21 މާޗް 2021 - 20:42
މާލެ ސަރަހައްދުގައި ކޮވިޑް-19ގެ ކޭސްތައް އިތުރުވާތީ މިދިޔަ މަހު ތިން ވަނަ ދުވަހު ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުމާ އެއްގޮތަށް މެދުކަނޑާލި ދިރާގު ދިވެހި ޕްރިމިއާ ލީގުގެ ކުޅުން ފަށަން މިހާތަނަށް ކުރި މަސައްކަތުގައި ކުރިއެރުމެއް ލިބިފައިނުވާތީ ކަމާ ބެހޭ ފަރާތްތަކުން ފުޓްބޯޅަ ކުޅުންތެރިންގެ ހައްގު ހޯދައިދިނުމަށް އެފްއޭއެމްގެ ރައީސް ބައްސާމް އަދީލް ޖަލީލް ގޮވާލައްވައިފި އެވެ.
އެފްއޭއެމްގެ މީޑިއާ މެދުވެރިކޮށް ބައްސާމް މިއަދު ނެރުއްވި ބަޔާނުގައިވާ ގޮތުން ފުޓްބޯޅަ ކުޅުންތެރިންގެ ވަޒީފާ އަދާކުރެވޭ ގޮތް ހެދުމަށް ސަރުކާރާއި މިނިސްަޓްރީ އޮފް ހެލްތު، ޔޫތު މިނިސްޓްރީ އަދި އެޗްޕީއޭއާ އެކު ގިނަ ފަހަރުތަކެއް މަތިން ބައްދަލުކޮށް މިހާތަނަށް އެކަށީގެންވާ ކުރިއެރުމެއް ލިބިފައެއް ނުވެ އެވެ.
ބައްސާމް ވިދާޅުވީ ކޮވިޑް-19ގެ ހާލަތު ކޮންމެ ގޮތަކަށް އޮތް ކަމުގައި ވިޔަސް އާދަވެގެން ދިވެހި ކުރާ ގިނަ ވަޒީފާތަކާއި އިގްތިސާދީ ހަރަކާތްތައް ހުޅުވާލާފައިވާއިރު، އެ ގޮތަށް ފުޓްބޯޅަ ކުޅެން ވެސް ފުރުސަތު ދިނުމަށް އެދޭ ކަމަށެވެ.
"ވަޒީފާ އަށް ނުކުތުމުގެ ފުރުސަތު ނެތް މަދު ދާއިރާތަކުގެ ތެރޭގައި ދިވެހި ފުޓްބޯޅަ ކުޅުންތެރިންނާއި ފުޓްބޯޅަ ކްލަބްތައް ހިމެނޭ ކަމީ ކަންބޮޑުވާންޖެހޭ އަދި މިކަމާމެދު ސީރިއަސްކޮށް ވިސްނަންޖެހޭ ކަމެކެވެ. މިހެންވެ ވީ އެންމެ އަވަަސް ފުރުސަތެއްގައި ފުޓްބޯޅަ ކުޅުންތެރިންގެ ހައްގުތައް ހޯދައިދިނުމަށް ކަމާ ގުޅުން ހުރި ހުރިހާ އިދާރާތަކަށް އަޅުގަނޑު ގޮވާލަމެވެ،" ބައްސާމް ވިދާޅުވި އެވެ.
ފުޓްބޯޅަ އަކީ ރާއްޖޭގެ ވަކިވަކި ކުޅިވަރަށް ބަލާއިރު، އެންމެ ގިނަ ބަޔެއްގެ އާމްދަނީ ބަރޯސާވެފައި އޮތް ކުޅިވަރެވެ. މިދިޔަ ސީޒަނުގައި ކޮވިޑް-19ގެ ސަބަބުން ސީޒަން އަވަހަށް ނިންމާލާ މާޗް މަހު ފަހުކޮޅުގަ އެވެ. އެއީ ސީޒަނުގެ ފަހު ދެ މުބާރާތް ކަމަށްވާ އެފްއޭ ކަޕާއި ޕްރެޒިޑެންޓްސް ކަޕް ކެންސަލްކޮށްފަ އެވެ. އޭގެ ފަހުން އަލުން ފުޓްބޯޅަ ހަރަކާތްތައް ފެށުނީ އަށް މަސް ފަހުންނެވެ. އަލުން ފެށިތާ ދެ މަހެއްހާ ދުވަސް ތެރޭ އަނެއްކާ ވެސް ހުއްޓާލަން ޖެހުމުން ކުޅުންތެރިންނަށް ވަނީ ވަރަށް ގިނަގޮތްގޮތުން ދަތިވެފަ އެވެ.
މިދިޔަ އޮކްޓޫބަރު މަހު އެންމެ ފުރަތަމަ ފުޓްބޯޅަ ޓީމުތަކުން ޕްރީ ސީޒަން ޕްރެކްޓިސް ފެށީ ފީފާ އާއި އޭއެފްސީއާ އެކު ވެސް މަޝްވަރާ ކުރުމަށް ފަހު ހެދި ގައިޑްލައިނަށް އެޗްޕީއޭ އިން ބޭނުންވާ ބަދަލުތައް ވެސް ގެނެސްގެންނެވެ. މާލެ ސަރަހައްދުގައި ކޮވިޑް ކޭސްތައް ގިނަވާތީ މިދިޔަ މަހު ލީގު މެދުކަނޑާލުމުން އަލުން ޕްރެކްޓިސް ފެށީ އެޗްޕީއޭގެ ހުރިހާ އެންގުމަކަށް ބޯލަނބައި ހުރިހާ ކުޅުންތެރިންނާއި އޮފިޝަލުން ވެކްސިން ފުރަތަމަ ޑޯޒް ޖެހުމަށް ފަހު މިދިޔަ މަހުގެ 28 ވަނަ ދުވަހު އެވެ. އެއީ އިއްޔެ އަލުން ލީގު ފެށޭނެ ކަމުގެ އުއްމީދުގަ އެވެ. އެކަމަކު އަދިވެސް ލީގު ފަށަން ހުއްދައެއް ނުލިބެ އެވެ.
މި މަހު ރާއްޖޭގައި ކުޅެން އޮތް ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން މެޗުތައް ވެސް ފަސްކުރީ ފުޓްބޯޅަ ހަރަކާތްތައް ހުއްޓިފައި އޮތުމުންނެވެ. އެ މެޗުތައް މިހާރު ވަނީ ސެންޓްރަލައިޒްކޮށް ޖޫން މަހު ޗައިނާގައި ކުޅޭ ގޮތަށް ނިންމައިފަ އެވެ. މިއާ އެކު ވޯލްޑް ކަޕް ކޮލިފައިންގައި ދެން ރާއްޖެ އަށް ހޯމް މެޗެއް ނެތެވެ.
ރާއްޖޭން ވަނީ އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ މެޗުތައް ހޯސްޓް ކުރުމުގެ ފުރުސަތު ހޯދައިފަ އެވެ. އެއީ އިންޑިއާ ފަހަތަށް ޖައްސާލުމަށް ފަހު އެވެ. އެެ މެޗުތައް ކުޅޭނީ އަންނަ މެއި މަހު އެވެ. އެކަމަކު އޭގެ ކުރިން ރާއްޖޭގެ އީގަލްސް އޭއެފްސީ ކަޕްގެ ކޮލިފައިންގައި ކުޅޭ މެޗު އޮންނާނެ އެވެ. ގަލޮޅު ދަނޑުގައި ކުޅެން ހަމަޖެހިފައިވާ އެ މެޗު ތާވަލުކޮށްފައިވަނީ އަންނަ މަހު ހަތް ވަނަ ދުވަހު އެވެ.
ހުކުރު ދުވަހުގެރޭ ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން ޔޫތު މިނިސްޓަރު އަހުމަދު މަހުލޫފް ވެސް ފާހަގަކުރެއްވި އެއް ކަމަކީ ސަރަހައްދުގެ އެހެން ހުރިހާ ގައުމެއްގައި ފުޓްބޯޅަ ކުރިއަށްދާއިރު، ރާއްޖޭގައި ހުއްޓިފައި އޮތުމުން ބައިނަލްއަގުވާމީ މުބާރާތްތަަކުގައި ރާއްޖޭގެ ޓީމުތަކަށް ހުރި ގެއްލުންތަކެވެ.
ބައްސާމް ވިދާޅުވީ އިންޑިއާ ފަދަ ގައުމުތަކާ ވާދަކޮށް ރާއްޖޭން އޭއެފްސީ ކަޕްގެ މެޗުތައް ބޭއްވުމަށް މި ހޯދި ރަނުގެ ފުރުސަތުގެ ހަގީގީ ފައިދާ ނުނެގިދާނެތީވެ ކަންބޮޑުވާ ކަމަށެވެ. އެއީ ރާއްޖޭގެ ޓީމުތައް މާ ބޮޑު ތައްޔާރީއެއް ނެތި އޭއެފްސީ ކަޕްގައި ކުޅެން ޖެހޭތީ އެވެ.
"ރާއްޖެ އަށް ވުރެ ކޮވިޑް-19ގެ ހާލަތު ގޯސް ގައުމުތަކުން ވެސް ޕްރޮފެޝަނަލް ފުޓްބޯޅަ ހަރަކާތްތައް ކުރިއަށް ގެންދިއުމަށް ފުރުސަތު ދީފައިވެ އެވެ. (އޭއެފްސީ ކަޕްގައި) ރާއްޖެ ވާދަކުރަންޖެހޭ ގައުމުތައް ކަމަށްވާ ބަންގްލަދޭޝް އާއި ބޫޓާން އަދި އިންޑިއާ ޓީމުތައް އޭޕްރީލް އަދި މެއި މަހު ކުޅޭ އޭއެފްސީ ކަޕަށް ވަރަށް ފުރިހަމަ އަށް ތައްޔާރުވަމުންދާއިރު ދިވެހި ޓީމުތަކަށް ފުރުސަތު ނެތުމުން ހިތާމަކުރަން،" ބައްސާމް ވިދާޅުވި އެވެ.
އެޗްޕީއޭގެ ނިންމުންތައް މި ގޮތަށް އޮތުމުން އޭއެފްސީ ކަޕް ފަދަ ސަރަހައްދީ މުބާރާތްތަކުގައި ރާއްޖޭގެ ނަތީޖާތަކަށް ނޭދެވޭ އަސަރުކޮށް ދިވެހި ޓީމުތަކަށް ލިބޭ މި ފަދަ ފުރުސަތުތަކަށް މަޑުޖެހުން އަތުވެދާނެ ކަމަށް ބައްސާމް ވިދާޅުވި އެވެ. އަދި އަންނަ ރޯދަ މަހުގެ ފަހުން ކުޅެން ހަމަޖެހިފައި އޮތް ގައުމީ ޓީމުގެ ވޯލްޑް ކަޕް ކޮލިފައިންގެ މެޗުތަކަށް ވެސް އަސަރުކުރާނެ ކަމަށް ވިދާޅުވި އެވެ.
އެޗްޕީއޭގެ އެންގުމާ އެއްގޮތަށް މިދިޔަ މަހު ފުޓްބޯޅަ ސީޒަން މެދުކަނޑާލިއިރު، ތިން ވަނަ ޑިވިޝަން ފުޓްބޯޅަ މުބާރާތް ފަށަން އޮތީ ހަތަރު ދުވަހަށް ވެފަ އެވެ. އެ މުބާރާތަކީ މިދިޔަ ސީޒަނުގެ ތިން ވަނަ ޑިވިޝަން މުބާރާތެވެ. މިދިޔަ ސީޒަނުގައި ތިން ވަނަ ޑިވިޝަން ނުބޭއްވުނީ ކޮވިޑާ ހެދި ސީޒަން އަވަހަށް ނިންމާލަން ޖެހުމުންނެވެ.
ބައްސާމް ވިދާޅުވީ ތިން ވަނަ ޑިވިޝަން ފަށަން ކުޑަ ދުވަސްކޮޅަކަށް ވެފައި އޮއްވައި ފުޓްބޯޅައިގެ ހަރަކާތްތައް ހުއްޓާލިއިރު ތިން ވަނަ ޑިވިޝަނުގައި ވާދަކުރާ ޓީމުތަކުން ވަނީ ރާއްޖެ އާއި ރާއްޖޭން ބޭރުން ކުޅުންތެރިން ގެނެސް ޕްރެކްޓިސްތައް ވެސް ފަށައިފަ އެވެ. އެހެންވެ ފުޓްބޯޅަ ނުފެށި ލަސްވާ ކޮންމެ ދުވަހަކީ މި ޓީމުތަކަށް ވެސް މާލީ ގޮތުން ގެއްލުންތަކެއް ކުރިމަތިވެދާނެ ކަމެއް ކަމަށާއި ފުޓްބޯޅައިގެ ތަރުތީބަށް ބަލާއިރު، މުބާރާތްތައް ހުއްޓާލައިގެން ތިބުމަކީ ކުރެވޭނެ ކަމެއް ނޫން ކަމަށް ބައްސާމް ފާހަގަކުރެއްވި އެވެ.