03 ޖޫން 2016 - 00:12
އޭޝިއަން ކަޕް ކޮލިފައިންގައި މިރޭ ކުޅުނު މެޗުން ރާއްޖެ އަތުން 2-0 އިން މޮޅުވި ނަމަވެސް މެޗުގެ މޮޅު ކުޅުންތެރިޔަކީ ރާއްޖެ ޓީމުގެ ގޯލު ކީޕަރު އިމްރާން މުހައްމަދު ކަމަށް ޔަމަނުގެ ކޯޗު އަބްރަހަމް މެބްރަތޫ ބުނެފި އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން މެބްރަތޫ ބުނީ މި މެޗުގައި އޭނާގެ ޓީމަށް ގިނަ ލަނޑުތަކެއް ޖެހެން ދިޔަ ކަމަށާއި އެހެން ނަމަވެސް ކާމިޔާބު ނުވީ އިމްރާންގެ ސަބަބުން ކަމަށެވެ.
"އަހަރެމެން މޮޅުވިޔަސް މި މެޗުގެ މޮޅު ކުޅުންތެރިޔަކީ ރާއްޖޭގެ ކީޕަރު (އިމްރާން). އަހަރެން މެޗަށް ފަހު އެންމެ ފުރަތަމަ ވެސް އިސްވެގަތީ އިމްރާނާ ސަލާމްކޮށް އޭނާ އަށް މަރުހަބާ ކިޔަން. މި މެޗުގައި އޭނާ ދެއްކީ ތަފާތު މޮޅު ކުޅުމެއް،" އޭނާ ބުންޏެވެ.
މެޗުގެ ކުރިން ކޯޗު ބުނީ ރާއްޖޭގެ ޓީމާ ބެހޭގޮތުން މައުލޫމާތު ލިބިފައިވީ ނަމަވެސް އެކަމާ ބެހޭގޮތުން ވާހަކަނުދައްކާނެ ކަމަށެވެ. އޭނާ އޭރު ބުނީ މެޗަށް ފަހު އެ ސުވާލަށް ޖަވާބު ދޭނެ ކަމަށެވެ.
މެޗަށް ފަހު އޭނާ ބުނީ ރާއްޖެ ޓީމުގެ އެއް ވަނަ ކުޅުންތެރިޔާ (ދަގަނޑޭ) ނުކުޅޭކަން އެނގުމުން އެއީ ލިބުނު ފަސޭހައެއްގެ ގޮތުގައި ދެކުނު ކަމަށެވެ.
"އަހަރެމެންނަށް އެނގޭ ރާއްޖޭގެ އެންމެ މޮޅު ކުޅުންތެރިޔާ އަލީ (ދަގަނޑޭ) ނުކުޅޭކަން. އެއްވެސް ޓީމަކަށް ފަސޭހަ ނުވާނެ އެންމެ މޮޅު ކުޅުންތެރިޔާ ނުލައި ކުޅެން. އެހެންވެ ކޮންމެވެސް ވަރަކަށް ޕްރެޝަރު ދިޔަ. ދެން އެނގޭ ރާއްޖެ ކުޅެނީ ފަޅިންނާއި ކައުންޓަ އެޓޭކްގައި ކަން. ދެން އެކަން ހުއްޓުވީމަ ލިބުނު މޮޅެއް މިއީ،" ކޯޗު ބުންޏެވެ.
ފުރަތަމަ ލެގުން ރަށުން ބޭރުގައި މޮޅުވިޔަސް އަދި ދެން އޮތް ބުރުގެ ޖާގައެއް ޔަމަނަށް ޔަގީން ނުވާ ކަމަށާއި ދެން އޮތް މެޗުގައި ރާއްޖޭގެ ފަރާތުން ރަނގަޅު ކުޅުމެއް ފެންނާނެ ކަމަށް އުއްމީދުކުރާ ކަމަށް ވެސް އޭނާ ބުންޏެވެ.
"ދެން އޮތް ބުރުގެ ޖާގައެއް ޔަގީންނުވޭ. އެއީ ރާއްޖެ ދެން ނުކުންނާނީ ވަރަށް ރަނގަޅަށް ތައްޔާރުވެގެން. ދެން ބޭނުމީ މި މެޗަށް ވުރެން ރަނގަޅަށް ކުޅެގެން ދެން އޮތް މެޗުން ކާމިޔާބު ހޯދަން. މިރޭގެ މެޗުގައި ލިބުނު ފުރުސަތުތައް ނިންމާލުމުގެ މައްސަލަތައް ދިމާވި. ދެން އޮތް މެޗުގައި އެކަން ރަނގަޅުކުރަން މަސައްކަތް ކުރާނަން،" މެބްރަތޫ ބުންޏެވެ.
މިއަދު ނެރުނު ފީފާ ރޭންކިންގައި ޔަމަނު އޮތީ ރާއްޖެ އަށް ވުރެން ހަތަރު ދަރަޖަ ފަހަތުގަ އެވެ. ޔަމަނު 178 ވަނަައިގައި އޮތްއިރު ރާއްޖެ އޮތީ 174 ވަނައިގަ އެވެ. ރާއްޖެ އާއި ޔަމަން ކުޅޭ ދެ ވަނަ ލެގުގެ މެޗު އޮންނާނީ އަންނަ އަންގާރަ ދުވަހު ގަތަރުގެ ދޯހާގަ އެވެ. އެ މެޗު ޔަމަނުގައި ނުކުޅެނީ ސަލާމަތީ ސަބަބުތަކަށް ބެލުމަށް ފަހު އެވެ.