05 އެޕްރީލް 2021 - 12:40
ހުރިހާ ޑްރައިވަރުން ވެސް ބޭނުންވަނީ އެއާޕޯޓަށް ކުރާ ދަތުރުތަކަށް 100ރ. ނަގަން ކަމަށް ޓެކްސީ ޑްރައިވަރުންގެ ޖަމިއްޔާ އިން މިއަދު ބުނެފި އެވެ.
ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަދައްކަވަމުން ޓެކްސީ ޑްރައިވަރުންގެ ޖަމިއްޔާގެ ރައީސް އަބްދުﷲ އިބްރާހިމް ވިދާޅުވީ މާލެ ސަރަހައްދުގައި ޓެކްސީ ދަތުރުތައް ކުރުމަށް ޓްރާންސްޕޯޓް އޮތޯރިޓީން ކަނޑައަޅާފައިވާ އަގުތަކަކީ އެ ޖަމިއްޔާ އިން ގަބޫލު ކުރާ އަގުތަކެއް ނޫން ކަަމަށެވެ. އަދި އެ އަގުތައް ކަނޑައެޅުމުގައި އެ އޮތޯރިޓީން އެއްވެސް ޓެކްސީ ސެންޓަރަކާ މަޝްވަރާ ކޮށްފައިވާ ނުވާ ކަމަށް ވެސް އޭނާ ވިދާޅުވި އެވެ.
އިގްތިސާދީ ކޮމިޓީގެ މެމްބަރަކު ކުރެއްވި ސުވާލަކަށް އަބްދުﷲ ވިދާޅުވީ އަގުތަކާ ގުޅިގެން އެ ޖަމިއްޔާގެ މެމްބަރުންގެ މެދުގައި މަޝްވަރާ ކުރި ކަމަށެވެ. އެކި ސަރަހައްދުތަކަށް އެކި އަގުތައް މެމްބަރުން ހުށަހެޅި އިރު ހުރިހާ މެމްބަރުން އިއްތިފާގުވާ ހަމައެކަނި އަގަކީ އެއާޕޯޓަށް ކުރާ ދަތުރުތަކަށް 100ރ. ނެގުން ކަމަށް އޭނާ ވިދާޅުވި އެވެ.
"އެއާޕޯޓަކީ ހުރިހާ ގައުމެއްގައި ވެސް ކޮމާޝަލް ހަބް. މިހާރު މާލެއިން ހުޅުމާލެއަށް ފެމިލީ ވިޒިޓެއްގައި ދާއިރު 75ރ. ދީފައި ދާއިރު އެ އަގު ބޮޑެއް ނޫން. އެކަމަކު އެއާޕޯޓަށް ފުރަންދާ މީހާ 60ރ. ދީފައި ކާރު ފުލްކޮށް ލަގެޖު ހިފައިގެން ދާން އޭތި ވޯތެއް ނޫން،" އަބްދުﷲ ވިދާޅުވި އެވެ.
އަބްދުﷲ ވިދާޅުވިގޮތުގައި މާލެއިން ހުޅުމާލެއަށް ކުރާ ދަތުރުތަކަށް މިހާރު ނަގަމުން އަންނަ 75ރ. އަކީ އެންމެ ރަނގަޅު އަގު ކަމަށް ގިނަ ޓެކްސީ ޑްރައިވަރުން ގަބޫލު ކުރެ އެވެ. ނަމަވެސް ބައެއް ޑްރައިވަރުން އެ އަގު 80-90ރ. އަށް ބަދަލު ކުރުމަށް އެދޭ ކަމަށް ވެސް އޭނާ ވިދާޅުވި އެވެ.
މީގެ އިތުރުން ހުޅުމާލެ ދެވަނަ ފިޔަވައްސަށް ކުރާ ދަތުރުތަކަށް ނަގާ އަގާ މެދުވެެސް ޓެކްސީ ޑްރައިވަރުން ވަނީ ހިތްހަމަ ނުޖެހުން ފާޅުކޮށްފަ އެވެ. ޑްރައިވަރުން ގަބޫލު ކުރާ ގޮތުގައި ހުޅުމާލޭގެ ދެވަނަ ފިޔަވައްސަކީ ބޮޑު ސަރަހައްދަކަށްވުމުން އެތަނަށް ކުރާ ދަތުރުތަކުގެ އަގު ބޮޑުވާން ޖެހޭނެ ކަމަށް އެ މީހުން ގަބޫލު ކުރެ އެވެ.
- މާލެ - ހުޅުމާލެ ފުރަތަމަ ފިޔަވަހި، 75ރ.
- މާލެ - ހުޅުލެ، 60ރ.
- މާލެ - ހުޅުމާލެ ދެވަނަ ފިޔަވަހި، 90ރ.
ޓެކްސީ ޑްރައިވަރުންގެ ޖަމިއްޔާއިން އެދެނީ ޓްރާސްޕޯޓު އޮތޯރިޓީން މިހާރު ކަނޑައަޅާފައިވާ އަގުތައް އެ ޖަމިއްޔާ އާއި މަޖިލީހުގެ މެމްބަރުން އަދި ޓްރާންސްޕޯޓް މިނިސްޓްރީގެ އޮފިޝަލުން ގުޅިގެން މުރާޖައާ ކުރުމަށެވެ.