25 ޖެނުއަރީ 2021 - 11:35
ކޮވިޑް-19 ޖެހުނު މީހުންގެ އަދަދު ދުވާލަކު 100 އިން މައްޗަށް އެރީ މާ ބޮޑު ކަމެއް ދިމާވެގެން ނޫން ކަމަށާއި މައްސަލައަކީ ކުދިކުދި ކަންކަމުގައި ފަރުވާ ނުބެހެއްޓުން ކަމަށް އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާން ޑރ. ނަޒްލާ ރަފީގު ރޭ ވިދާޅުވެއްޖެ އެވެ.
ރާއްޖޭގައި ގަދައަށް ފެތުރެމުން އައި ކޮވިޑް-19 ކޮންޓްރޯލް ކުރެވި ދުވާލަކަށް ޕޮޒިޓިވްވާ މީހުންގެ އަދަދު ގާތްގަނޑަކަށް 50 އިން ތިރީގައި ވެސް ހިފެހެއްޓި އެވެ. ނަމަވެސް އިއްޔެ ވަނީ ނޮވެމްބަރު 23ގެ ފަހުން ފުރަތަމަ ފަހަރަށް 100 އިން މައްޗަށް، ޕޮޒިޓިވް ކޭސްތައް އަރައިފަ އެވެ. ޖުމްލަ ޕޮޒިޓިވްވި 108 މީިހުންގެ ތެރެއިން 79 މީހުން ދިރިއުޅެމުން އަންނަނީ މާލެ ސަރަހައްދުގަ އެވެ.
ނޮވެމްބަރު 23 ގައި 130 މީހުންނަށް ކޮވިޑް-19 ޖެހުނެވެ.
އެކަމަށް އިޝާރަތްކުރައްވާ ޑރ ނަޒްލާ ވިދާޅުވީ ކޮންމެ ފަހަރަކު ވެސް ކޭސްތައް މަދުވާއިރަށް މީހުން މާ ބޮޑަށް "ރިލެކްސް" ކޮށްލާ ކަމަށެވެ. އެގޮތަށް ފަރުވާ ކުޑަކޮށްލައިގެން މީގެ ކުރިން ދެ ފަހަރަށް ކޭސްތަކުގެ އަދަދު މަތިވި ކަމަށާއި ކުރިޔަށް އޮތް ތަނުގައި ވެސް އެ ފުރުސަތު އޮންނާނެ ކަމަށް ވިދާޅުވި އެވެ.
އޭނާ ވިދާޅުވީ ކޮވިޑް-19 ދެމިއޮތަސް ސްކޫލްތަކާއި ވިޔަފާރިތައް އަބަދު ބަންދުކޮށްފައި ނުބެހެއްޓޭނެ ކަމަށެވެ. އަދި ޓޫރިޒަމް ވެސް ހުޅުވާލައިގެން ނޫނީ ގައުމަށް ފައިދާ ނުވާނެ ކަމަށް ވެސް ވިދާޅުވި އެވެ.
"މިއިން އެއްވެސް ކަމަކީ މިދިޔަ އަހަރު ޖެނުއަރީގައި އުޅުނު ގޮތަކަށް ކުރެވޭނެ ކަމެއް ނޫން. އުޅެންވީ ގޮތް ކޮންމެ ކަމަކަށް ވެސް ވަރަށް ތަފްސީލްކޮށް އެބައޮތް ލިޔެފައި،" އޭނާ ވިދާޅުވި އެވެ.
"އެޗްޕީއޭއިން ދުވަހަކު ވެސް މިހާ ގިނަ ގައިޑްލައިނެއް ނުހަދާ. ވަކިވަކި ކަންކަން ތަފްސީލްކޮށް އާންމު ކުރެވިފައި މިހުރީ. މި ގޮތަށް އަމަލު ނުކުރެވިއްޖެއާ ގިނަ ވާނެ."
ޑރ. ނަޒްލާ ވިދާޅުވީ ކޭސްތައް އިތުރުވުމަކީ ރައްކާތެރިކަމުގެ މިންގަނޑުތަކަށް އަމަލުނުކުރުމުގެ ނަތީޖާ ކމަށެވެ.
އޭގެ ބައެއް މިސާލުތައް ދެއްވަމުން އޭނާ ވިދާޅުވީ ކިތަންމެ އަވަހަކަށް އެއްޗެއް ގަންނަން ޖެހުނަސް ފިހާރައިގެ ތެރޭގައި މީހުން ގިނަ ނަމަ މަޑުކޮށްލަން ޖެހޭނެ ކަމަށެވެ. އަދި ރެސްޓޯރަންޓުތަކުގައި ވެސް ކާން ނޫން ގޮތަކަށް މާސްކު ނަގައިގެން ނުވާނެ ކަމަށް ވިދާޅުވި އެވެ. ދެން އޭނާ ދެއްކެވީ އެންމެ އާންމު އެއް މިސާލެވެ: މަގުމަތީގައި ވާހަކަ ދައްކަން ތިބޭ އިރު މާސްކް ނައްޓާލައިގެން އުޅޭއުޅުމެވެ.
"މިކަހަލަ ވަރަށް ގިނަ ކުދިކުދި ކަންކަން އެއްފަހަރާ ކުރީމަ ހަމަ ކޭސްތައް އިތުރު ވަނީ. ކޮންމެހެން ބޮޑު ކްލަސްޓާއެއް އުފެދިގެން ނުވަތަ މާ ބޮޑެތި ކަންތައްތަކެއް ވެގެނެއް ނޫން. މިހެން ކުރެވޭ ވަރަށް ބައިވަރު ކުދިކުދި ކަންކަމުން ކޭސްތައް ގިނަވަނީ،" ޑރ. ނަޒްލާ ވިދާޅުވި އެވެ.
އޭނާ ވިދާޅުވި ގޮތުގައި މިއީ އެންމެން ވެސް ދިރިއުޅުމުގެ ކަންކަން ތަފާތުކުރަން ޖެހޭ ހާލަތެކެވެ. ކައިވެނި ޕާޓީއެއް ނުވަތަ އޮފީހުގެ ޖަލްސާއެއް ބޭއްވިޔަސް ގައިޑްލައިންއާ އެއްގޮތަށް ކުރިޔަށް ގެންގޮސްގެން ނޫނީ ކޭސްތައް އިތުރުވާނެ ކަމަށް ވިދާޅުވި އެވެ.
ދެން ޖެހޭނީ ހަރުކަށި ފިޔަވަޅުތައް އިތުރުކުރަން،" ޑރ. ނަޒްލާ ވިދާޅުވި އެވެ.