03 ފެބުރުއަރީ 2021 - 13:41
ކޮވިޑް-19 އިން ރައްކާތެރިވުމަށް އެންމެންނަށް ވެކްސިން ދޭން ފެށުމުގެ ގޮތުން ރާއްޖޭގެ އެކި ރަށްރަށަށް ވެކްސިން ގެންދިއުމުގެ މަސައްކަތް އެމްއެންޑީއެފުން ފަށައިފި އެވެ.
އިންޑިއާއިން ހަދިޔާކޮށްފައިވާ ކޮވިޝީލްޑް ވެކްސިން ރާއްޖޭގައި ޖަހަން ފެށީ މިދިޔަ ހޯމަ ދުވަހު އެވެ. މި ވެކްސިން އެންމެ ފުރަތަމަ ދެނީ ސިއްހީ މަސައްކަތްތެެރިންނާއި ހައި ރިސްކު މީހުން ރައްކާތެރިކުރުމަށެވެ. އެ ދުވަހު ރައީސް އިބްރާހިމް މުހައްމަދު ސޯލިހާއި ދައުލަތުގެ އިސް އެހެން ވެރިން ވެސް ވެކްސިން ޖެއްސެވި އެވެ.
އިންޑިއާ އިން ރާއްޖެއަށް ހަދިޔާކުރި އޮކްސްފޯޑް-އެސްޓްރަޒެނެކާގެ ކޮވިޝީލްޑްގެ 100،000 ޑޯޒްގެ އިތުރުން ރާއްޖެއަށް އިތުރު 700،000 ޑޯޒް ގެނައުމަށްޓަކައި އެސްޓަރަޒެނެކާގެ ސިންގަޕޫރު ކުންފުންޏަކާ އެކު އެއްބަސްވެފައި ވެ އެވެ. ވެކްސިން ދިނުމުގައި ދިވެހިންނާއި ރާއްޖޭގައި އުޅޭ ބިދޭސީންނަށް ތަފާތު ނުކުރާނެ ކަމަށް ކަމާ ގުޅޭ އިދާރާތަކުން އަންނަނީ ބުނަމުންނެވެ.
އެމްއެންޑީއެފުން ވަނީ ވެކްސިން އުފުލުމުގައި ސިފައިން ހަރަކާތްތެރިވަމުން އަންނަ ފޮޓޯތަކެއް އާންމުކޮށްފަ އެވެ. ނަމަވެސް އެކަމާ ބެހޭ ގޮތުން އެމްއެންޑީއެފުން އިތުރު އެއްވެސް މައުލޫމާތެއް ހާމައެއް ނުކުރެ އެވެ.
އެޗްޕީއޭ އިން އިއްޔެގެ ނިޔަލަށް ވަނީ 880 މީހަކަށް ވެކްސިން ދީފަ އެވެ. އިއްޔެ އެކަނި 554 މީހަކަށް ވެކްސިން ދިނެވެ. އެއީ ހަމައެކަނި މާލެ އާއި ކުޅުދުއްފުށި އަދި އައްޑޫގަ އެވެ. އަދި މިއަދުން ފެށިގެން ރާއްޖޭގެ ހުރިހާ ހޮސްޕިޓަލެއްގައި ވެކްސިން ދޭން ފަށައި އަދި މާދަމާ ހެލްތު ސެންޓަރުތަކުން ވެސް ވެކްސިން ދޭން ފަށާނެ އެވެ.