02 މެއި 2021 - 14:52
ކޮލަމްބޯ (މެއި 2) - ކޮވިޑުގެ ސަބަބުން ލިބުނު ގެއްލުންތަކާ އެކު ލަންކާގެ އިގްތިސާދު މިދިޔަ އަހަރު 3.6 ޕަސެންޓަށް ދަށްވި ކަމަށް އޮފިޝަލުން ބުނެފި އެވެ.
މިއީ އިނގިރޭސިންގެ ބާރުގެ ދަށުން 1948 ވަނަ އަހަރު މިނިވަންކަން ލިބުނު ފަހުން ލަންކާގެ އިގްތިސާދު އެންމެ ބޮޑަށް ދަށަށް ދިޔަ ފަހަރެވެ. ސެންޓްރަލް ބޭންކް އޮފް ސްރީ ލަންކާގެ 2020 ވަނަ އަހަރުގެ ތަފާސްހިސާބުތައް ދައްކާ ގޮތުން 2019 ވަނަ އަހަރު ލަންކާގެ ޖީޑީޕީގެ ކުރިއެރުން ހުރީ 2.3 ޕަސެންޓުގަ އެވެ. މަރުކަޒީ ބޭންކުން އުއްމީދު ކުރަނީ އިގްތިސާދީ ކުރިއެރުން މި އަހަރު ހަ ޕަސެންޓަށް އިތުރުވާނެ ކަމަށެވެ.
"ކޮވިޑުގެ ބަލިމަޑުކަމަކީ އިގްތިސާދު އަލުން ރިސެޓް ކުރަން ލިބުނު ފުރުސަތެއް ވެސް މެ. އުފެއްދުންތެރިކަމަށް އިގްތިސާދު ފޯކަސްކުރަން ވަނީ ޖެހިފައި،" މަރުކަޒީ ބޭންކުން ބުނެފައިވެ އެވެ.
ކޮވިޑުގެ ސަބަބުން އެންމެ ބޮޑު ގެއްލުމެއް ލިބުނީ ލަންކާގެ ޓޫރިޒަމް ސެކްޓަރަށެވެ. އަދި ކޮންސްޓްރަކްޝަން، މެނުފެކްޗާރިން އިންޑަސްޓްރީ އަށް ވެސް ވަނީ ބޮޑު ގެއްލުމެއް ލިބިފަ އެވެ. ލަންކާ އަށް ކޮވިޑުގެ ދަތިކަން ކުރިމަތިވީ 2019 ވަނަ އަހަރު ދިން ޓެރަރިސްޓް ހަމަލާ އިން ލިބުނު އިގްތިސާދީ ގެއްލުމުން އަރައިގަތުމުގެ މަސައްކަތް ކުރަމުން ދަނިކޮށެވެ.
ލަންކާގެ މަރުކަޒީ ސަރުކާރުގެ ދަރަނި ވެސް މިދިޔަ އަހަރު 101 ޕަސެންޓް އިތުރުވި ކަމަށް ބުނެފައިވެ އެވެ. މީގެ ދެ ހަފުތާ ކުރިން ލަންކާ އިން ވަނީ ފޮރިން އެކްސްޗޭންޖް ރިޒާވް މަތިކުރަން 500 މިލިއަން ޑޮލަރުގެ ލޯނެއް ޗައިނާ އިން ނަގައިފަ އެވެ. ލަންކާ އިން ވަނީ 2005 އިން 2015 އާ ދެމެދު ޗައިނާ އިން ބިލިއަން ޑޮލަރުގެ ލޯނު ނަގައިފަ އެވެ. ޗައިނާގެ ދަރަނި ނުދެއްކުމުން ހަމްބަންޓޯޓާ ބަނދަރު 2017 ވަނަ އަހަރު ވަނީ 99 އަހަރަށް ޗައިނާ އަށް ދީފަ އެވެ. އެ ބަނދަރު ހެދުމަށް ލަންކާ އިން ވަނީ ޗައިނާ އިން 1.4 ބިލިއަން ޑޮލަރުގެ ލޯނެއް ނަގައިފަ އެވެ.