12 މާޗް 2021 - 14:39
ފީފާ ވޯލްޑް ކަޕާއި އޭޝިއަން ކަޕުގެ ޖޮއިންޓް ކޮޮލިފައިންގައި ރާއްޖެ ހިމެނޭ ގްރޫޕް އޭގައި ބާކީ ހުރި މެޗުތައް ޗައިނާގައި އަންނަ ޖޫން މަހު ކުޅޭ ގޮތަށް އޭއެފްސީން ނިންމައިފި އެވެ.
އޭއެފްސީން މިއަދު ވަނީ ސެންޓްރަލައިޒްކޮށް ކޮލިފައިންގެ ބާކީ ހުރިހާ މެޗެއް ކުޅޭނެ ގައުމުތައް ނިންމައިފަ އެވެ. އެ ގޮތުން ރާއްޖެ ގްރޫޕްގެ ބާކީ އަށް މެޗު ކުޅޭނީ ޗައިނާގަ އެވެ. ދެން ހުރި ގްރޫޕްތަކުގެ މެޗުތަކުގެ ހޯސްޓުންނަށް ހަމަޖައްސާފައިވަނީ ކުވޭތާއި ބަހްރޭން، ސައުދީ އަރަބިއްޔާ، ގަތަރު، ޖަޕާން، ޔޫއޭއީ އަދި ކޮރެއާ ރިޕަބްލިކް އެވެ.
ރާއްޖެ ގްރޫޕްގައި ޗައިނާ އާއި ރާއްޖޭގެ އިތުރުން ދެން ހިމެނެނީ ސީރިއާ، ގުއާމް އަދި ފިލިޕީންސް އެވެ.
ކޮވިޑް-19ގެ ސަބަބުން އައި މެދުކެނޑުމާ ހެދި ވޯލްޑް ކަޕް ކޮލިފައިންގައި އެންމެ ފުރަތަމަ މެޗުތައް ފަސްކުރީ މިދިޔަ އަހަރު ކުރީކޮޅުގަ އެވެ. މިދިޔަ އަހަރު މާޗް މަހު 26 ވަނަ ދުވަހާއި 31 ވަނަ ދުވަހު ކުޅެން އޮތް މެޗުތައް ފުރަތަމަ ފަސްކޮށްފައި ބާއްވަން ތާވަލުކުރީ މިދިޔަ އޮކްޓޫބަރާއި ނޮވެމްބަރު މަހުގަ އެވެ. ކޮވިޑް-19ގެ ހާލަތުން އަރައިގަންނަން ކުރި މަސައްކަތުގައި ކުރިއެރުމެއް ނުލިބި އޮކްޓޫބަރާއި ނޮވެމްބަރުގައި ވެސް މެޗުތައް ބޭއްވޭނެ ގޮތް ނުވުމުން ދެ ވަނަ ފަހަރަށް މެޗުތައް ފަސްކުރީ މި މަހު ބާއްވާ ގޮތަށެވެ. އޭއެފްސީން މިިދިޔަ މަހު ނެރުނު ބަޔާނުގައި ބުނެފައިވަނީ މި މަހު ކުޅެން ހަމަޖެހިފައިވާ މެޗުތަކުގެ ތެރެއިން ހަތަރު މެޗެއް ފިޔަވައި ދެން ހުރި ހުރިހާ މެޗެއް ކުޅޭނީ ޖޫން މަހު ކަމަށެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ދާދި ފަހުން އެ އެސޯސިއޭޝަނުން ސިލްސިލާކޮށް ކުރިއަށްގެންދާ "ލެޓްސް ޓޯކް ފުޓްބޯލް ޝޯ" ގައި ވާހަކަ ދައްކަވަމުން ވިދާޅުވީ މާލެ ސަރަހައްދުގައި ކޮވިޑް-19ގެ ކޭސްތައް ގިނަވާތީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެޅި ފިޔަވަޅުތަކުގެ ތެެރެއިން ރާއްޖޭގެ ފުޓްބޯޅަ ސީޒަން މެދުކަނޑާލާފައި އޮތުމާއި ރާއްޖޭގެ ހާލަތު އޮތްގޮތުން ބެލުމަށް ފަހު އޭއެފްސީން ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގައި މި މަހު ރާއްޖެ ކުޅެން އޮތް މެޗުތައް ޖޫން މަހަށް ފަސްކުރީ ކަމަށެވެ.
އޭއެފްސީގެ މިއަދުގެ ނިންމުމާ އެކު ރާއްޖެ އަށް ދެން މި ފަހަރުގެ ވޯލްޑް ކަޕް ކޮލިފައިންގައި ހޯމް މެޗެއް ނޯންނާނެ އެވެ. ކުރިން އޮތް ޝެޑިއުލާ އެއްގޮތަށް ކުރިއަށްދިޔަނަމަ މި މަހު 30 ވަނަ ދުވަހު ރާއްޖޭން މާލޭގައި ސީރިއާއާ ދެކޮޅަށް ކުޅޭނެ އެވެ.
ޗައިނާ އިން ސެންޓްރަލައިޒްކޮށް އެ ގައުމުގައި ގްރޫޕްގެ ހުރިހާ މެޗެއް ކުޅެން މަޝްވަރާތައް ފެށީ މިދިޔަ މަހު ކުރީކޮޅުގަ އެވެ. އޭރު މަޝްވަރާތައް ފެށިއިރު، މި ގްރޫޕްގައި ޗައިނާ ނޫން ދެން އޮތް ހަތަރު ޓީމުގެ ތެރެއިން ހުރިހާ މެޗެއް ޗައިނާގައި ކުޅެން ދެކޮޅު ހެދި ހަަމައެކަނި ޓީމަކީ ރާއްޖެ އެވެ. އެއީ އަމިއްލަ ދަނޑުގައި ކުޅެން ލިބޭ މެޗެއް ގެއްލެން ބޭނުންނުވާތީ އެވެ. އެކަމަކު އެންމެ ފަހު ވަގުތު ކޮވިޑް-19ގެ ހާލަތާ ހެދި ޗައިނާގައި ހުރިހާ މެޗެއް ކުޅޭ ގޮތަށް އޭއެފްސީން ނިންމީ އެވެ.
- ޗައިނާ - ރާއްޖެ، ގުއާމް - ފިލިޕީންސް (ޖޫން 3)
- ގުއާމް - ޗައިނާ، ރާއްޖެ - ސީރިއާ (ޖޫން 7)
- ޗައިނާ - ފިލިޕީންސް، ގުއާމް - ސީރިއާ (ޖޫން 11)
- ޗައިނާ - ސީރިއާ، ރާއްޖެ - ފިލިޕީންސް (ޖޫން 15)
ރާއްޖެ އޮތީ ހަތަރު މެޗުން ހަ ޕޮއިންޓާ އެކު ކޮލިފައިން ގްރޫޕުގެ ހަތަރު ވަނައިގަ އެވެ. ގްރޫޕުގެ އެއް ވަނައިގައި އޮތީ ފަސް މެޗުން 15 ޕޮއިންޓާ އެކު ސީރިއާ އެވެ. ޗައިނާ ހަތަރު މެޗުން ހަތް ޕޮއިންޓާ އެކު ދެ ވަނައިގައި އޮތްއިރު ތިން ވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. ރާއްޖޭގެ ފަހަތުން ފަސް ވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ. ރާއްޖޭގެ ޓާގެޓަކީ ގްރޫޕްގެ ރަނގަޅު ހިސާބެއްގައި ނިންމާލައި 2023 ވަނަ އަހަރުގެ އޭޝިއަން ކަޕަށް ކޮލިފައިވުމެވެ.
މިދިޔަ އަހަރު ކުރީކޮޅު ގައުމީ ޓީމާ ހަވާލުވި ކޯޗު ނެދަލެންޑްސްގެ މާޓިން ކޫޕްމަންގެ އިރުޝާދުގެ ދަށުން މިހާތަނަށް ރަސްމީކޮށް އަދި މެޗަކަށް ނުކުމެފައެއް ނުވެ އެވެ. ދެ ފަހަރެއްގެ މަތިން ޕްރެކްޓިސްތައް ކުރިއަށްގެންގޮސްފައިވާއިރު، ކޮވިޑާ ހެދި މެޗުތައް ފަސްކުރުމުން ޕްރެކްޓިސް ހުއްޓާލަން ޖެހުނީ އެވެ. ދާދި ފަހުން އެފްއޭއެމުން ވަނީ ކޫޕްމަންއާ އެކު ހަދާފައިވާ އެއްބަސްވުން އިތުރު ތިން އަހަރަށް އާ ކޮށްފަ އެވެ.
ޗައިނާ އިން ސެންޓަރަލައިޒްކޮށް ހުރިހާ މެޗެއް ކުޅެން އެންމެ ފުރަތަމަ ބޭނުންވީޝަންހާއީގެ ޕުޑޮން ސްޓޭޑިއަމްގަ އެވެ. އެކަމަކު ފަހުން އެ ދަނޑުގައި މެޗުތައް ކުޅެވޭ ގޮތް ނުވުމުން މިހާރު މެޗުތައް ކުރިއަށްގެންދަން ކަނޑައަޅާފައިވާ ސިޓީ އަކީ ސޫޒޯ އެވެ.