20 މާޗް 2021 - 12:14
ފްރާންސްގެ މާޓް ނިޓަލް އާއި ނެޓަލީ ނިޓަލް، ރާއްޖޭގެ ރީތިކަން ބަލައި އަދިވެސް ފޫއްސެއްނުވެ އެވެ. މިއަދު އެ މީހުންގެ އާ ޗުއްޓީއަށް ރާއްޖެއަށް ކުރި ޒިޔާރަތަކީ 63 ވަނަ ދަތުރެވެ.
ނިޓަލްގެ ދެމަފިރިން މީގެ 30 އަހަރު ކުރިން 1991 ގައި އެމީހުންގެ ޗުއްޓީގެ އާންމު މަންޒިލަކަށް ރާއްޖެ ހެދި ފަހުން ރާއްޖޭގެ ރީތި މާހައުލުން ހިތްހަމަޖައްސާނުލައި ނުހުރެވެ އެވެ. އެމީހުންގެ ހިތުގައި އޮތް އެ ހާއްސަ ލޯބީގެ އަގުވަޒަންކުރުމުގެ ގޮތުން މިއަދު ޓޫރިޒަމް މިނިސްޓްރީން ވަނީ ވެލާނާ އިންޓަނޭޝަނަލް އެއާޕޯޓްގައި ހާއްސަ މަރުހަބާކިޔުމެއް ވެސް ބާއްވައިފަ އެވެ.
ނެޓަލީ ބުނީ ރާއްޖޭގެ ރީތިކަމުގެ އިތުރުން ދިވެހިންގެ ހިތްހެޔޮކަމާއި މެހެމާންދާރީ ވެސް ވަރަށް ކަމުދާ ކަމަށެވެ. އެހާ ގިނަ ފަހަރު ރާއްޖެ އައިސްފައި ވާތީ ރާއްޖޭގައި އެމީހުންގެ ރަހުމަތްތެރިން ވެސް އެބަ ތިބި ކަމަށް އޭނާ ބުންޏެވެ.
"ރާއްޖެއަށް އަންނަ ކޮންމެ ފަހަރަކު ވަރަށް ރަނގަޅަށް ޗުއްޓީ ހޭދަވަނީ. ވަރަށް ގިނަ ރައްޓެހިން ވެސް މިހާރު ތިބޭ. ދިވެހިންނަކީ އަސްލު ވަރަށް ރަނގަޅު ބައެއް،" ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު އަހުމަދު އާތިފު އިސްކޮށް ހުންނެވި ރަސްމިއްޔާތުގައި ނެޓާލީ ބުންޏެވެ.
"ރިޕީޓް ޓޫރިސްޓުން"ގެ ގޮތުގައި ފާހަގަކުރެވޭ ޓޫރިސްޓުންގެ ހިތުގައި ރާއްޖެއާ މެދު އޮތް ލޯބި ބޮޑުކުރަން ޓޫރިޒަމް މިނިސްޓްރީން އަންނަނީ މަސައްކަތްކުރަމުންނެވެ. ރާއްޖެއަކީ ކުރިންސުރެ ރިޕީޓް ޓޫރިސްޓުން ގިނަ ގައުމެކެވެ.
ސަރުކާރުން ފަށާފައިވާ ހަރަކާތްތަކުގެ ތެރޭގައި ތަކުރާރުކޮށް އަންނަ ޓޫރިސްޓުންނަށް އެކި އޮފާތައް ލިބޭ ގޮތަށް މޯލްޑިވްސް އިމިގްރޭޝަނުން ވަނީ ބޯޑާ މައިލްސް ޕްރޮގްރާމް ތައާރަފުކޮށްފަ އެވެ. މި ޕްރޮގްރާމުގެ ދަށުން ދޭ "އަންތަރަ" ދަރަޖަ ނިޓަލްގެ ދެމަފިރިންނަށް މިއަދު ދިނެވެ. މިއީ މި ޕްރޮގްރާމްގައި ހިމެނޭ ދެވަނަ ދަރަޖަ އެވެ.
އާތިފު ވިދާޅުވީ ތަކުރާރުކޮށް ޓޫރިސްޓުން އަންނަނީ ރާއްޖެއިން ލިބޭ ހިދުމަތްތައް ރަނގަޅުވުމުގެ ސަބަބުން ކަމަށެވެ. އެފަދަ ޓޫރިސްޓުން ގިނަކުރުމަކީ ކޮވިޑްގެ ބޮޑު ވެއްޓުމަށް ފަހު ރާއްޖޭގެ ޓޫރިޒަމް އޭގެ ކުރީގެ މަގާމަށް އަލުން ގެންދަން ކުރާ މަސައްކަތުގެ ވެސް ބައެއް ކަމަށް އޭނާ ވިދާޅުވި އެވެ.
"އަބަދުވެސް އެކި ތަންތަނުގައި ރިސޯޓުތައް ހަދަމުން ދަނީ. އެކަމަކު ރާއްޖެއަށް އަންނަނީ އަޅުގަނޑުމެންގެ އިންޑަސްޓްރީގައި މަސައްކަތް ކުރާ މުވައްޒަފުންގެ ހިތްހެޔޮކަމާއި ރާއްޖެއަށް ގުދުރަތީ ގޮތުން ލިބިފައިވާ ރީތިކަމުގެ ސަބަބުން،" އާތިފު ވިދާޅުވި އެވެ.
މިދިޔަ ހަފުތާގައި ރާއްޖެއަށް 60 ވަނަ ފަހަރަށް ޒިޔާރަތްކުރި ދެމަފިރިއަކަށް ވެސް ޓޫރިޒަމް މިނިސްޓްރީން ވަނީ ހާއްސަ މަރުހަބާއެއް ކިޔައިފަ އެވެ.