23 ފެބުރުއަރީ 2021 - 12:34
ވޮޝިންޓަން (ފެބްރުއަރީ 23) - ކޮވިޑް ޖެހިގެން އެމެރިކާ އިން ބައި މިލިއަން މީހުން މަރުވެއްޖެ ކަމަށް ޖޯން ހޮޕްކިންސް ޔުނިވާސިޓީގެ ހިސާބުތަކުން ދައްކައިފި އެވެ.
ކޮވިޑް ޖެހިގެން ދެ ވަނަ އަށް މިހާތަނަށް އެންމެ ގިނަ މީހުން މަރުވެފައިވަނީ ބްރެޒިލުންނެވެ. ނަމަވެސް އެ ގައުމުން މަރުވި 247,276 މީހުންނަށް ވުރެ އެމެރިކާ އިން އެ ބަލީގައި މަރުވި މީހުންގެ އަދަދު ވަނީ ދެ ގުނަ އިތުރުވެފަ އެވެ.
ފަސް ލައްކަ މީހުންގެ މަރާ އެކު ގައުމާ މުޚާތަބް ކުރައްވަމުން ރައީސް ޖޯ ބައިޑަން ވިދާޅުވީ ގައުމެއްގެ ގޮތުގައި މިވަރުގެ ބޮޑު ދެރައެއް ބަލައިނުގަނެވޭނެ ކަމަށެވެ.
"އެމެރިކާގެ ހުރިހާ ރައްޔިތުންގެ ކިބައިން އަޅުގަނޑު މިދެނީ މި ބަލީގައި މަރުވެ ދިޔަ މީހުންގެ ހަނދާންތައް އާކުރުމަށް،" ކޮވިޑާ ދެކޮޅަށް އެމެރިކާގެ ރައްޔިތުން މަސައްކަތް ކުރުމަށް އިލްތިމާސް ކުރެއްވުމާ އެކު ބައިޑަން ވިދާޅުވި އެވެ.
ރައީސް ބައިޑަން އާއި ނައިބް ރައީސް ކަމަލާ ހަރިސް ވަނީ މަރުވެ ދިޔަ މީހުންގެ ހަނދާނުގައި ސްކޫތެއް ގެންނަވައިފަ އެވެ. ބައިޑަން ވަނީ ކުރިއަށް އޮތް ފަސް ދުވަހު އެމެރިކާގެ ދިދަ ބައިދަނޑިއަށް ތިރިކުރަން އަންގަވައިފަ އެވެ.
ވައިޓް ހައުސްގައި ބައިޑަންގެ ތަގްރީރު ފެއްޓެވީ ފުރަތަމަ ބޮޑު ހަނގުރާމަ އާއި ދެ ވަނަ ބޮޑު ހަނގުރާމަ އަދި ވިއެޓްނާމް ހަނގުރާމައި މަރުވި އެމެރިކާ މީހުންގެ އަދަދު އެއްކޮށްލުމުން ވެސް، ކޮވިޑްގައި މަރުވި މީހުންގެ އަދަދު އިތުރުކަން ފާހަގަ ކުރައްވަމުންނެވެ.
ރައީސް ޖޯ ބައިޑަންގެ ޗީފް މެޑިކަލް އެޑްވައިޒަރު ޑރ. އެންތަނީ ފައުޗީ ވިދާޅުވީ 1918 ވަނަ އަހަރުގެ އިންފްލުއެންޒާ ރޯގާ އަށް ފަހު ވޭތުވެދިޔަ 100 އަހަރު ދުވަހު ތެރޭ ވެސް މިއާ ކައިރިކުރާ ވަރުގެ ރޯގާއެއް ދުނިޔެ ދެކެފައި ނުވާ ކަމަށެވެ.
ކޮވިޑް ޖެހިގެން އެމެރިކާ އިން ފުރަތަމަ ފަހަރަށް މީހަކު މަރުވެފައި ވަނީ މިދިޔަ އަހަރުގެ ފެބްރުއަރީ މަހު އެވެ. މަރުވި މީހުންގެ އަދަދު އެއް ލައްކަ އަށް އަރަން ނެގީ ތިން މަސް ދުވަހެވެ. އަދި އިތުރު ހަތަރު މަސް ދުވަސް ތެރޭ ވަނީ ދެ ލައްކަ އަށް އަރައިފަ އެވެ. އަނެއްކާވެސް އިތުރު ތިން މަސް ތެރޭ ވަނީ ތިން ލައްކަ މީހުން މަރުވެފަ އެވެ. މިދިޔަ ޖެނުއަރީ މަހު މެދަކާ ހަމައަށް ދިޔަ އިރު ވަނީ އެމެރިކާ އިން ހަތަރު ލައްކަ މީހުން މަރުވެފަ އެވެ. އޭގެ ފަހުން ލައްކައެއްހާ މީހުން މަރުވެފައި މި ވަނީ މަހެއްހާ ދުވަސް ތެރޭގަ އެވެ.
އެމެރިކާ އިން މަރުވާ މީހުންގެ އަދަދު އިތުރުވަމުންދާއިރު އެ ގައުމުގައި މިހާރު ވަނީ ކޮވިޑް ވެކްސިން ދޭން ފަށައިފަ އެވެ. ސެންޓަ ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުނެފައި ވަނީ މިހާތަނަށް 61 މިލިއަން މީހުން ވަނީ ވެކްސިންގެ ފުރަތަމަ ޑޯޒް ޖަހައިފައި ކަމަށެވެ. އަދި ދެ ވަނަ ޑޯޒް ފުރިހަމަކުރި މީހުންގެ އަދަދު ވަނީ 18 މިލިއަނަށް އަރައިފަ އެވެ.
ރައީސް ޖޯ ބައިޑަންގެ ވެރިކަމުގެ ފުރަތަމަ 100 ދުވަސްތެރޭ 100 މިލިއަން މީހުންނަށް ވެކްސިން ދިނުމުގެ އަމާޒެއް ވަނީ ކަނޑައަޅައިފަ އެވެ. އެމެރިކާގައި ދުވާލަކު އެވްރެޖްކޮށް 1.7 މިލިއަން މީހުން ވެކްސިން ޖަހަ އެވެ.
އެމެރިކާ އިން މިހާތަނަށް ވަނީ 28.8 މިލިއަން މީހުން ކޮރޯނާވައިރަހަށް ޕޮޒިޓިވްވެފަ އެވެ.