07 އެޕްރީލް 2021 - 19:26
ރައީސް އިބްރާހިމް މުހައްމަދު ސޯލިހުގެ ސަރުކާރު ތަފާތުވަނީ ފަންތީގެ ތަފާތު ކުރުމެއް ނެތި ކޮރަޕްޝަނުގެ މައްސަލަތައް ބަލާތީ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ސަރުކާރު ހިއްސާވާ ކުންފުނިތަކުގެ ޕްރޮކިޔުމެންޓް ގައިޑްލައިނާއި ކުންފުނިތަކަށް އަމާޒުކޮށްގެން ތައްޔާރުކުރި ޖޮބް ކްލެސިފިކޭޝަން ފްރޭމްވޯކު ނެރުމަށް ބޭއްވި ރަސްމިއްޔާތުގައި އަމީރު ވިދާޅުވީ، ކޮރަޕްޝަން ހުއްޓުވުމަށް އެޅޭނެ އެންމެ ބޮޑު ފިޔަވަޅަކީ މައްސަލަ ހުށަހެޅޭނެ ފަސޭހަ ނިޒާމުތަކެއް ގާއިމުވެފައި ހުރުން ކަމަށެވެ. އެކަން ފަހި ކުރުމަށް ސަރުކާރުން މިހާރު ވާނީ އޭސީސީ އަށް މައްސަލަ ހުށަހެޅުމުގެ އިތުރުން ވިސްލްބްލޯ ކުރާނެ ނިޒާމެއް ގާއިމް ކޮށްފައި ކަމަށް އޭނާ ވިދާޅުވި އެވެ.
މި ސަރުކާރުގައި ވެސް ކޮރަޕްޝަންގެ ކަންކަން ހުރި ކަމަށް ބުނާ ވާހަކަތަކަށް ރައްދު ދެއްވައި އަމީރު ވިދާޅުވީ ރާއްޖޭގައި ކޮރަޕްޝަން އޮތް ވަރަށް ބަލާ އިރު ކުޑަ ދުވަސްކޮޅަކުން އެކަން ހައްލު ނުކުރެވޭނެ ކަމަށެވެ. ނަމަވެސް ކޮރަޕްޝަން ހުއްޓުވުމަށް ކުރާ މަސައްކަތުގައި މި ސަރުކާރު ހުރިހާ ގޮތަކުން ވެސް ތަފާތު ކަމަށް އޭނާ ވިދާޅުވި އެވެ.
"މި ފިޔަވަޅު މަތީގައި ހުރެގެން ވަރަށް ސާބިތުކަމާ އެކު އަޅުގަނޑު މި ދަންނަވަނީ ކޮރަޕްޝަނަށް ހުޅުވިފައި ހުރި ދޮރުތައް ބަންދު ކުރަން މި ކުރެވޭ މަސައްކަތޭ ތަފާތަކީ. އުސޫލުތައް ހަރުދަނާކޮށް ނިޒާމުތައް ގާއިމު ކުރުމޭ ތަފާތަކީ. ކޮންމެ ފަންތިއެއްގެ، ކޮންމެ ގިންތިއެއްގެ މީހަކަށް ކޮރަޕްޝަންގެ އިނގިލި ދިއްކުރެވުނަސް އެކަން ބެލުމޭ ތަފާތަކީ،" އަމީރު ވިދާޅުވި އެވެ.
އޭނާ ވަނީ ސަރުކާރުގެ އިސް ބޭފުޅަކު ކޮރަޕްޝަނުގެ އަމަލެއް ހިންގި ކަމުގެ ޝަކުވާ ލިބުނަސް އެކަން ވީހާވެސް އަވަހަކަށް ބެލުމަށް އޭސީސީގެ ރައީސްގެ އަރިހުން އެދިވަޑައިގެންފަ އެވެ. ފިނޭންސް މިނިސްޓްރީން އެކަމަަށް އެއްބާރުލުން ދޭނެ ކަމަށް ވެސް އޭނާ ވިދާޅުވި އެވެ.
ސަރުކާރު ހިއްސާވާ ކުންފުނިތަކަކީ ދައުލަތް ހިންގުމުގެ އެންމެ މުހިއްމު އެއް ތަނބުކަން ފާހަގަކުރައްވައި އަމީރު ވިދާޅުވީ ހިދުމަތްތަކުގެ އަގު ދަށްކުރުމާއި ހިދުމަތްތަކުގެ ފެންވަރު ރަނގަޅު ކުރުމަށްޓަކައި ރަނގަޅު ޕްރޮކިއުމަންޓް ގައިޑްލައިންއެއް އޮތުމަކީ ކޮންމެހެން މުހިންމު ކަމެއް ކަމަށެވެ. އަދި މީގެ ސަބަބުން، ކޮރަޕްޝަނަށް މަގުފަހިވާ ގޮތަށް ހުޅުވިފައި ހުރި ދޮރުތައް ބަންދުވާނެ ކަމށް ވެސް އޭނާ ވިދާޅުވި އެވެ.
"މިއަދު މި ނެރެވުނު ޕޮލިސީތައް ފަދަ ޕޮލިސީތަކާ އެކު ވަގު ހިފޭނެ މެކޭނިޒަމްތައް ގާއިމު ވެގެންދާނެ. އެއާއެކު އެއްކަލަ ރޯމާ ދުވާލު ވައްކަން ކުރި ފަރާތްތައް ވެސް އެ ކަންތައްތައް ކުރަން ދެން ޖެހިލުންވާނެ،" އަމީރު ވިދާޅުވި އެވެ.
އަމީރު ވަނީ އޮޑިޓް ރިޕޯޓްތަކުގައި ފާހަގަ ކޮށްފައިވާ ފައިސާގެ މުއާމަލާތްތައް އަނބުރާ ދައުލަތަށް ހޯދުމުގެ މަސައްކަތް ފަށައިގެން ކުރިއަށް ގެންދާ ކަމަށް ވެސް ވިދާޅުވެފަ އެވެ.