11 ނޮވެމްބަރ 2016 - 06:23
ވިޓަމިން ޑީ މަދުވުމުން ބްލެޑާގެ ކެންސަރު ޖެހުމުގެ ފުރުސަތު ބޮޑުވާ ކަމަށް ދިރާސާ ޓީމަކުން ބުނެފި އެވެ.
މި ޓީމުން ބުނެފައި ވަނީ ވިޓަމިން ޑީ މަދުވުމާއި ބްލެޑާގެ ކެންސަރާ ގުޅުން ހުރި ކަމަށް ހަތް ދިރާސާއެއްގެ ތެރެއިން ފަސް ދިރާސާއަކުން ދައްކާ ކަމަށެވެ. މިކަން އިތުރަށް ބެލުމަށް ސައިންސްވެރިން ކުރި މަސައްކަތުން އެނގުނު ގޮތުގައި ބްލެޑާގެ ސެލްތައް ވިޓަމިން ޑީ އަށް އިޖާބަދީ އެއާ ގުޅިގެން ހަރަކާތްތެރިވެ އެވެ. ނަތީޖާ އަކީ ބްލެޑާގެ ދިފާއީ ނިޒާމުސގެ ހަރަކާތްތެރިކަން އިތުރުވެ އޭގެ ހިމާޔަތަށް މަސައްކަތްކުރުން ކަމަށް ދިރާސާ ޓީމުން ބުނެފައިވެ އެވެ.
ދިރާސާގައި އިސްކޮށް ހުންނެވި، އިންގްލެންޑުގެ ޔުނިވަސިޓީ އޮފް ވޯވިކްގެ އެސޯސިއޭޓް ޕްރޮފެސަރު ރޯޒްމޭރީ ބްލާންޑް ވިދާޅުވެފައި ވަނީ އުނިކަން ހުންނަ ސެލްތަކުގެ ތެރެއިން ކެންސަރަށް ބަދަލު ވެދާނެ ސެލްތައް ދިފާއީ ނިޒާމުން ދެނެގަންނާނެ ކަމަށާއި އެހެންވެ ދިފާއީ ނިޒާމު ހަރަކާތްތެރިވުމުން ކެންސަރުގެ ނުރައްކާ ކުޑަވާނެ ކަމަށެވެ. އެހެންވެ މިއީ ބްލެޑާގެ ކެންސަރުން ސަލާމަތްވެ ތިބުމަށް ހޯދުނު މުހިންމު ހޯދުމެއް ކަމަށް އޭނާ ވިދާޅުވެފައިވެ އެވެ.
"ވިޓަމިން ޑީ އާއި ބްލެޑާގެ ކެންސަރާ ހުރި ގުޅުން އިތުރަށް ކަށަވަރު ކުރުމަށް އަދިވެސް އިތުރު ދިރާސާތައް ކުރަންޖެހޭ. އެކަމަކު މިހާރުވެސް މި ވަނީ ވިޓަމިން ޑީ މަދުވުމުން ބްލެޑާގެ ދިފާއީ މަސައްކަތް މަޑުޖެހޭކަން ހޯދިފައި،" ޔުނިވަސިޓީން ނެރުނު ނިއުސް ރިލީޒެއްގައި ބްލާންޑް ވިދާޅުވެފައިވެ އެވެ.
ދިރާސާއިން މިގޮތަށް ދެއްކި ނަމަވެސް ވިޓަމިން ޑީ ބޭނުންކުރުމުން ބްލެޑާގެ ކެންސަރުގެ ނުރައްކާ ކުޑަވެގެންދާ ކަމެއް ހޯދިފައެއް ނުވެ އެވެ.
"ވިޓަމިން ޑީ އަކީ ފަސޭހައިން ލިބޭ އަގު ހެޔޮ އެއްޗެއް. އެހެންވެ ވިޓަމިން ޑީ ބޭނުންކުރުމުން ކެންސަރުން ދުރުވެ އެތައް ބައެއްގެ ފުރާނަ ސަލާމަތްކުރެވިދާނެ،" ޕްރޮފެސަރު ވިދާޅުވެފައިވެ އެވެ.
ހަށިގަނޑަށް އަވި ލިބުމުން އަމިއްލަ ޒާތުގައި ވެސް ހަށިގަނޑުން ވިޓަމިން ޑީ އުފައްދަ އެވެ. ތެޔޮކަން ގަދަ މަހާއި ބިހަކީ ވެސް ވިޓަމިން ޑީ ލިއްބައިދޭ ކާނާ އެވެ.
މީގެ ކުރީގެ ބައެއް ދިރާސާތަކުން ވަނީ ވިޓަމިން ޑީ މަދުވުމާ ހިތުގެ ބަލިތަކާ ގުޅުން ހުރި ކަމަށް ވެސް ދައްކާފަ އެވެ.