23 އެޕްރީލް 2021 - 10:25
އިންޑިއާގެ މަޝްހޫރު މިއުޒިކް ޑައިރެކްޓަރު ޝަރުވަން ރާތޯޑް ކޮވިޑް-19 އަށް ފަރުވާ ދެނިކޮށް ބުރާސްފަތި ދުވަހުގެ ރޭ މަރުވެއްޖެ އެވެ.
އުމުރުން 66 އަހަރުގެ ޝަރުވަން މަރުވީ މިދިޔަ ހަފުތާގެ ކުރީކޮޅު މުމްބާއީގެ އެސްއެލް ރަހޭޖާ ހޮސްޕިޓަލްގައި ފަރުވާ ދެމުން ދަނިކޮށެވެ. އޭނާގެ އާއިލާ އިން ބުނީ ޝަރުވަން މަރުވީ އައިސީޔޫގައި ފަރުވާ ދެމުން ދަނިކޮށް ކަމަށެވެ. ޝަރުވަންގެ މަރާ ގުޅިގެން ބޮލީވުޑްގެ ވަރަށް ގިނަ ފަންނާނުން ހިތާމަފާޅުކޮށް ޓްވީޓްކޮށްފައިވެ އެވެ.
ޝަރުވަން އަކީ ހިންދީ ސިނަމާގައި 90 ގެ އަހަރުތަކުގައި އެންމެ ކާމިޔާބު މިއުޒިކް ޑައިރެެކްޓަރުންގެ ތެރޭގައި ހިމެނުނު ފަންނާނެވެ. އޭނާ މިއުޒިކް ހެދުމުގެ މަސައްކަތްކުރީ ނަދީމު ސައިފީއާ ގުޅިގެންނެވެ. އެއާ އެކު އެ ދެ މީހުން މަޝްހޫރުވީ ނަދީމު-ޝަރުވަންގެ ގޮތުގަ އެވެ.
ކާމިޔާބު އަދި ރީތި އެތައް ފިލްމަކަށް ހިތްގައިމު އެތައް ލަވަތަކެއް އެ ދެ މީހުން ހަދާފައިވެ އެވެ. އޭގެ ތެރޭގައި އަދިވެސް އެ ލަވަތަކެއް ޖާދޫ ނުފިލާ "އާޝިގީ" އާއި "ސާޖަން" އާއި "ޕޫލް އޯރް ކާންޓޭ" އާއި "ސަޅަކް" އާއި "ދީވާނާ" އާއި "ދިލް ކާ ކިޔާ ކަސޫރު" އަދި "ދަޅުކަން" ފަދަ އެތައް ފިލްމެއް ހިމެނެ އެވެ.
ނަމީދު-ޝަރުވަން އަކީ މިއުޒިކީ ދާއިރާ އިން އެތައް ކާމިޔާބީތަކެއް ވެސް ހޯދާފައިވާ ދެ ފަންނާނުންނެވެ.
މިދިޔަ އަހަރު ވެސް ބޮލީވުޑްގެ މަޝްހޫރު މިއުޒިކް ޑައިރެކްޓަރަކު މަރުވި އެވެ. އެއީ ބޭބެ ސާޖިދު ޚާނާ އެކު މިއުޒިކް ޑައިރެކްޓަރެއްގެ ގޮތުގައި މަސައްކަތްކުރަމުން ދިޔަ ވާޖިދު ޚާނެވެ. އެ ދެ މީހުން މަޝްހޫރުވީ ސާޖިދު-ވާޖިދުގެ ގޮތުގަ އެވެ.