10 ނޮވެމްބަރ 2016 - 10:58
ލިވަޕޫލް (ނޮވެމްބަރު 10) - އެވަޓަން އަށް ކުޅޭ ބެލްޖިއަމް ގައުމީ ޓީމުގެ ފޯވާޑް ރޮމެލޫ ލުކާކޫ އަކީ ބާސެލޯނާ އަށް ކުޅެވޭ ފެންވަރު ހުރި ކުޅުންތެރިޔެއް ކަމަށް އެވަޓަންގެ ކޯޗު ރޮނާލްޑް ކޫމަން ބުނެފި އެވެ.
އުމުރުން 23 އަހަރުގެ ލުކާކޫ އަކީ އެ އުމުރުގެ ކުޅުންތެރިންނަށް ބަލާއިރު މުޅި ދުނިޔެއިން ވެސް ފާހަގަކޮށްލެވޭ ފަދަ މޮޅު ކުޅުންތެރިޔެކެވެ. ކޫމަން ބުނީ އެވަޓަންގައި މި ވަގުތު ހުއްޓަސް ލުކާކޫ އަކީ މުސްތަގުބަލުގައި ޔޫރަޕްގެ އެންމެ މަތީ ފެންވަރު ކްލަބަކަށް ކުޅޭނެ ކުޅުންތެރިޔެއް ކަަމަށެވެ.
"ވަރަށް ގިނަ ކްލަބްތަކަށް އަހަރެން ކޯޗުކޮށްދީފިން. ވަރަށް ގިނަ ކުޅުންތެރިން ވެސް ފެނިއްޖެ. ލުކާކޫ އެ ހުރި އުމުރުގައި އޭނާގެ ފެންވަރު ކުޅުންތެރިޔަކު ނުދެކެން. ލުކާކޫ އަކީ ބާސެލޯނާ ފެންވަރުގެ ކުޅުންތެރިޔެއް. ނެދަލެންޑްސްގެ ކުރީގެ ތަރި ޕެޓްރިކް ކްލައިވަޓް ފަދަ ކުޅުންތެރިޔަކަށް ލުކާކޫ އަށް ވެވިދާނެ،" ކުރިން ބާސެލޯނާ އަށް ކުޅުނު ކޫމަން ބުންޏެވެ.
ޔޫރަޕްގެ ގިނަ ކްލަބްތަކަށް ކުރިން ކޯޗުކޮށްދިން ކޫމަން އެވަޓަންއާ ހަވާލުވީ މި ސީޒަނުގަ އެވެ. މިދިޔަ ސީޒަނުގައި އޭނާ ކޯޗުކޮށްދިނީ ސައުތެމްޓަން އަށެވެ.
ލުކާކޫ ސީނިއާ ފުޓްބޯޅަ ކެރިއަރު ފެށީ 2009 ވަނަ އަހަރު ބެލްޖިއަމްގެ އެންޑަލެކްޓުންނެވެ. އޭނާ ވަނީ އުމުރުން އެންމެ 16 އަހަރުގައި އެންޑަލެކްޓުގެ ސީނިއާ ޓީމަށް ކުޅެން ފަށައިފަ އެވެ. ލުކާކޫ ދެން ބަދަލުވީ 2011 ވަނަ އަހަރު 17 މިލިއަން ޕައުންޑްގެ އަގަކަށް ޗެލްސީ އަށެވެ. އެ އަށް ފަހު އޭނާ ވަނީ ލޯން އެއްބަސްވުމެއްގެ ދަށުން ވެސްޓް ބްރޮމް އަށް ވެސް ކުޅެފަ އެވެ. އޭނާ މިހާރުގެ ކްލަބް އެވަޓަނާ ގުޅުނީ 2013 ވަނަ އަހަރު ލޯން އެއްބަސްވުމެއްގެ ދަށުންނެވެ. އެހެން ނަމަވެސް ޖެހިގެން އައި ސީޒަނުގައި އެވަޓަން އިން ވަނީ ލުކާކޫގެ އެއްބަސްވުން ދާއިމީކޮށްފަ އެވެ.