12 މާޗް 2021 - 23:08
ކޮވިޑް-19 ގެ ތެރޭގައި ލޯކަލް ކައުންސިލްތަކުގެ އިންތިހާބު ބޭއްވުމަށް ކެމްޕޭން ކުރުމުގައި އަމަލުކުރުމަށް އެޗްޕީއޭ އިން ކަނޑައެޅި އުސޫލު އިސްލާހުކޮށް، ކަރަންޓީނު ނުވެ ކެމްޕޭނަށް ރަށްރަށަށް ދެވޭ ގޮތަށް ގެނައި ބަދަލު އުވާލައިފި އެވެ.
އެޗްޕީއޭ އިން ކުރި ޓްވީޓެއްގައި ބުނީ މި ބަދަލު އުވާލީ އާންމުންގެ ގިނަ ކަންބޮޑުވުންތަކެއް ހުރުމުން ކަމަށެވެ.
"ރައްޔިތުންގެ ގިނަ ކަންބޮޑުވުންތަކެއް ހުރުމާ ގުޅިގެން ކޮވިޑް-19 ގެ ހާލަތުގައި ރައްކާތެރިކަމާ އެކު ލޯކަލް ކައުންސިލްތަކުގެ އިންތިޚާބު ކުރިއަށް ގެންދިއުމުގައި އަމަލުކުރުމަށް ކަނޑައަޅާފައިވާ އުސޫލުގެ 12 ވަނަ މާއްދާއަށް ގެނައި އިޞްލާޙް އުވާލަން ނިންމައިފީމެވެ." އެޗްޕީއޭ އިން ކުރި ޓްވީޓްގައިވެ އެވެ.
އާންމުންގެ އިތުރުން އެތައް ޑޮކްޓަރުންނެއް ވެސް ވަނީ ބަލި ފެތުރިފައިވާ ރަށްރަށުން ބަލި ނެތް ރަށްރަށަށް ގޮސް ކަރަންޓީނު ނުވެ އުޅެވޭ ގޮތަށް ގެނައި އިސްލާހަށް ފާޑުކިޔައި އެކަން ބަދަލުކުރުމަށް ގޮވާލައިފަ އެވެ.
ކަރަންޓީނު ނުވެ ފަސް ދުވަހަށް ވުރެ ކުރު މުއްދަތަކަށް ރަށްރަށަށް ގޮސް ކެމްޕޭނު ކުރެވޭ ގޮތަށް އުސޫލު ބަދަލުކުރީ ކެމްޕޭނުކުރަން ފުރުސަތު ނުލިބޭ ކަމަށް ބުނެ ޕާޓީތަކާއި އިލެކްޝަންސް ކޮމިޝަނުން ކުރި ޝަކުވާތަކަށް ފަހުގަ އެވެ. އެކަމަކު އާންމުންގެ އެތައް ބަޔަކު ބަންދުވެފައި ތިއްބާ ސިޔާސީ ބޭނުމަށް ރަށްރަށް ދާން ހުއްދައެއް ލިބުމުން އެކަމަށް ވަރަށް ބޮޑަށް ފާޑުކިޔުން އަމާޒުވި އެވެ.
- ކެނޑިޑޭޓުން ދޮރުން ދޮރަށް ކެމްޕެއިން ނުކުރުން
- ރަށްރަށަށް ފުރުމުގެ ކުރިން އެޗްޕީއޭ އާއި ކައުންސިލްގެ ހުއްދަ ނެގުން
- ކޮވިޑް-19 ގެ އަލާމާތެއް ހުރި ނަމަ ދަތުރު ނުކުރުން
- ރަށްރަށުގައި ގެތަކުގެ މީހުންނާ އެއްވެ ކައިބޮއެ ހެދުން ފަދަ ކަންކަން ނުކުރުން
- މީހުން ދިރިއުޅޭ ގެއެއްގައި މަޑު ކުރާނަމަ އެ ގެއެއް މޮނިޓަރިންނަށް ލުން
- ކެފޭ ރެސްޓޯރަންޓުތަކަށް ނުދިޔުން
- މަރުހަބާ ކިޔަން މީހުން އެއް ނުކުރުން
އިސްލާހުގައިވާ ގޮތުން ހާއްސަ ގައިޑްލައިންގެ ދަށުން ދަތުރުކުރާ އެއްވެސް ކެންޑިޑޭޓަކު ނުވަތަ ފަރާތަކުން އުސޫލާ ހިލާފުވެއްޖެ ނަމަ ދެން އެ ފަރާތަކުން ދަތުރުކުރުމުގައި އަމަލުކުރަން ޖެހޭނީ ކަރަންޓީނުގެ އުސޫލަށެވެ. ކައުންސިލް އިންތިހާބަށް އެޗްޕީއޭއިން އެންމެ ފުރަތަމަ ނެރުނު ގައިޑްލައިން ހެދީ ސިޔާސީ މީހުން ވެސް ކަރަންޓީން ވާން ޖެހޭ ގޮތަށެވެ.