13 މާޗް 2021 - 15:04
ކްރިމިނަލް ކޯޓުގައި އޭސީއެއް ހަރުކުރަން އުޅުނު ދެ މީހަކު ވެއްޓި ވަރަށް ބޮޑަށް އަނިޔާވެއްޖެ އެވެ.
މަންޒަރުދުށް މީހަކު ބުނިގޮތުގައި މިއަދު މެންދުރު އޭސީ ހަރުކުރަން އެ ދެ މީހުން އަރާ ތިބީ، ދަގަނޑު ބޮޑު ހަރުގަނޑެއް ނުވަތަ ޖުންގެއްގެ މަތީގަ އެވެ. ދެ މީހުން ވެސް ވެއްޓުނީ، ގާތްގަނޑަކަށް 15ވަރަކަށް ފޫޓު އުސް މިން ހުރި އެ ހަރުގަނޑާއެކުގަ އެވެ.
މަންޒަރު ދުށް މީހަކު ބުނިގޮތުގައި ދެ މީހުން ވެސް އޮތީ ހަރުގަނޑު ދަށުވެފަ އެވެ. ދެ މީހުންނަށް ބޮޑެތި އަނިޔާތައް ވީއިރު، ވަރަށް ގިނައިން ލޭ އެތަނުގައި ހުއްޓެވެ.
ފުލުހުން ބުނީ އޭސީ ހަރުކުރަން އުޅުނު ދެ މީހަކު ވެއްޓި އަނިޔާވެގެން އައިޖީއެމްއެޗުގައި މިހާރު ފަރުވާ ދެމުން އަންނަ ކަމަށެވެ. އެކަމަކު ލިބުނު އަނިޔާގެ ތަފްސީލެއް، ފުލުހުންނާއި އައިޖީއެމްއެޗަކުން ވެސް އަދި ނުބުނެ އެވެ.
ދަނގަޑު ހަރުގަނޑު ވެއްޓުނީ، ކޯޓުގެ ބޭރު ފާރު މައްޗަށް ކަމުން، ވެއްޓުނު ގަޑީގައި ވަރަށް އަޑުގަދަވި އެވެ. އަދި ކައިރީގައި ހުރި ދަނޑުވެރިންގެ މާރުކޭޓާއި އެ ސަރަހައްދުގައި އުޅުނު ގިނަ ބަޔަކު އެތަނަށް އެއްވި އެވެ.