04 މެއި 2021 - 13:07
ޑޯޓްމަންޑް (މެއި 4) - ބޮރޫޝިއާ ޑޯޓްމަންޑްގެ އިނގިރޭސި ފޯވަޑް ޖޭޑަން ސަންޗޯގެ ޓްރާންސްފާގެ އަގު ދަށް ކޮށް ކުރިއަށް އޮތް ހޫނު މޫސުމުގެ ޓްރާންސްފާގައި އޭނާ ގެންދަން ބޭނުންވާ ކްލަބަކަށް ފުރުސަތު ހުޅުވާލައިފި އެވެ.
ބީވީބީގެ ނަމުން މަޝްހޫރު ވެފައިވާ ކްލަބާ އެކު ސަންޗޯ، 21، ހަދާފައިވާ ކޮންޓްރެކްޓް ހަމަވާން އަދި ބާކީ ދެ އަހަރު އެބައޮތެވެ. ސަންޗޯ ގެންދަން އިނގިރޭސި ބައެއް ކްލަބުތަކުން ޝައުގުވެރިވި ނަމަވެސް އޭނާގެ ޓްރާންސްފާ އަށް ޑޯޓްމަންޑުން ކިޔާ ބޮޑު އަގު، ކްލަބުތަކަށް އޮތީ ކަންބޮޑުވުމަކަށްވެފަ އެވެ.
އޭރު އޭނާގެ ޓްރާންސްފާ އަށް ޑޯޓްމަންޑުން ކީ އަގަކީ 120 މިލިއަން ޔޫރޯ އެވެ. އެހެންނަމަވެސް ކުރިއަށް އޮތް ޓްރާންސްފަ ޕީރިއަޑްގައި އޭނާ ގެންދަން ބޭނުންވާ ކްލަބަކަށް 100 މިލިއަން ޔޫރޯއަށް ސަންޗޯ ވިއްކާލުމަށް ޑޯޓްމަންޑުން އެއްބަސްވެފައިވާ ކަމަށް އީއެސްޕީއެން އިން ބުނެ އެވެ.
ސަންޗޯ ގެންދަން، މެންޗެސްޓާ ޔުނައިޓެޑުން ކުރިން ޝައުގުވެރިކަން ފާޅު ކުރި އެވެ. އެހެންނަމަވެސް އެ ކްލަބުން ވެސް އޭނާގެ ޓްރާންސްފާއަށް ހަރަދު ނުކުރީ އަގުބޮޑުވުމުންނެވެ.
ޑޯޓްމަންޑްގެ ސްޕޯޓިން ޑައިރެކްޓާ މިޝޭލް ޒޯކް، ޖަރުމަންގެ އޭއާރް ޑީ ޓީވީއަށް މިދިޔަ ހޮނިހިރު ދުވަހު ދިން އިންޓަވިއުއެއްގައި ބުނެފައި ވަނީ ބައެއް ޝަރުތުތަކާ އެކު ސަންޗޯ ގެންދިއުމުގެ ފުރުސަތު ޝައުގުވެރިވާ ކްލަބުތަކަށް އޮންނާނެ ކަމަށެވެ.
ޑޯޓްމަންޑަށް ކުޅުނު 133 މެޗުގައި، ސަންޗޯ ވަނީ 46 ގޯލް ޖަހައި އިތުރު 62 ގޯލް ޖަހަން ފުރުސަތު ތަނަވަސްކޮށްދީފަ އެވެ.
ޑޯޓްމަންޑްގެ ކުޅުންތެރިންގެ ތެރެއިން ޔޫރަޕްގެ ބޮޑެތި ކްލަބުތަކުން ޝައުގުވެރިވާ ހަމައެކަނި ކުޅުންތެރިންޔަކީ ސަންޗޯ އެކަންޏެއް ނޫނެވެ. އެ ޓީމުގެ ނޯވޭގެ ފޯވަޑް އާލިން ހާލޭންޑް ގެންދިއުމަށް ޔޫރަޕްގެ ބޮޑެތި ކްލަބުތަކުން މާ ބޮޑަށް ޝައުގުވެރިވެ އެވެ. ޒޯކް ބުނީ ހާލޭންޑްގެ ހާލަތު ތަފާތު ކަމަށާއި އޭނާ ކްލަބު ދޫކޮށްލުމަށް ސަންޗޯއާ އެކު އޮތް ފަދަ އެއްބަސްވުމެއް ނެތް ކަމަށެވެ.