11 ފެބުރުއަރީ 2021 - 19:10
އިތުބާރު ނެތްކަމުގެ މައްސަލައާ ގުޅިގެން ކޮމިއުނިކޭޝަން މިނިސްޓަރު މަލީހު ޖަމާލާއި އެމްޑީޕީގެ ޕާލިމަންޓް ގްރޫޕު (ޕީޖީ) ލީޑަރު އަލީ އާޒިމާ ދެމެދު ސޯޝަލް ވަރުގަދަ ކޯޅުންގަނޑެއް މިއަދު ހިނގައިފި އެވެ.
އިއްޔެ ފެށި އެ ކޯޅުންގަނޑު ސޯޝަލް މީޑިއާގައި ބޮޑުވީ، ރައްޔިތުންގެ މަޖިލީހަށް ހުށަހަޅާފައިވާ މަލީހުގެ އިތުބާރު ނެތްކަމުގެ މައްސަލައަށް އޭނާ ރައްދު ދެއްވި ހިސާބުންނެވެ. ޖުމްހޫރީ ޕާޓީގެ ސްލޮޓުގައި މިނިސްޓަރުގެ މަގާމުގައި ހުންނެވި މަލީހު އިއްޔެ ކުރެއްވި ޓްވީޓުގައި ވިދާޅުވީ އަސާސީ ނެތް ކަމެއްގެ އިލްޒާމް އަޅުވައި އަދަބު ދޭން އުޅުމަކީ ދުސްތޫރާ ހިލާފު ކަމެއް ކަމަށެވެ.
އޭނާ ކުރައްވަން ޖެހިވަޑައިގަންނަވާ އެއްވެސް ކަމެއް ނުކޮށް ނޯންނާނެ ކަމަށް ވެސް ވިދާޅުވި އެވެ.
"ގާނޫނަށް ވުރެ މަތީގައި މި ގައުމުގެ ބަޔަކު އުޅެނީތޯ؟" ކޮމިއުނިކޭޝަން އޮތޯރިޓީގެ ގާނޫނުގެ ދަށުން ހަދަންޖެހޭ ގަވައިދުތައް ހެދިކަމުގެ ފޮޓޯއަކާއެކު ކުރެއްވި ޓްވީޓުގައި މަލީހު އެއްސެވި އެވެ.
އެކަމަށް ރައްދު ދެއްވަމުން އާޒިމް ތުހުމަތުކުރެއްވީ މަލީހު އުޅުއްވަނީ ރައްޔިތުންނަށް އޮޅުވާލަން ކަމަށެވެ. އަވަސް އަރުވާލައިގެން ގަވައިދު ހަދައި އޭޖީއަށް ފޮނުވާފައި ވަނީ އިތުބާރު ނެތްކަމުގެ މައްސަލަ އެމްޑީޕީ ޕީޖީން ނެގި ފަހުން ކަމަށާއި އެއްވެސް މީހަކު ގާނޫނަށް ވުރެ މަތީ ހުރެގެން ނުވާނެ ކަމަށް ވިދާޅުވި އެވެ.
ކޯޅުންގަނޑު ހޫނުވެގެން ދިޔައީ އޭގެ ފަހުންނެވެ. މަލީހު ވިދާޅުވީ އާޒިމަށް "ހަޖަމް ނުކުރެވިގެން" އުޅުއްވަނީ ބަރުލަމާނީ ނިޒާމާ ދެކޮޅަށް ވާހަކަދެއްކެވި ހިސާބުން ކަމަށެވެ.
"ރައްޔިތުންނަށް ވާނުވާ ނޭނގޭ ކަމަށްތޯ ހީކުރައްވަނީ. ހަކުރާގޭ ފެންޑާގަ އެކޮޅުކޮޅުން އެލުވިޔަސް މާއްދާ 27 ގެ ބޭނުން ހިފާނަން. ބިރެއް ނުދެއްކޭނެ،" މަލީހު ވިދާޅުވި އެވެ.
އެއަށް އާޒިމް ޖަވާބުދެއްވީ، އޭނާއަށް ބިރުދައްކަނީތޯ ކުރެއްވި ސުވާލުންނެވެ.
އެ ސުވާލަށް ޖަވާބު ދެއްވަމުން މަލީހު ވިދާޅުވީ ޕީޖީ ލީޑަރުގެ "ތާކިހާ" އަޅުއްވައިގެން ހަތަރުދަމު އާޒިމް އެ ކުރައްވާ މަސައްކަތަކީ ސަރުކާރު ބަލި ކަށިކުރުން ކަމަށެވެ.
"ފަހަރަކު ވަޒީރަކާ އެއްވެސް އަސާސެއް ނެތި ދިމާކޮށް ޖެއްސުން ކުރުން. މިނިސްޓަރު ފަޔާ، މަހޭ، އިމްރާން އަދި ޒަހާ. ތިކަމުން ލިބޭނެ މޮޅެއް ނޯންނާނެ. މާ ބޮޑާ ނުވެ ހުންނަވާ،" މަލީހު ވިދާޅުވި އެވެ.
އޭނާގެ އިތުބާރު ނެތްކަމުގެ މައްސަލަ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް މިދިޔަ ނޮވެމްބަރު މަހު ވެސް އެމްޑީޕީ ޕީޖީއަށް ހުށަހެޅުއްވި އެވެ. އެކަމަކު، މަޖިލީހަށް ހުށަހެޅުމުގެ ބަދަލުގައި އެމްޑީޕީ ޕީޖީން އޭރު ނިންމީ ރައީސް އިބްރާހިމް މުހައްމަދު ސޯލިހަށް ހުށަހަޅުއްވައިގެން އެ މައްސަލަ ކުރިއަށް ގެންދާށެވެ. މި ފަހަރު މަޖިލީހަށް މަލީހުގެ މައްސަލަ ހުށަހެޅިއަސް އެކަމާ މެދު ރައީސް އިބްރާހިމް މުހައްމަދު ސޯލިހު އަދި ގޮތެއް ނުނިންމަވަ އެވެ.