25 ފެބުރުއަރީ 2021 - 07:12
ފާއިތުވި ހަ އަހަރުގެ ތެރޭގައި އެޕަލް އިން 100 ކުންފުނި ގަނެފައިވާނެ ކަމަށާއި އެކަމުގެ ސަބަބުން ކުންފުނީގެ މަސައްކަތްތައް ފުޅާވެ، ވަރުގަދަވަމުން އަންނަ ކަމަށް އެޕަލްގެ ސީއީއޯ ޓިމް ކުކް ވިދާޅުވެއްޖެ އެވެ.
އަންގާރަ ދުވަހު ބޭއްވި އެޕަލްގެ އަހަރީ ބައްދަލުވުމުގައި ޓިމް ވިދާޅުވީ ހަ އަހަރުގެ ތެރޭގައި 100 ކުންފުނި ގަތުމުގެ މާނަ އަކީ އެ މުއްދަތުގެ ތެރޭގައި ކޮންމެ ތިނެއް ނުވަތަ ހަތަރު ހަފުތާ އިން ކުންފުންޏެއްގެ އެޕަލްގެ މިލްކުވެރިކަމުގެ ދަށުން އައުން ކަމަށެވެ.
މިދިޔަ އަހަރު އާމްދަނީގެ ގޮތުގައި 111.4 ބިލިއަން ޑޮލަރު ލިބުނު އެޕަލްއާ ބެހޭ ގޮތުން ޓިމް ވިދާޅުވީ ޓެކް ދާއިރާ އަށް ހާއްސަ ކުންފުނިތައް ގަތުމުގެ މައިގަނޑު ބޭނުމަކީ ޓެކްނޮލޮޖީގެ ދާއިރާ އަށް އަންނަ ބޮޑެތި މުހިއްމު ކުރިއެރުންތަކާއި އެ ދާއިރާގެ ހުނަރުތައް އެޕަލްގެ ތެރެއަށް ގެނައުން ކަމަށެވެ.
ފާއިތުވި 10 އަހަރުގެ ތެރޭގައި އެޕަލް އިން މިހާތަނަށް އެންމެ ބޮޑު އަގެއް ދީފައި ގަތް ކުންފުންޏަކީ ބީޓްސް އިލެކްޓްރޯނިކްސް އެވެ. އެމެރިކާގެ ރެޕާ/ޕްރޮޑިއުސަރު ޑރ. ޑީއާރްއީ (އެންޑްރޭ ރޮމެލް ޔަންގް) ގެ ހެޑްފޯނު ކުންފުނި 2014 ގައި އެޕަލް އިން ގަތީ 3 ބިލިއަން ޑޮލަރަށެވެ. އަދި މިއުޒިކް ރިކޮގްނޮޝަން ސޮފްޓްވެއާ ކުންފުނި ޝަޒަމް 2018 ގައި އެޕަލް އިން ގަތީ 400 މިލިއަން ޑޮލަރަށެވެ. އެޕަލް އިން އެންމެ ފަހުން ގަތް ކުންފުންޏަކީ މިދިޔަ ޖެނުއަރީ މަހު ގަތް ފިންލެންޑްގެ ކިއުރިއަސް އޭއައި އެވެ.
ކުންފުނިތައް ގަތުގައި އެޕަލް އިިން އަބަދު ވެސް އެންމެ ބޮޑަށް ބަލަނީ ފާހަގަކޮށްލެވޭ ކަހަލަ މޮޅެތި ޓެކްނޮލޮޖީ އީޖާދުކުރާ ހުނަރުވެރި ކުދި ކުންފުނިތަކަށެވެ. އަދި އެ ކުންފުނިތައް ގަނެ، އެޕަލްގެ މަސައްކަތުގެ ތެރެއަށް ފައްތައި، އުފެއްދުންތައް ފެންވަރު ރަނގަޅުކުރަން އަބަދު ބެސް ހާއްސަ ސަމާލުކަމެއް ދެ އެވެ.
އެގޮތުން އެޕަލްގެ ފޭސްއައިޑީ ޓެކްނޮލޮޖީ އަކީ އިޒްރާއީލްގެ 3ޑީ ސެންސިން ކުންފުނި ޕްރައިމް ސެންސް ގަނެގެން ތަރައްގީކޮށްފައުވާ ޓެކްނޮލޮޖީއެކެވެ.
މިދިޔަ އަހަރު އެޕަލް އިން 9 ކުންފުންޏެއް ގަތެވެ. އޭގެ ތެރޭގައި އާޓިފިޝަލް އިންޓެލިޖެންސް (އޭއައި) އަށް ހާއްސަ ކުންފުނިތަކާއި ވާޗުއަލް ރިއަލިޓީ (ވީއާރް) އިވެންޓް ބިޒްނެސް ކުންފުނިތަކާއި ޕޭމަންޓް ސްޓާޓަޕްތަކުގެ އިތުރުން ޕޮޑްކާސްޓް ކުންފުނިތައް ވެސް ހިމެނެ އެވެ. އެގޮތުން ނެކްސްޓް ވީއާރް އާއި ވިއޮސިސް އާއި ފްލީޓްސްމިތާއި މޮބީވޭވް އަދި ސްޕޭސެސް ހިމެނެ އެވެ.
ދެހާސް ނަވާރައިގައި އެޕަލް އިން ގަތް އެންމެ ހާއްސަ އެއް ކުންފުންޏަކީ ސެލްފް-ޑްރައިވިން ޝަޓްލް ކުންފުނި ޑްރައިވް-އޭއައި އެވެ. އެ ކުންފުނި އެޕަލް އިން ގަނެފައިވާ އިރު "ސެލްފް-ޑްރައިވިން" ކާރު އުފައްދަން އެޕަލް އިން އުޅޭ ވާހަކަ އަކީ މިދިޔަ އަހަރުން ފެށިގެން މީޑިއާތަކުގައި ވަރަށް ގަދަ ދެކެވެމުން އަންނަ ވާހަކައެކެވެ. ރިޕޯޓްތައް ބުނާގޮތުން އަމާޒަކީ 2024-2025 ހިސާބުގައި އެޕަލްފެ "ސެލްފް-ޑްރައިވިން" ކާރު ނެރުމެވެ.
އެޕަލް އިން ވަނީ 2016 ގައި ޗައިނާގައި އެއްގަމު ދަތުރުފަތުރުގެ ހިދުމަތް އޮންލައިންކޮށް ދޭ ކުންފުނި ޑިޑީ ޝުޒިންގެ އެއް ބިލިއަން ޑޮލަރުގެ ހިއްސާ ވެސް ގަނެފަ އެވެ.
މީގެ 44 އަހަރު ކުރިން ވުޖޫދަށް އައި އެޕަލް އަކީ 2 ޓްރިލިއަން ޑޮލަރުގެ އަގުހުރި ކުންފުންޏެކެވެ.