބުނު މުވައްޒަފުންގެ އެންމެ ގިނަ އިދާރާ އެވެ. އެތަނުން 3،211 މީހަކަށް އެލަވަންސް ލިބިފައިވެ އެވެ. ދެން އެންމެ ގިނައިން ދީފައިވަނީ ސިފައިންނަށެވެ. އެއީ 23،434،419.47ރ. އެވެ. އެއީ 3،199 މީހަކަށެވެ. ބޮލަކަށް ޖެހޭ ނިސްބަތުން ނަމަ ފުލުހަކަށް 8،544.47ރ. އަދި ސިފައިންގެ މީހަކަށް 7،325.55ރ. ލިބޭނެ އެވެ.
ފުލުހުންނާއި ސިފައިންނަށް ފަހު ދެން އެންމެ ގިނަ މީހުންނަށް އަދި އެންމެ ބޮޑު އަދަދެއް ދޫކޮށްފައިވަނީ އައިޖީއެމްއެޗަށެވެ. އެއީ 1،715 މީހުންނަށް 18،305،100ރ. އެވެ. ދެން އެންމެ ގިނައީ ނެޝަނަލް ޑިޒާސްޓާ މެނޭޖްމަންޓް ސެންޓަރަށެވެ. އެތަނުން 648 މީހަކަށް 7،191،900ރ. އެވެ. ހުޅުމާލޭ ހޮސްޕިޓަލްގެ 305 މީހަކަށް 3،220،500ރ. ވަނީ ދީފަ އެވެ. އަދި ހެލްތު މިނިސްޓްރީގެ 96 މީހަކަށް 2،057،200ރ، މާލޭ ސިޓީ ކައުންސިލްގެ 135 މީހަކަށް 1،252،200ރ. އަދި އެޗްޕީއޭގެ 65 މީހަކަށް 1،125،950ރ. ދޫކޮށްފައިވެ އެވެ.
ބޮލަށް ޖެހޭ ރޭޓުން ބަލާ ނަމަ މިހާތަނަށް އެލަވަންސް ލިބުނު ކޮންމެ މީހަކަށް ޖެހެނީ 8،872ރ. އެވެ. މިހާތަނަށް އެލަވަން ދީފައިވަނީ 73 އިދާރާއެއްގެ މީހުންނަށެވެ.